Tsy magneke ho rese ty ndaty tsy mora kivy naho fa managne olagne ndra diso fanantenagne. Naho fa boake niatreke olagne maro ty ndaty raike vaho izay managne o toetse iohoe. Tsy maintsy mitonta mateteke o anak’ajajao vaho izay mahay mandeha. Tsy maintsy miatreke olagne maro ka ty ndaty raike vaho izay mahay tie, ino ty toko’e hatao’e naho te ho tafita amy ty fiaignagne.

Le avy le kivy ty ajaja ila’e naho fa tsy nimete ty raha natao’e ndra miatreke olagne reke ndra ka misy mitsaratsara. Misy aza ty magneke ho rese. Faie mila taka’e soa ty raha retoagne:

• Tsy voatere ho tomombagne iaby ze raha atao’e.​—Jakoba 3:2.

• Tsy maintsy miatreke olagne iaby ze kila ndaty.​—Mpitoriteny 9:11.

• Ilaegne ty manao fagnitsiagne naho te hihasoa.​—Ohabolana 9:9.

Naho tsy mora kivy o ajajao, le hatoky reke tie ho vita’e ty hiatreke ty olagne amy ty hoavy.

Naho fa tsy nimete ty raha natao’e.

TORO LALAGNE: “Va’e ho tonta impito ty ndaty maren-tane, faie le mbe hahafoha avao.”​—Ohabolana 24:16.

Ampeo reke handineke tie olagne lahibey vao i rahay sa madinedineke. Akore ohatse naho latsake ty noti’e tamy i fagnadignagney? Va’e ho kivy reke, le hirehake tie: “Tsy mba misy raha hain-tegnagne!”

Ampeo reke hahatrea ty fomba hagnasoa’e ty noti’e. Amy izay reke hahavita hiatreke i olagney fa tsy hiferenaigne ty vata’e avao.

Faie mitaoa tsy hanjare irehe ty hamaha i olagney. Magnampe aze hahatrea vahaolagne avao ty atao’o. Azo’o agnonteneagne ohatse reke tie: “Ino ty azo’o atao mba hahaia’o soa o lesogne iohoe?”

Naho fa misy olagne.

TORO LALAGNE: “Faie tsy fanta’areo ty raha hiseho hamaray.”​—Jakoba 4:14.

Miovaova avao o fiaignagneo. Va’e hanjare mahantra ohatse, ty ndaty raike, ndra harare tampoke. Hoe ty Mpitoriteny 9:11: “Tsy ze mahalay ro maharese, tsy ze maozatse ro mandrese, ... satria va’e ho voan-draha amy ty andro tsy ampoize’e iareo.”

Azo antoke fa mikezake mafe rehe mba hiarovagne ty ana’o. Tsy ho vita’o ty hiaro aze amy ze olagne iaby miseho.

Va’e mbe kedekede ty ana’o ty amy izao, le tsy hai’e tie manao akore ze o montso asa naho managne olagne ara-bola zao. Faie afake magnampe aze hiatreke olagne hafa rehe. Va’e mialy mafe amy ty nama’e reke ndra malahelo satria nimate ty longo’areo. *

Naho fa misy magnitsy reke.

TORO LALAGNE: “Mitsanogna torohevetse... mba ho hendre rehe amy ty hoavy.”​—Ohabolana 19:20.

Tsy tihoe te hampalahelo ty ana’o ty ndaty raike kanao magnitsy aze. Mba tea’e hagnova ze raha tsy mete atao’e avao reke.

Naho ampianare’o hagneke fagnitsiagne ty ana’o, le sambe handrambe soa nareo. Hoe ty John managn’anake telo: “Naho arova’o avao ty ana’o naho fa misy tsy mete atao’e, le tena tsy handrambe lesogne reke.” “Hanagne olagne bey avao reke naho fa bey sady irehe avao ka ty tsy maintsy hamaha aze. Sambe hijale ndra irehe ndra i ana’oy.”

Ino ty azo’o atao naho tea’o hagneke fagnitsiagne ty ana’o? Va’e hagnitsy aze ohatse o ramosé eo ndra ty ndaty hafa. Mitaoa mba tsy hirehake tihoe tsy rare’e i rahay. Azo’o agnonteneagne reke tie:

• “Ino ty nahavy i ndatỳ nagnitsy azo?”

• “Ino ty azo’o hasoaegne?”

• “Ino ty hatao’o naho misy magnitsy indraike rehe amy ty magnarake?”

Tadidio fa tsy amy hinane zao avao i ana’oy ro handrambe soa naho mandrambe fagnitsiagne fa ndra tie fa bey ka aza.