TENA nanahake ty toetse i Rae’e an-dagnitse agney naho ty fomba fanoa’e raha ty Jesosy tamy ireke tambone tane tetoỳ. Hoe reke: ‘Tsy manao ndra ino ndra ino arake ty sitrapoko raho, fa arake ty nampianare i Rae ahy ro irehafako izay. Manao ze zoto’e avao raho.’ (Jaona 8:28, 29; Kolosianina 1:15) Mila mandineke ty fomba nifandrambesa i Jesosy tamo o ampelao areke tikagne. Amy izay ho fantantikagne tie akore ty fomba tean’Andrianagnahare hindesagne iareo.

Nisy manam-pahaiagne nieke fa tena hafa ty fihevera i Jesosy ty ampela amy i filazantsara rey ao naho oharegne amy ty nifihevera ty ndaty tamy izay o ampelao. Fa nagnino? Mbe mandrambe soa vao o ampelao naho ohatse ty ndaty amy izao mampihatse ty raha nampianare i Jesosy?

Tsy tihoe hilae o lahilahio avao ty ipaliagne o ampelao tie tamy i Jesosy. Nisy mpitarike fivavahagne Jiosy nihevetse fa manjare te hila o ampelao o lahilahio naho fa mifandrambe amy iareo. Natahoragne hiterake tsapa hevetse iareo, le tsy nengagne hirehake amy ty lahilahy amaso o ndaty ey. Tsy nahazo niboake i tragnoy iareo naho tsy le nikolopoke voaly. Faie nirehake ty Jesosy fa o lahilahio ro toko’e hifehe ty fagnirian-drati’e, le hagnaja o ampelao fa tsy iareo ro ndra havibìke.​—Matio 5:28.

Nampianatse ka ty mpitarike fivavahagne Jiosy fa afake misarake amy ty vali’e ty lahilahy “ndra inogn’inogne anto’e.” (Matio 19:3, 9) Faie tsy nagneke izay ty Jesosy. Hoe reke: “Ndra ia ndra ia misarake amy ty vali’e, sady manambaly ndaty hafa, le magnitsakitsa-baly reke.” (Marka 10:11, 12) Vaovao bey tamo o Jiosio tihoe magnitsakitsa-baly ty lahilahy raike naho mangalake ampela hafa. Satria nampianaregne iareo fa ty ampela avao ro va’e hagnitsakitsa-baly. Hoe ty boke raike: ‘Nagnonjogne ty toera o ampelao naho ty haja’e ty Jesosy satria nitovy ty fitsipike miomba ty findesam-batagne hoahy ty lahilahy naho ty ampela manambaly.’

Ty voka ty fampianara’e amy izao: Mifandrambe soa ty lahilahy naho ty ampela amy ty fivoria ty Vavolombelo i Jehovah agne. Tsy matahotse iareo kera hohevere o lahilahio hitsapa hevetse aze ndra hanjare hisiagne elagnelagne ty fifandrambesa iareo. Satria mikezake o lahilahio mba hinday ty “ampela fa bey taogne ho rene, le ty tanora ho rahavave amy ty faliovagne tanterake.”​—1 Timoty 5:2.

Nampianatse o ampelao ty Jesosy. Tsy nengà o mpitarike fivavahagne jiosio hianatse o ampelao. Faie i Jesosy nampianatse iareo sady nandrisike iareo haneho ty heve’e. Tea i Jesosy haharey ty fampianara’e ohatse ty Maria fa tsy ho tondregne hikarakara hanegne avao. Naseho’e tamy izay fa tsy hanao tolon-draha avao ty ilagne o ampelao. (Lioka 10:38-42) Nampianare i Jesosy ka ty Marta rahavave i Maria, kanao nihai’e soa ty namale i Jesosy tamy i Lazarosy nimatey.​—Jaona 11:21-27.

Tena lahibey tamy i Jesosy ty raha nieretserete o ampelao. Nino ohatse ty ampela jiosy taloha fa rehareha’e ty managne ana-dahy ro sady mahasambatse, lohotsie naho mpaminany reke. Nisy ampela raike zay ka nirehake tamy i Jesosy tie: “Sambatse ty troke ninday azo.” Faie nahitsy i Jesosy ze heve-diso nanagna i ampelay zay. (Lioka 11:27, 28) Nirehake reke fa ty mankatò an’Andrianagnahare ro tena mahasambatse mandikoatse tihoe managne ana-dahy ho rehareha’e.​—Jaona 8:32.

Ty voka ty fampianara’e amy izao: Engà o lahilahy mampianatse amo o fiangona ty Vavolombelo i Jehovah-o eò hirehake ty heve’e o ampelao. Magnaja ty ampela iareo satria ‘mampianatse raha soa’ i ampela rey sady mampiseho izay amy ty findesam-bata’e. (Titosy 2:3) Miantehetse amy ty ampela ka iareo mba hagnampe aze hitory i talily soa i Fanjakàn’Andrianagnahareỳ.​—Salamo 68:11; henteo ty efajoro tihoe “ Tsy Nengà i Apostoly Paoly Hirehake ty Heve’e vao o Ampelao?”.

Nitrétré o ampelao ty Jesosy. Ndra leo ty ndaty taloha ana-dahy toy izay anak’ampela. Porofo izay ty raha rehafe o Talmodao toy: “Sambatse ze managne ana-dahy, fa voa mafe ze managne anak’ampela.” Nisy rae aman-drene nihevetse fa ho enta-mavesatse ho aze o anak’ampelao. Ty anto’e tsy maintsy nipay valy ho aze iareo, sady tsy maintsy magnomey vola i lahilahy hovali’ey ka naho fa niavy eo. Nihevetse ka o rae aman-dreneo fa tsy azo ianteheragne o anak’ampelao naho fa antetse iareo.

Naseho i Jesosy fa sambe sarobily ndra ty ana-dahy ndra ty anak’ampela. Sambe nivelome’e tamy ty mate ohatse, ndra i anak’ampela i Jairoy ndra i ana-dahy i ampela vantotse ta Naina taoy. (Marka 5:35, 41, 42; Lioka 7:11-15) Nagnasitragne ampela ‘nisy demonia’ ka ty Jesosy. Naleme tagnate ty 18 taogne reke. Nitoka aze tamy ty rehake tsy fitrea tamy ty asa sora o Jiosio ty Jesosy tie “ana i Abrahama” reke. (Lioka 13:10-16) Hita boake amy izay fa soa fagnahy naho nagnaja i ampelay ty Jesosy. Nihevetse aze ho sarobily manahake ty ndaty iaby ty Jesosy sady nieke fa tena nanam-pinoagne reke.​—Lioka 19:9; Galatianina 3:7.

Ty voka ty fampianara i Jesosy amy izao: Misy fomba firehake zay Azia agne tie: “Mitovy amy ty manondrake rano ty folera ty mpiharo tanàgne ama’o rehe naho miteza anak’ampela.” Magnalavitse ze fomba fisaignagne zay ty rae aman-drene Kristiana. Bey hatea iareo, le mikarakara ty ana’e iaby ndra lahilahy io ndra ampela. Atao’e ze hampianaragne soa ty ana’e iaby naho hikarakaragne ty fahasalama iareo.

Natoky o ampelao ty Jesosy. Niheveregne ho tsy misy dika’e manahake o ndevò ty porofo nirehafe ty ampela agnatreha o fitsaràgne jiosio eo. Hoe ty Josèphe mpahay tantara tamy ty taonjato voaloha’e: “Tsy azo ekegne ty porofo omey o ampelao noho iareo tea somonga, naho sahisahy raty.”

Faie ampela ty nifilie i Jesosy hagnaporofo fa nivelomegne tamy ty mate reke. Satria ampela ty nisehoa’e voaloha’e tie tamy izay. (Matio 28:1, 8-10) Ndra tie nahatrea ty namonoagne naho nandevegnagne i Jesosy aza o ampela reo, le tsy nino iareo o apostolio. (Matio 27:55, 56, 61; Lioka 24:10, 11) Faie kanao ampela ty nisehoa i Kristy voaloha’e, le fagneva ty hanao vavolombelogne manahake ty mpianatse hafa ka iareo tie tama’e.​—Asan’ny Apostoly 1:8, 14.

Ty voka ty fampianara i Jesosy amy izao: Magnaja o ampelao ty lahilahy miandraikitse ty fiangona ty Vavolombelo i Jehovah, le mitsanogne ty soso-kevetse mey iareo. Magnomey voninahitse ty vali’e ka ty lahilahy kristiana, le mitsanogne aze soa.​—1 Petera 3:7; Genesisy 21:12.

Nataon’Andrianagnahare hohajaegne naho hanagne fahafahagne o ampelao. Toko’e hanahake i Kristy areke o lahilahio mba ho fagnorihagne izay. (Genesisy 1:27, 28) Tsy toko’e hagnambane o ampelao iareo, fa hagnorike ty toro lala ty Baiboly. Amy izay ty vali’e ho sambatse.​—Efesianina 5:28, 29.

Nampijalé ty vali’e ty Yelena tamy reke vaho nianatse Baiboly, faie tsy nirehadrehake. Satria fa mpiarotegne hatrake amy ty naha kede aze i vali’ey. Fomba amy iareo agne zao ohatse ty mampijale ndaty, isengea’e hery avao o ampelao mba ho valie’e. Hoe ty Yelena: “Nagnampe ahy hiaretse ty raha nianarako tagnate Baiboly ao. Nanjare nifantako fa kay i rahò mbe misy ndaty tena tea ahy naho mikarakara vaho mihevetse ahy ho sarobily avao. Naho mianatse Baiboly ka ty valiko, le hiova sady tsy hampijale ahy sasa.” Nitanterake ty raha ninofinofise’e satria nianatse Baiboly ty vali’e naho fa tafara tatoy sady natao badisa, le nanjare Vavolombelo i Jehovah. Hoe ty Yelena: “Nanjare nahay nifehe tegna reke sady ohatse soa hoahy ty hafa. Nikezake nifamela heloke tanterake ka zahay. Nahatsiaro ho nisy dika’e areke raho sady tsy natahotse sasa satria sambe mampihatse ty toro lala ty Baiboly zahay mirovaly.”​—Kolosianina 3:13, 18, 19.

Maro ty ampela kristiana manahake i Yelena. Sambatse iareo satria sambe mikezake mampihatse ty toro lala ty Baiboly iareo mirovaly. Hajae ty mpiharo finoagne ama’e ka iareo, le tsy matahotse sady tsy mahatsiaro ho voafehefehe.​—Jaona 13:34, 35.

Sambe mahatsapa ty lahilahy naho ty ampela kristiana fa agnisa ty ‘nengagne tsy hisy dika’e’ iareo satria sambe tsy voririke. Faie naho mifandrambe soa aman’Andrianagnahare iareo, le afake mitamà fa “hafahagne amy ty fagnandevoza ty halò.” Amy izay iareo “hanagne ty fahafahagne bey voninahitse o anak’Andrianagnahare reo.” Soa ze raha ampitamaen’Andrianagnahare hoahy ty lahilahy naho ty ampela zay!​—Romanina 8:20, 21.