“Mitory ty Talily Soa i Fanjakagney”

“Le hotoriegne magneran-tane ty talily soa i Fanjakagney toy, ho vavolombelogne amy ty firenena iaby, vaho izay ho avy ty fara’e.”​—MATIO 24:14.

Ino ty Dika Izay? Nirehake ty Lioka mpanoratse Filazantsara fa “nitsoeke tanàgne naho vohitse ty Jesosy, le nitory i talily soa i fanjakàn’Andrianagnahareỳ.” (Lioka 8:1) Ndra i Jesosy aza nirehake tie: “Tsy maintsy mitory ty talily soa i fanjakàn’Andrianagnaharey amy ty tanàgne hafa ka raho, fa izay ty nagnirahagne ahy.” (Lioka 4:43) Nampitsoehe’e tanàgne ka i mpiana’e rey mba hitory i talily soay. Hoe reke: “Hahazo hery nareo naho fa avy ama’areo i fagnahy masigney, le ho vavolombeloko a Jerosalema naho a Jodia vaho a Samaria agne, sady amy ty faritse fara’e lavitse amy ty tane toy iaby nareo.”​—Asan’ny Apostoly 1:8; Lioka 10:1.

Nanao Izay vao i Kristiana Voaloha’e Rey? Le avy le nagnorike ty reha i Jesosy iareo. “Tsy nitofa iareo fa nitologne ty fampagnanaragne naho nitsey ty talily soa miomba i Kristy Jesosy ndra tamy i tempolin’Andrianagnaharey ao ndra tamy ze anjomba o ndaty.” (Asan’ny Apostoly 5:42) Hoe ty Neander, mpahay tantara: ‘Nitsikike aza ty Celse, mpanoratse boke nagnaratiraty o Kristianao. Nazoto nitory i talily soay iareo ndra mpanjaitse volon’agnondry io ndra mpamboatse kiraro ndra mpamboatse holitse ndra ty ndaty fara izay ty tsotra aza ndra tsy nandia lakilasy.” Hoe ka ty boke raike: ‘Tsy maintsy nitsoeke ty faritse iaby [o Kristianao] le nitory tamy ze ndaty nitrea’e, ndra tan-dalagney ndra tan-tanàgne ao ndra ta maso o ndaty ey ndra an-tragno o ndaty agne. Nitory avao iareo ndra nandrambe o ndatio ndra tsy nandrambe. Nandeha hatrake amy ty toeragne fara izay ty lavitse aza iareo.’

Ia ty Magnorike ty Reha i Jesosy ty amy Hinane Zao? “Hoe ty David Watsson, pastera anglikana: “Tsy le lahibey amo oEglizio ty mitory naho mampianatse, le tsy mahagaga areke naho tsy te hanompo an’Andrianagnahare o ndatio.” Nirehake miomba ty Fiangonagne Ara-pilantsara naho Advantista vaho ty fivavahagne hafa ka ty José Luis Pérez Guadalupe, amy ty boke’e tihoe Nagnino ro Mihegne o Katolikao? (espaignola). Nirehake reke ‘fa tsy mba mitory isan-tragno iareo fa o Vavolombelo i Jehovah-o avao ty manao izay.’

Tena maregne ka ty reha i Jonathan Turley, manam-pahaiagne toy tie: “Naho vaho maharey tihoe Vavolombelo i Jehovah o ndatio, le avy le o mpitory avy tampotampoke an-tragno’e agneo ty avy an-tsai’e ao voaloha’e. Tsy tihoe te hitaogne ndaty avao iareo fa tena lahibey amy iareo io mba hagnatanjaha’e ty finoa’e.”

[Efajoro]

Ia ty Tena Kristiana?

Ia ty trea’o fa tena Kristiana naho henteagne i raha nirehafe i Jesosy tatoy? Ndra tie maro aza ty fivavahagne mirehake tie Kristiana, le tsiaro avao i reha i Jesosy tihoe tie: “Tsy ze mirehake amako, manao tihoe: ‘O Tompo, Tompo’, ro hizilike amy i fanjakà i lagnitsey ao, fa ze manao ty zoton’arofon-dRaeko amy i lagnitsey ao.” (Matio 7:21) Toko’e ho fantare’o areke tie ia ty fivavahagne manao ty zoton’arofon’Andrianagnahare, ndra ty tena Kristiana. Toko’e hiarake amy iareo ka rehe, amy izay hahazo fiaignagne nainai’e naho fa hinday ty Fanjakàn’Andrianagnahare. Afake magnontane o Vavolombelo i Jehovah-o rehe naho te hahafantatse soa o fanjakagne iohoe naho ty raha hatao’e.​—Lioka 4:43.