Kolokolò Soa ty Fo ty Ana’o!

VITA ty mpamboatse tanelietse mahay ty mamolavola i tanelietsey hanjare fitaovagne tena fanjaka. Tsy ampe avao ty ndaty mpamboatse hahavita raha fanjaka boake amy ty raha tsotra manahake o tanelietseo. Fa agn’arivo’e taogne o mpamboatse tanelietseo ro namboatse kope, finga, valagne, siny fitamirian-draha, vaho vazy hoahy ty mpiharo tanàgne ama’e.

Magnampe ty mpiharo tanàgne ama’e ka o rae aman-dreneo naho fa mikolokolo soa ty toetse ty ana’e. Ampitovize ty Baiboly amy ty tanelietse tikagne, le ty rae aman-drene ty nimean’Andrianagnahare andraikitse lahibey hikolokolo ty ana’e. (Joba 33:6; Genesisy 18:19) Sambe tsy mora ndra ty mamorogne raha fanjaka boake amo o tanelietseo, ndra ty mikolokolo ty anake hanjare ndaty bey azo atokisagne naho mahay manahatsahatse. Tsy mandeha ho aze avao zay.

Maro ty raha mikolokolo ty fò o anantikagneo. Mampalahelo fa manimba aze ty ila’e amy i raha rey. Tsy tihoe hengà ty rae aman-drene amy izao avao ty ana’e fa toko’e hotoroa’e ‘ty lalagne toko’e homba’e’ sady hatoky reke fa ‘tsy hisintake amy izay ndra tie fa antetse aza.’—Ohabolana 22:6.

Maro ty raha miseho amy ty fotoagne itezà ty rae aman-drene kristiana ty ana’e. Tsy maintsy manokagne fotoagne areke iareo mba hialiagne amy ty raha raty va’e hanimba ty fo ty ana’e. Tsy ho mora amy ty rae aman-drene ty haneho hatea ty ana’e, naho fa “mampianatse ty ana’e ty fomba fisaigna i Jehovah.” (Efesianina 6:4) Azo antoke fa ho mora ama’e ty hanao ty andraiki’e naho fa atao’e aloha bey.

Atomboho aloha bey

Tea o mpamboatse tanelietseo ty miasa amy ty tanelietse mora volavolaegne, faie tsy maleme loatse, mba hampiboake soa ty pozipozy ty raha amboaregne ama’e. Ndraleo o mpamboatse tanelietseo areke ampiasaegne agnate ty enem-bolagne i tanelietsey naho fa vita niliovegne. Hoe izay ka ty rae aman-drene fa amy ty fotoagne mete soa amy i ajajay, ty toko’e hanombohagne hikolokoloagne ty fo’e.

Rehafe ty manam-pahaiagne miomba o ajajao fa ty ajaja valo volagne, le fa mahay mamantatse ty feo mampiambake ty firehan-draza’e, manomboke mifankahazo am-po amy ty rae aman-drene’e, mahay mampiasa ty maso’e, ty oro’e naho ty maro hafa. Manomboke mahay mamantatse ty magnodidigne aze ka reke. Amy i reke mbe kedekedey areke ty tena soa anombohagne ikolokoloagne ty fo’e. Hahazo tombo’e ty ana’o naho ‘mahafantatse ty Soratse Masigne amy i reke mbe kedekedey’, manahake i Timoty!—2 Timoty 3:15. *

Mangala tahake o rae aman-dreneo avao o anak’ajajao. Magneregne feo naho rehake vaho fihetseke i ajajay faie ianara’e ka ty atao tihoe hatea, hasoa fagnahy, fitretrézagne naho fa trea’e maneho o toetse rehoe ty rae aman-drene’e. Tsy maintsy asehontikagne hey tie am-pontikagne ao ty lilin’Andrianagnahare naho teantikagne ty hampiofagne ty anantikagne arake ty lily i Jehovah. Naho mankasitrake ty lalà’e tika, le hirehake tsy tapake ty miomba i Jehovah naho ty Saontsi’e amy ty anantikagne. Hoe ty Baiboly: ‘Rehafo ama’e zay ndra tie mitoboke an-tragno ao rehe ndra mandeha an-dalagne ey ndra mandre ndra mifoha.’ (Deoteronomia 6:6, 7) Hoe izao ty atao i Francisco naho i Rosa mba hampihara iareo io amy ty ana iareo kedekede roe. *

“Ankoatse ty firehafagne anoe’ay isan’andro, le mbe mikezake ka zahay mirehake amy ty tsikiraidraike amy iareo agnate ty 15 minitra fara fahakede’e isan’andro. Naho fa trea’ay tie, managne raha manahiragne iareo, le mandany fotoagne maromaro zahay, le trea’ay i raha manahiragne azey. Ohatse: Mbe tsy ela zay i ana’ay dime taogney niavy boake am-pianaragne agne, le nirehake reke tie tsy mino i Jehovah. Fanta’ay fa nisy mpiara-mianatse tama’e nitsikike aze sady nirehake fa tsy misy ty Andrianagnahare.”

Fanta o rae aman-drene rehoe fa mila mampitombo ty finoa’e i Mpamorogne azey o ajajao. Azo atao zay satria tea o ajajao ty raha niforognen’Andrianagnahare. Tea iareo ohatse ty mitsapa o bibio, mandrofotse o folerao, ndra mihisa amo o fasekeo eo. Azo ty rae aman-drene atao tie amy izay ty magnampe ty ana’e hahatakatse fa tsy maintsy misy i Mpamorogney kanao nisy o raha reo. (Salamo 100:3; 104:24, 25) Va’e hanjare hankasitrake naho hagnaja ty raha finoro i Jehovah o ajajao, naho fa mianatse. (Salamo 111:2, 10) Va’e hampitombo ty fagniria’e hampifale an’Andrianagnahare naho hatahotse kera tsy hampifale aze zay sady ‘hagnalavira’e ty raha raty.’—Ohabolana 16:6.

Faie va’e tsy hankatò ty ankamaroa o ajajao ndra tie liagne te hahafanta-draha naho mahira-tsaigne aza. (Salamo 51:5) Va’e hanao ty hahazoa’e ty raha tea’e reke kindraike. Toko’e ho hentetse naho hanam-paharetagne sady hahay hifehe ty rae aman-drene mba tsy hioregne an-tsai’e ao ty raha hoe izay. (Efesianina 6:4) Izay ty raha niaigna i Phyllis naho i Paul, nahavita niteza soa ty ana’e dime.

Hoe ty Phyllis: “Tsy nitovy toetse iareo dime, faie sambe te hanao ze tea’e iaby. Sarotse zay faie nianatse nagneke iareo tamy ty fara’e.” Hoe ka ty Paul: “Mateteke hazavae’ay ty anto i fanapahan-kevetse rey naho fa beibey i ajaja rey. Nikezake ho soa fagnahy avao zahay faie nampianare’ay hagnaja ty fahefagne nimein’Andrianagnahare anay avao ka iareo.”

Ndra tie va’e ho sarotse aza ty miteza anak’ajaja, le tena sarotse mandikoatse izay ty miteza o tanorao satria mbe tsy matotse iareo sady maro ka ty tsapa hevetse mahazo aze.

Anò ty Hanohinagne ty Fo o Tanorao

Tsy maintsy manomboke i asa’ey o mpamboatse tanelietseo amy i tanelietsey mbe tsy maikey. Legna’e rano varagne i rahay naho tea’e ty hahavy aze ho mandomando avao sady ho mora volavolaegne. Hoe izay ka o rae aman-dreneo. Tsy maintsy mikezake mafe iareo mba tsy hagnamafe ty fo ty ana’e mbe tanora. Mazava ho aze fa ty Baiboly ro fitaovagne lahibey mba ‘handresea’e lahatse, hagnitsia’e ze diso, hanoa’e ze hahavagnogne i ana’ey amy ze asa soa iaby.’—2 Timoty 3:15-17.

Va’e tsy le avy le hagneke ty toro hevetse mea ty rae aman-drene’e mitovy tamy i reke mbe nikedey o tanorao. Va’e ho ty nama’e ro tsanogna’e, le va’e hihegne ty fifampirehafa iareo amy ty rae aman-drene’e. Ilaegne areke ty manam-paharetagne naho mahira-tsaigne amy izay satria miova hafa ty raha iaigna i tanoray. Tsy maintsy mizatse amy ty fiovagne ara-batagne naho ara-pihetseham-po o tanorao. Tsy maintsy manomboke manapa-kevetse sady mametrake tanjogne amy ty fiaigna’e. (2 Timoty 2:22) Hoe hery hanimba ty fo’e ty fanerea ty nama’e, sady tsy maintsy miatreke o fotoan-tsarotse iohoe reke.

Tsy miseho in-draike avao o fanereagne iohoe fa va’e ho mateteke sady ho maromaro hanimba tsikedetsikede i tanoray. Va’e hatahotse ty tanora maro kera ndra ho heje ty nama’e. Sady te hivibìke o tanorao ro te hinamagne soa amy ty nama’e, le va’e hanomboke hankasitrake ‘ty raha amy ty tontolo toy eto’ manahake i nama’e rey.—1 Jaona 2:15-17; Romanina 12:2.

Mbe eo ka i fagniriagne voajagnahare naho ty fo tsy voririkey, va’e hahasarotse ty fanerea ty namagne. Va’e hahasarike ty fandrisihagne tihoe toy: ‘Sambe manoa ze hahafale ty fo’e sady anò ze tea’o hatao.’ Hoe ty María: “Nisy namako nino fa azo o tanorao atao ze mahafinaritse aze ndra inogn’ino voka’e sady nagnorike izay ka raho. Fa ho niazon-doza raho satria te hagnorike ty natao i mpiara-mianatse amako rey avao.” Ndra rae rehe ndra rene, le tea’o ty hagnampe ty ana’o mbe tanora handrese ty fitaonagne hoe izay. Ino areke ty azo’o atao?

Meo toky lognandro reke sady manoa raha mba hinoa’e tie te hagnampe aze rehe. Mikezaha hahafantatse ty fihetseham-po’e naho hahatakatse ty raha manahiragne aze, va’e ho sarotse noho ty raha trea’o tamy i rehe mbe nianatsey. Toko’e ho trea ty ana’o amo o fotoagne iohoe, fa i rehe ty azo’e amorahagne ty tsiambaratelo’e. (Ohabolana 20:5) Va’e ho tsikari’o amy ty fihetse’e ndra ty toe-peo’e fa malahelo reke ndra tsy trea’e ty hatao. Ampeo reke ndra tie tsy mirehake aza, le ‘ampifaleo ty fo’e.’—Kolosianina 2:2.

Maregne aloha fa tena ilaegne ty magnorike ty maregne lognandro. Faie misy fotoagne o rae aman-dreneo mifanointoigne amy ty ana’e, tsy milefetse iareo naho fa marem-pototse ty fanapahan-keve’e. Anò azo antoke areke fa taka’o soa ty raha iaigna ty ana’o. Amy izay ho taka’o soa tie hampihatse fandilovagne aman-katea sa tsy hampihatse sady akore ty hanoa’o izay.—Ohabolana 18:13.

Ndra tie amo o Fiangonagneo eo aza

Le hoe vita soa ty fitaovagne tanelietse raike, faie va’e tsy hahatante naho isiagne ranon-draha ty agnate’e ao, naho mbe tsy noroagne. Ampitovize ty Baiboly amo o fagnoroagne aze iohoe ty fisedragne naho ty fahasahiragnagne satria mampibaribary ty tena toetsentikagne rey. Ty fisedragne ty finoantikagne ty tena rehafe ty Baiboly, faie azo ampiharegne amy ty afo hafa ka i afo fagnoroagney. (Jakoba 1:2-4) Mahagaga fa va’e ho amo o fiangonagneo eo avao ty hiboaha ty fisedragne ila’e atrehe o tanorao.

Henteagne hoe matanjake ara-pagnahy ty ana’o amy i reke mbe tanoray, faie va’e mialy mafe amy ty fo’e voazarazara reke. (1 Mpanjaka 18:21) I Megan, ohatse nahatrea ty toe-tsay ty tontolo toy tamy ty tanora tamy i Anjomba i Fanjakagney ao:

“Misy tanora tsy ampe nihevetse fa mahakamo sady tsy mienga mba hahatreavagne fahafinaretagne ty fomba fiaignagne Kristiana, le nanjare nitovy hevetse tamy iareo ka raho. Izao ohatse ty nirehafe iareo: ‘Hiala amy ty hamarenagne raho naho fa feno 18 taogne’, ndra tihoe: ‘Tsy ligneko ty hialako ty hamarenagne.’ Tsy niarake tamy ty ajaja tsy nitovy hevetse tama’e iareo sady natao iareo tihoe masigne loatse rey.”

Ajaja raty saigne raike ndra roe avao, le fa hitarike ze ajaja ao iaby. Mateteke magnorike ty maro avao ty ajaja ila’e. Ze marengerenge naho ze mahavanivany manao ty raty ka ro va’e hahavoatarike ty hendre naho ze mahira-tsaigne. Mampalahelo fa niazon-doza ty tanora kristiana ila’e tamy ty tane maro satria nagnorike ty maro avao.

Maregne fa mila namagne hiarake hifale ama’e o tanorao. Ino ty azo ty rae ndra ty rene atao amy izay? Eretsereto soa ty fihisagne tea iareo sady magnomana raha mahaliagne azo ty keleiagne atao, ndra azo ty tanora naho ty ndaty bey iharoagne. Fantaro ty nama ty ana’o. Asao iareo hiarake hihinagne ndra hiarake ama’areo kindraike. (Romanina 12:13) Risiho ty nama’o hanao raha mahasoa, ohatse, mititike raha magneno, ndra mianatse firehake hafa, ndra mianatse asa. Va’e ho azo’o atao an-tragno ao avao ty ankamaroa o raha rehoe.

Miaro o Tanorao ty Fandehanagne Mianatse

Hagnampe o tanorao hanahatsahatse ty fihisagne atao’e ty fandehanagne mianatse. Hoe ty Loli, talé ty lakilasy bey raike tagnate ty 20 taogne: “Maro ty tanora Vavolombelo i Jehovah nianatse teto. Nanagne findesan-tegna soa ty ankamaroa’e, faie manahake o mpianatse hafao avao ty ila’e ama’e. I mpianatse fagneva ty ho tahafegne rey, le tena liagne tamy ty fianaragne natao’e. Mandrisike ty rae aman-drene raho mba hazoto hagnara-maso ty ana’e, hamantatse ty mpampianatse aze, sady handrese lahatse ty ana’e fa tena ilaegne ty mianatse soa. Misy amy iareo ty tena mahay faie tsy ie iaby ro haharake soa, le ho hajae o mpampianatseo.”

Hagnampe o tanorao handroso ara-pagnahy ka ty fianara’e hoe izay satria mampianatse aze ho zatse mianatse soa, hifehe ty sai’e sady hahatsapa fa managne andraikitse reke. Hazoto hianatse naho hampianatse ty Saontsin’Andrianagnahare ka reke naho mamaky teny soa sady mahazo ze vakie’e. (Nehemia 8:8) Hagnampe aze hanahatsahatse ty fihisagne atao’e ka ty devoara’e naho ty fianaragne Baiboly tsy maintsy atao’e.

Voninahitse ho Azo Naho ho ahy i Jehovah

Nisy ty sonia i mpamboatse tanelietsey naho i aze nanokitse azey ty ankamaroa ty vazy ta Gresy agne tie taloha. Ndaty roe ka mateteke ty mandrambe anjara amy ty fikolokoloagne o ajajao. Sambe mandrambe anjara amy ty fikolokoloagne ty fo o anakeo inareo rae naho rene, le azo rehafegne tie misy ty “sonia’areo” mirovaly ty ana’areo. Manahake i mpamboatse tanelietsey naho i mpanokitse azey nareo, le afake mirehareha amy ty asa fikolokoloagne natao’areo tamy ty tanora sarobily naho magneva.—Ohabolana 23:24, 25.

Miankigne amy ty kezake natao’areo mba hikolokoloagne ty fo ty ana’areo ty vokatse ho azo’areo amo o asa tena lahibey iohoe. Azo antoke fa hirehake hoe izao nareo: “Ty lalàn’Andrianagnahare’e ro am-po’e ao, le tsy hiala amy i lalagne mahitsỳ eo reke. (Salamo 37:31) Tsy soa fa atao avao ty mamolake ty fo o ajajao fa tena lahibey.

[Fagnamarehagne ambane peje]