1. Ino ty nafoe i Adama naho i Eva, sady ino ty voka’e?

 NAHO ty heve’o, ia ty toko’e hamaritse tie ino ty soa sady ino ty raty? Naho fa nihinagne tamy i hatae fahafantaragne ty soa naho ty ratỳ ty Adama naho i Eva, le tena mazava ty tea iareo haseho. Natoro iareo tie tsy matoky i Jehovah naho ty fitsipi’e iareo mirovaly, fa iareo avao ty hanapa-kevetse tie ino ty soa sady ino ty raty. (Gen. 3:22) Faie eretsereto ty raha nafoe iareo. Tsy nama i Jehovah sasa iareo mirovaly. Ty voka izay, le tsy afake miaigne nainai’e sasa iareo sady nanjare mpanota ty ana’e le tsy maintsy mate. (Rom. 5:12) Nampalahelo ty voka ty safidy iareo.

2-3. a) Ino ty natao i tandapa etiopianay naho fa nitory tama’e ty Filipo? b) Ino ty fitahiagne ho azo ze atao badisa, sady inogne iaby ty fagnonteneagne hovaleagne ato?

² Tsy mitovy amy ty raha natao i Adama naho i Eva ty natao i tandapa etiopiana nitoria i Filipo igne. Tena nankasitrake ty raha natao i Jehovah naho i Jesosy ho aze i tandapay, le avy le natao badisa. (Asa. 8:34-38) Naho fa manokan-tegna ho an’Andrianagnahare ka tikagne sady atao badisa manahake i tandapay, le mazava ty teantikagne haseho. Asehontikagne tie mankasitrake ty raha natao i Jehovah naho i Jesosy ho antikagne tika. Asehontikagne ka tie matoky i Jehovah tika, sady magneke fa i reke ro toko’e hamaritse tie ino ty atao tihoe soa sady ino ty atao tihoe raty.

³ Mba eretsereto moa ty fitahiagne azo ty mpanompo i Jehovah! Homea i Jehovah antikagne ze raha nafoe i Adama naho i Eva, ohatse ho afake hiaigne nainai’e tikagne. Mino i Jesosy Kristy tikagne, le enga i Jehovah ty hadisoantikagne sady mea’e feo ty fieretseretagne malio tikagne. (Mat. 20:28; Asa. 10:43) Manjare keleia i Jehovah ka tikagne sady ankasitraha’e, vaho le tena fanjaka ka ty hoavy mandigne antikagne. (Jaona 10:14-16; Rom. 8:20, 21) Faie tsy mahavany manao manahake ty natao i tandapa etiopianay ty ndaty ila’e mahafantatse i Jehovah, ndra tie eo aza o fitahiagne reo. Ino ty va’e hikalagne iareo tsy hatao badisa? Sady ino ty azo iareo atao mba handreseagne ze olagne zay?

4-5. Nagnino ty Avery naho i Hannah ro natahotse ty hatao badisa?

⁴ Tsy matoky tegna. Vavolombelo i Jehovah ty rae aman-drene i Avery. Soa laza ty baba’e satria mikarakara soa ty keleia’e sady androanavi-pagnahy mahay. Faie tsy te hatao badisa ty Avery. Izao ty nirehafe’e: “Nieretseretse raho tie tsy ombia hahavita ty vita i Baba.” Natahotse ka reke kera tsy hahavita ty andraikitse meagne aze afarafara agne. Hoe indraike reke: “Nampatahotse ahy i tihoey ampanoegne vavake hoahy ty ndaty maro, ndra manao lahajaka, ndra mitarike mpitory amy i faritaney ey.”

⁵ Tena tsy natoky tegna ty somondrara raike 18 taogne atao tihoe Hannah. Mpanompo i Jehovah ty rae aman-drene’e, faie nieretseretse reke tie tsy ho vita’e ty hankatò ty fitsipy i Jehovah. Nihevetse ty tegna’e ho tsy misy dika’e reke. Kindraike ka reke tena nalahelo le nisatry raha nandratse ty vata’e, faie vao mainke nahakivy aze zay. Hoe reke: “Tena tsy mba nambarambarako ndra amy ia ndra amy ia i raha nataokoy, ndra tamy i Baba naho i Nene aza. Nieretseretse ka raho tie tsy tea i Jehovah hanompo aze satria iraho aza mandratse ty tegnako.”

6. Ino ty nikalagne i Vanessa tsy hatao badisa?

⁶ Naman-draty. Hoe ty Vanessa, 22 taogne: “Fa ho folo taogne zahay amy ze somondrara zay ty fa nimpinamagne bey.” Faie nalahelo ty Vanessa satria tsy nandrisike aze hagnatratse i tanjo’e hatao badisay o nama’e iohoe. Hoe reke: “Tsy le mora mahazo namagne raho, le nanjare natahotse kera tsy hahatrea namagne sasa naho tsy minamagne ama’e.”

7. Ino ty natahora ty somondrara raike atao tihoe Makayla, sady ino ty anto’e?

⁷ Matahotse kera hanao hadisoagne. Mbe dime taogne ty Makayla tamy i rahalahi’ey nivoaroake. Naho fa nibey reke, le trea’e tie tena nalahelo i rae aman-drene’e rey noho ty raha natao i zoke’e. Hoe reke: “Natahotse raho tie kera hanao fahadisoagne naho hatao badisa, le ho voaroake. Vao mainke halahelo ty Baba naho i Nene naho izay ty miseho.”

8. Ino ty natahora i Miles?

⁸ Matahotse fagnenjehagne. Manompo i Jehovah ty baba i Miles naho i akarene’ey, fa i rene’e tsy Vavolombelogne. Izao ty nitantarae i Miles: “Niara-nipetrake tamy i rene’ay raho tagnate ty 18 taogne. Tsy nahavany nirehake tama’e raho tie te hatao badisa. Nitreako soa ty raha natao’e naho fa nanjare Vavolombelo i Jehovah ty Baba. Natahotse raho kera hampijalé’e.”

9. Ino ty raha azo antoke fa hiseho naho fa tsapa’o tie manam-paharetagne naho bey hatea ty Jehovah?

⁹ Nifily ty tsy hanompo i Jehovah ty Adama naho i Eva satria tsy tena tea aze. Faie tsy le avy le nivonoe i Jehovah iareo, fa nenga’e hiterake naho hanapa-kevetse tie akore ty hiteza iareo ty ana iareo. Trea tie tsy nisaigne soa iareo, naho fa henteagne ty voka ty safidy natao iareo. Nivonoe i talén’ana iareoy ty zai’e, sady nanjare mpanjaka ty hampiarotegne naho tea tegna reke naho fa tafara toy. (Gen. 4:8; 6:11-13) Faie te hanompo i Jehovah ty ila’e amy ty tarana i Adama naho i Eva, le nanao raha ty Jehovah mba hamonjeagne iareo. (Jaona 6:38-40, 57, 58) Azo antoke fa hitombo ty hatea’o i Jehovah, arakarake ty hahatsapa’o fa manam-paharetagne naho bey hatea reke. Izay ty handrisike azo hanokan-tegna ho aze fa tsy hanao manahake ty natao i Adama naho i Eva.

10. Nagnino ro hagnampe azo hanompo i Jehovah ty misaintsaigne ty Salamo 19:7?

¹⁰ Mianara ty miomba i Jehovah lognandro. Naho fa mihamahafantatse i Jehovah rehe, le vao mainke hatoky tie ho vita’o ty hanompo aze. Hoe ty Avery, i nirehafegne taloha teoy: “Nanjare natoky tegna raho naho fa nikaroke ty miomba ty Salamo 19:7 sady nisaintsaigne i fagnomezan-toky rehafegne aoy.” (Vakio.) Vao mainke tea i Jehovah ty Avery naho fa trea’e tie magnatanterake o saontsi’e iohoe reke. Naho fa tea i Jehovah areke ty ndaty raike, le manjare matoky tegna. Izay ka ty hagnampe azo hanao ze raha tea i Jehovah avao. Izao ty nirehafe i Hannah, i nirehafegne taloha teoy: “Mamaky naho mianatse Baiboly am-batako raho, le treako tie mandratse ty arofo i Jehovah naho fa mandratse ty vatako.” (1 Pet. 5:7) Manjare “mpankatò ty saontsin’Andrianagnahare’ ty Hannah. (Jak. 1:22) Ino ty voka’e? Hoe reke: “Nandrambe soa raho isake tie nankatò i Jehovah, le manjare tena teako reke. Matoky raho hinane zao tie eo avao ty Jehovah naho fa mipay fagnampeagne raho.” Vita i Hannah ty nifehe tegna mba tsy handratse ty vata’e sasa. Nanokan-tegna hoahy i Jehovah reke sady natao badisa.

11. Ino ty natao i Vanessa mba hahazoagne namagne, sady ino ty azontikagne ianaragne boake amy izay?

¹¹ Mahaia mifily namagne. Nitsapa i Vanessa, i nirehafegne teoy fa i nama’ey ty nikalagne aze tsy hanompo i Jehovah. Tsy ninamagne tama’e sasa areke reke. Faie nisy raha hafa ka natao’e. Nikezake mafe reke mba hahazo namagne am-pivoriagne ao. Nirehake reke fa nagnampe aze ty ohatse nenga i Noa naho ty keleia’e. Hoe reke: “Tsy tea i Jehovah iaby ty ndaty magnodidigne iareo, le iareo keleian-draike avao ty mpinamagne.” Natao badisa ty Vanessa, sady nanao mpisava lalagne. Nirehake reke fa izay ty nagnampe aze hahazo namagne tamy i fiangona’ey tao naho tamy ty fiangonagne hafa. Hahazo namagne soa ka rehe naho manao fanompoagne maro arake ze azo’o atao.​—Mat. 24:14.

12. Ino ty tsy natahora i Adama naho i Eva, sady ino ty voka’e?

¹² Matahora i Jehovah. Toko’e hatahotse tikagne kera hanao raha mahavignetse i Jehovah. (Sal. 111:10) Naho natahotse izay ty Adama naho i Eva, le tsy ho nigoreve tamy i Jehovah. Faie nigoreve iareo. Nibeake ty maso iareo mirovaly, ty dika izay fanta’e soa fa nanjare mpanota iareo. Tsy maintsy ho mpanota naho ho mate areke ty ana’e. Megnatse iareo le nagnamboatse sikigne satria nanjare nitrea iareo fa niboridagne iareo.​—Gen. 3:7, 21.

13-14. a) Naho henteagne ty 1 Petera 3:21, nagnino tikagne ro tsy toko’e hatahotse loatse ty ho mate? b) Inogne iaby ty anto’e toko’e hiteavantikagne i Jehovah?

¹³ Toko’e hatahotse tikagne kera hanao raha mahavignetse i Jehovah. Faie ino ty raha tsy toko’e hatahorantikagne? Tsy toko’e hatahotse loatse ty ho mate tikagne, satria fa nanao raha ty Jehovah mba hahafahantikagne miaigne nainai’e. Naho manota tikagne faie mibebake, le hamela ty hadisoantikagne reke satria tikagne mino i solovoigne natao i Ana’eỳ. Asehontikagne tie mino o sorogne iohoe tika naho manokagne ty fiaignantikagne hoan’Andrianagnahare sady atao badisa.​—Vakio ty 1 Petera 3:21.

¹⁴ Maro ty anto’e toko’e hiteavantikagne i Jehovah. Boake ama’e ze raha soa ankamamientikagne isan’andro. Mampianatse antikagne ty maregne miomba aze naho ty raha safirie’e reke. (Jaona 8:31, 32) Mampiasa o fiangonagneo reke mba hanohagnagne naho hitarihagne antikagne. Ampea’e hiaretse o olagneo tikagne tie amy izao, sady hatao’e tena fanjaka ty fiaignagne amy ty hoavy vaho henga’e hiaigne nainai’e tikagne. (Sal. 68:19; Apok. 21:3, 4) Maro ty raha natao i Jehovah mba hampisehoagne tie tea’e tikagne. Naho fa misaintsaigne irey tikagne, le hanjare tea aze. Naho fa tea aze ka tikagne, le hanjare matahotse kera hanao raha mampalahelo aze.

15. Nagnino ty Makayla ro tsy natahotse sasa?

¹⁵ Tsy natahotse sasa ty Makayla, i nirehafegne taloha teoy tie kera hanao fahadisoagne. Ty anto’e, nanjare nifanta’e tie tena mamela heloke ty Jehovah. Hoe reke: “Nitakako tie sambe tsy voririke iaby tikagne le manao fahadisoagne. Faie tea antikagne ty Jehovah le vognogne hamela heloke reke noho i solovoigney.” Nanokan-tegna ty Makayla le natao badisa noho ty hatea’e i Jehovah.

16. Ino ty nagnampe i Miles tsy hatahotse an-drene’e?

¹⁶ Nangatake fagnampeagne tamy ty mpiandraikitse faritse ty Miles, i natahotse kera hampijalé i rene’e naho hatao badisay. Hoe reke: “Ty baba’e avao ka ty Vavolombelo i Jehovah. Nampea’e raho mba hieretseretse ze azoko rehafegne amy i rene’ay mba hahavy aze hagneke fa iraho ro tena tapa-kevetse ty hatao badisa fa tsy tihoe nirisihe i baba’ay.” Niboseke vata’e ty rene’e. Tsy maintsy niala boake amy ry rene’e ao reke naho fa tafara tatoy, faie tsy nampiova hevetse aze zay. Izao ty nirehafe’e: “Manao raha maro ho ahy ty Jehovah. Nanohigne ty foko ty nahafantatse izay. Naho fa nisaintsaigne ty solovoigne natao i Jesosy raho, le treako fa tena tea ahy ty Jehovah. Izay ty nahavy ahy hanokan-tegna naho hatao badisa.”

17. Ino ty azontikagne porofoegne?

¹⁷ Nigoreve tamy i Jehovah Baba’e ty Eva naho fa nihinagne tamy i voan-katae tamy i Edena aoy. Nihinagne tama’e ka ty Adama. Aseho izay fa tena tsy nidarea iareo ze raha natao i Jehovah ho aze. Faie afake magnaporofo tikagne iaby fa tsy manahake i Adama naho i Eva tikagne, fa mankasitrake ze raha atao i Jehovah ho antikagne. Naho fa atao badisa tika, le mampiseho amy i Jehovah tie ekentikagne fa ireke avao ro toko’e hamaritse ty soa naho ty atao tihoe raty ho antikagne.

18. Ino ty toko’e hatao’o naho te hahavita hanompo i Jehovah avao rehe?

¹⁸ Naho fa vita badisa tikagne, le mila mikezake mba hanao ze raha tea i Jehovah avao fa tsy ze teantikagne. Mpanompon’Andrianagnahare an-tapetrisa’e ro mikezake manao izay. Ho vita’o zay naho ohatse mandineke ty Saontsin’Andrianagnahare amy ty pitsopitso’e rehe sady miarake amy ty mpiara-manompo avao vaho mazoto mirehake ty miomba i Baba’o bey hateay. (Heb. 10:24, 25) Rambeso lognandro ty torohevetse mey i Jehovah amy ty alala ty Saontsi’e naho ty fandamina’e, isake tie hanapa-kevetse rehe. (Isaia 30:21) Ho mete iaby ze raha atao’o amy izay.​—Ohab. 16:3, 20.

19. Ino ty raha toko’e ho ekentikagne? Ino ty ho voka izay?

¹⁹ Vao mainke ho tea i Jehovah naho ty fitsipi’e rehe naho magneke tie mahasoa avao ty tari-dala’e. Naho magneke izay rehe, le tsy ho voatarike hiala amy i Jehovah, ndra ino ndra ino ty atolo i Satana azo. Eretsereto tie tapa-kevetse ty hatao badisa rehe tie amy izao, sady misaintsaigne zay naho fa afake arivo taogne. Tena ho fale rehe amy izay tie igne ty fanapahan-kevetse tsy misy hoe’e natao’o!