“Mampahafantatse ty Tahinan’Andriangnahare”

“Fa nampahafantareko ty ndaty natolo’o ahy amy ty tontolo toy ty tahina’o. Azo iareo sady fa natolo’o ahy, sady niambegne ty saontsi’o iareo. Fa nampahafantareko iareo ty tahina’o, sady mbe hampahafantareko avao ka.”​—JAONA 17:6, 26.

Ino ty Dika Izay? Te hampahafantatse ty tahinan’Andrianagnahare ty Jesosy, le io ty nampiasae’e naho fa nitory. Tsy maintsy nanognogne ty tahinan’Andrianagnahare ka reke naho fa namaky ty Soratse Masigne. (Lioka 4:16-21) Nampianare’e hivavake hoe izao aza ze mpanonjohy ty lia’e: “O Baba, hohamasinegne abey ty tahina’o!​—Lioka 11:2.

Nanao Izay vao i Kristiana Voaloha’e Rey? Nirehake tamo o androanavi-pagnahy ta Jerosalema agneo ty apostoly Petera fa nangalake ndaty hinday ty tahina’e ty Andrianagnahare, le ireo ty nampahafantatse ty tahina’e. (Asan’ny Apostoly 15:14) Nitory tihoe ka i apostoly rey naho ty nama’e: “Ze mikanjy ty tahina i Jehovah ro hovonjegne.” (Asan’ny Apostoly 2:21; Romanina 10:13) Nampiasa ty tahinan’Andrianagnahare tamy i boke nisorate iareoy ao ka iareo. Nagnaporofo izay ohatse ty Tôsefta i fitambara-dalàna o jiosio nivita tamy ty taogne 300 tagne ho agney. Izao ty rehafegne ao: ‘Noroa o mpanohetseo ty boke ty mpitory o filazantsarao naho ty boke i minim [ndra kristiana jiosy], i aze nisy ty tahinan’Andrianganaharey.’

Ia ty Magnorike ty Reha i Jesosy ty amy Hinane Zao? Mirehake ty tahinan’Andrianagnahare ty Dikan-teny Iombonana Eto Madagasikara amy ty fagnamarehagne ambane peje amy Eksodosy 3:15 ao. Izao ty rehafegne ao: “Nanomboka tamin’ny taonjato faha-4 tal J.K. ny Jiosy no nizatra tsy nanonona io anarana io intsony (mba tsy hanonontononana azy foana, jereo 20.7), fa nanao hoe ny TOMPO matetika, na nanolo azy tamin’ny fomba fiteny hafa toy ny hoe Ny Lanitra, ny Anarana, ny Voninahitra ets. Koa rehefa misy anarana hoe YHWH ny rijan-teny hebreo masôretika, dia ny TOMPO no nandikana azy ato amin’ity DIEM ity.” Mbe tsy ela ka ohatse ty Vatikana ro nirehake tamy ty Eveka katolika tie ‘tsy toko’e hampiasaegne ty tahinan’Andriangnahare tihoe Iaveh [ndra Jehovah] * naho fa mihira ndra mivavake.’

Ia areke ty mampiasa naho mampahafantatse o tahinan’Andrianagnahare iohoe ty amy izao? Mipetrake a Kirghizistan ty Sergey. Tamy ireke ni-15 taogne ty nahafantatse voaloha’e tie i Jehovah ty tahinan’Andrianagnahare. Sendra nirei’e tamo o filmao ze raha zay. Faie tsy naharey ndaty nampiasa o tahinagne io sasa reke tagnate ty 10 taogne teo ho eo. Nifindra ta Etazonia agne reke naho fa tafara tatoy. Nisy Vavolombelo i Jehovah nitory ty tan-tragno’e teo, le nanoro aze i tahinan’Andrianagnaharey amy Baiboly ao. Tena nifale reke satria kay nisy nampiasa avao tihoe Jehovah. Mahaliagne ka fa izao ty andikà ty diksionera Webster (angilé) tihoe Jehovah Andrianagnahare: “I Andrianagnahare fara’e ambone eké o Vavolombelo i Jehovah-o naho ivavaha’ey.”

[Fagnamarehagne ambane peje]