“Mifankatea”

“Meako lily vaovao nareo, le ty mba hifankateava’areo. Manahake ty niteavako anareo ro toko’e mba hifankateava’areo ka. Naho mifankatea nareo, le izay ty hahafantara ze kila ndaty fa mpianako nareo.”​—JAONA 13:34, 35.

Ino ty Dika Izay? Nirehake tamy ze mpanonjohy aze ty Jesosy mba hifankatea manahake ty niteava’e iareo. Tena tea iareo vata’e ty Jesosy, satria tsy nagnavakavake sady tsy nagnavakavake o ampelao ndra tie nanao izay aza ty ndaty tamy izay. (Jaona 4:7-10) Tsy nanao ze hampiadagne ty fiaiagna’e ka reke fa nahafoe ty fotoa’e naho ty heri’e mba hagnampeagne iareo. (Marka 6:30-34) Nagnomey ty ai’e aza ty Jesosy satria hoe reke: “Izaho ro mpiarake fanjaka. Ty mpiarake fanjaka mahafoe ty fiai’e hoahy o agnondrio.”​—Jaona 10:11.

Nanao Izay vao i Kristiana Voaloha’e Rey? Nifampitoka tihoe ‘rahalahy’ naho ‘rahavave’ iareo. (Filemona 1, 2) Nirambese iareo soa ka ze ndaty te ho agnisa ty fiangonagne Kristiana ndra inogn’ino ty fiavia’e. Nino zao ohatse iareo fa, “tsy misy maha sambe hafa ty jiosy naho ty grika, satria raike avao ty Tompo ambone iareo iaby.” (Romanina 10:11, 12) “Nivarotse ty tane’e naho ty fanagna’e” ka i mpiana i Jesosy ta Jerosalema agne rey tafara ty Pentekosta taogne 33, le ‘nizarae’e’ tamy ze vaho nivita badisa ty ‘vola niazo’e’ tama’e. Amy izay, afake nijanogne a Jerosalema agne o Kristiana vaovao rehoe mba ‘hifantoke amy ty fampianara i apostoly rey.’ (Asan’ny Apostoly 2:41-45) Roanjato taogne latsake tafara ty nimateza i apostoly rey, le nirehake ty Tertullien fa nitrea o ndatio tie ‘tena nifankatea o Kristianao sady vognogne ho mate hoahy ty nama’e aza.’

Ia ty Magnorike ty Rehe i Jesosy ty amy Hinane Zao? Hoe ty Edward Gibbon tamy ty boke raike ao: “Fa an-tao’e maro o ndaty mirehake tie Kristianao ro nampinjale ty Kristiana nama’e sady mbe mihoatse ty raha natao ty ndaty [tsy mpino] tamy izay aza ty raha natao’e.” Trea amy ty fandinehagne mbe tsy ela natao ta Etazonia agne ka fa mbe maro ty ndaty magnavakavake, lohotsie fa o Kristianao. Tsikaritse ka fa tsy mifandrambe amy ty mpivavake amy ty faritse raike ao ty mpivavake amy ty faritse hafa agne ndra tie mitovy fivavahagne aza iareo. Tsy afake mifagnampe ndra tsy te hifagnampe iareo naho fa misy olagne.

Ia areke ty fivavahagne tena mifankatea amy izao? Dineho ty raha natao o Vavolombelo i Jehovah-o. Nisy tio bey efatse ty ta Floride tagne tagnate ty roe volagne, tamy 2004. Nagnara-maso ty fizaràgne i fagnampeagney ty lahibey ty Komity ty Mpamonje ze Zoem-boigne, le nitrea’e tie tena hafa o Vavolombelo i Jehovah-o satria voalamigne soa. Nirehake areke reke fa afake nagnomey ze raha nilae i Vavolombelogne rey naho nipay fagnampeagne iareo. Nisy Vavolombelo i Jehovah nizoem-boigne ka tamy ty Repoblika Demokratika i Kongo agne tamy 1997. Nisy Vavolombelo i Jehovah tsy ampeampe agnisa ty ekipa mpagnampe ze nizoem-boigne le avy le nandeha agne. Ninday fagnampeagne boake amy ty Vavolombelo i Jehovah boake a Eropa agne iareo sady eo amy ty 2 000 tapetrisa ariary eo ho eo i fagnampeagney. Ninday fagnafoly naho hanegne vaho akanjo hoahy ty mpiharo finoagne tama’e naho hoahy ty ndaty hafa iareo.