Azo atokisagne ty ndaty mahay mandrambe andraikitse. Anoe’e soa ze raha ampanovegne aze, sady vitae’e ara-potoagne.

Afake mianatse mandrambe andraikitse o ajajao ndra tie mbe kede aza. Hoe ty boke Ty Fitezagne Ajaja amy ty Tane Sambe Hafa (angilé): “Naho fa feno tao’e raike naho telo volagne o ajajao, le fa afake manao ze raha ampanoe ty rae aman-drene’e aze. Naho fa tao’e raike naho enem-bolagne eo ho eo ka reke, le tea’e hatao iaby ze raha anoe ty rae aman-drene’e.” Izao ka ty voarehake ao: “Fa ampianaregne manao raha ty ajaja dime taogne hatrake amy ty fito taogne, amy ty tane maro. Mahavita raha soa o ajajao ndra tie mbe kede aza.”

Maro ty tanora te hahaleo tegna, le misintake ty an-tragno i rae aman-drene’ey ao. Faie niheregne noly iareo tafara tatoy naho fa nanagne olagne. Ty anto’e, nisy tamy iareo tsy mba nampianaregne hitantam-bola, hanao raha, ndra handrambe andraikitse.

Soa areke naho ampianaregne handrambe andraikitse o ajajao amy ie mbe kedey mba tsy ho sahiragne naho fa bey. Hoe ty boke raike miomba ty fitezagne: “Tsy mete naho zare’o hiantehetse ama’o bey loatse avao ty ana’o. Naho fa feno 18 taogne reke, le enga’o hiatreke ty fiaigna’e irery faie tsy misy raha hai’e ndra inogn’ino.”

Ampanò raha reke.

TORO LALAGNE: “Ahatreavagne tombo’e ze raha irokafagne.”​—Ohabolana 14:23.

Fa toetse o ajaja kedekedeo tihoe tea magnampe ty rae aman-drene’e. Magnino areke reke naho ampanoegne raha?

Faie tsy te hanao izay ty rae aman-drene ila’e. Nao zao fa maro loatse ty devoara i ana’ey, le tsy tea’e hampanoegne raha hafa sasa reke.

Faie vao mainke mahay raha ty ajaja ampanoegne raha. Ty anto’e fa zatse mamita ze raha ampanoegne aze reke. Hoe ty boke Ty Fitezagne Ajaja amy ty Tane Sambe Hafa: “Akore naho sakanantika ty anantikagne naho te hagnampe antika? Hanjare hieretseretse reke tie tsy ilaegne ty magnampe ty hafa. ... Tsy hanao raha ka reke fa handigne ty hafa avao.”

Trea boake amy izay fa manjare tsy tea tegna o ajajao sady vognogne hagnampe ty hafa naho fa ampanovegne raha. Hanjare tsapa’e ka tie ilaegne reke an-tragno ao sady toko’e hagnampe ty keleia’e.

Anò tsapa’e tie tompon’andraikitse amy ze raha atao’e reke.

TORO LALAGNE: “Mitsanogna torohevetse, le rambeso i fagnanaragney mba ho hendre rehe amy ty hoavy.” ​—Ohabolana 19:20.

Akore ohatse, naho nanimba raha o ndaty ty ana’o? Ko aetaketake i rahay. Engao hizaka ty voka ty raha natao’e reke, ohatse miala tsiny ndra manolo i raha nisimbae’ey.

Anò azo i ajajay tie tompon’andraikitse amy ty raha atao’e reke, amy izay reke...

• ho zatse hirehake ty maregne naho hieke fahadisoagne

• tsy hagnomey tsiny ty hafa

• tsy hagnamaren-tegna

• hiala tsiny naho fa ilaegne zay