Naterake ta Saint-Domingue, amy ty Repoblika Dominikana agne raho. Efatse zahay ro troke raike, le izaho ty faralahi’e. Ndaty tena nianatse ty Baba naho i Nene, le tea’e naho ndaty soa toetse ty ifagnosehosea’ay. Nifankatrea tamy ty ajalahy misionera mormons iareo, efatse taogne taloha ty niterahagne ahy. Nahafinaritse i ry Baba iareo satria nahalala fomba ro nalio vaho nilamigne soa ty pozi’e. Tapa-kevetse areke ty Baba fa hivavake amy ty Fiangonagne Jesosy Kristy Hoahy ty Ndaty Masy ty Andro Fara’e ndra Fiangonagne Môrmôna. Ty keleia’ay ro agnisa ty nanjare Mormons voaloha’e tama’ay agne.

Tena niteako ty raha natao’ay tam-piangonagne agne naho fa nibey raho. Ty miarake amy ty keleiagne naho ty magnorike ty fitsipike miomba ty findesam-batagne ro tena lahibey amo o Mormons-ao, le nagnaja izay ka raho. Tena nampirehareha ahy tihoe Mormon, sady te hanjare misionera raho.

Nifindra ta Etazonia agne zahay tamy tie raho ni-18 taogne. Tea i Baba naho i Nene hianatse amy ty oniverisite tena soa raho. Niavy nitilike anay ta Floride, a Etazonia agne ty dadatoa naho i nenitoa’ay tafara izay. Vavolombelo i Jehovah iareo, le nirisihe’e hagnatreke havoriambey niarake tama’e zahay. Tena nigaga raho naho fa tagne fa nagnorike soa amy i Baiboli’ey ao iaby ze ndaty tagne naho fa nisy andine’e nivakiegne sady nandrambe an-tsoratse. Nangatake stylo naho taratasy ka areke raho, le nanao manahake ty natao iareo.

Fanta i Dadatoa naho i Nenitoa fa te hanjare misionera raho. Nirehake tamako areke iareo tafara i havoriambeỳ fa afake magnampe ahy hahafantatse o Baibolio. Treako tie hevetse soa zay. Ty Boke o Môrmônao ro tena fampiasa’ay naho oharegne amo o Baibolio.

Tamy ty alala ty telefony zahay amy i Dadatoako naho i Nenitoako ro nianatse Baiboly. Nirisihe iareo avao raho hampitaha ty raha inoako tamy ze rehafe ty Baiboly. Ty vatan-tegnako ro tea iareo hahatrea ty maregne rehafegne ao.

Maro ty raha inoa ty Mormons nekeko, faie tsy mba niazoko antoke naho mifagnarake amy ty Baiboly. Nandefasa i Nenitoa Mifohaza! 8 Novambra 1995 raho. Gazete aboa ty Vavolombelo i Jehovah io, sady misy lahatsoratse miomba ty raha inoa ty Mormons ty ao. Tena nigaga raho fa kay mbe maro ty fampianara o Mormons, mbe tsy nifantako. Nikaroke tamy Internet ao tamy ty tragnom-poraro iareo ao raho, le treako fa tsy mavande i Mifohazay! Nitilike ty fagnajariam-boke o Mormons a Utah, a Etazonia agne raho, le vao mainke nagnamaregne ty raha rehafe i gazetey ty raha nitreako.

Nino avao raho amparake izay fa tsy mifanohetse ty Baiboly naho ty Boke Môrmôna. Faie naho fa tena nandineke ty Baiboly raho, le nahatrea fa misy raha ampianare o Mormons-ao tsy mifagnarake amy ze voarehake ao. Rehafe ty Ezekiela 18:4 fa mete mate o fagnahio. Faie rehafe ty Boke Môrmôna amy Almà 42:9 fa: “Tsy ombia ho mete mate o fagnahio.”

Faie tsy ty fampianara o Mormons-ao avao ty nampivali-doha ahy, fa iareo nandrenge o firenenao ka. Ampianaregne iareo ohatse fa ta Jackson, a Missouri, a Etazonia agne ty nisy i teteke Edenay. Rehafe ty mpitondra fivavahagne ka fa ty fitondram-panjaka o amerikanao ro hampiasaen’Andrianagnahare hinday ty tane toy iaby.

Nieretseretse areke raho tie: ‘Naho tena izay vata’e ty hiseho, le akore ty amy i firenena niaviakoy naho ty firenena hafa?’ Nisy ajalahy raike mormon niofagne ho misionera zay niantso ahy tie indraike, le nirehafeko ama’e ze raha zay. Nagnonteneako soa reke naho vognogne hialy amy ty Mormons hafa firenena ama’e, naho ohatse ka mialy ty firene iareo. Tena nigaga raho fa nirehake reke tie vognogne! Nandineke amy ty pitsopitso’e ty fampianara o Mormons-ao raho sady nagnontanentane mpitondra fivavahagne mormons. Nirehake iareo tie mistery zao ty vale i fagnonteneakoy, fa mbe ho voavale avao indraike andro agne.

Tsy nahafa-po ahy ty toin-dreha iareo. Nieretseretse soa miomba ahy areke raho sady nidineheko ty anto’e niteavako i te ho misioneray. Tsapako tamy izay fa kay raho te hanao asa fagnasoavagne naho mba te ho hajae o ndaty avao. Fa naho ty miomba an’Andrianagnahare, le zara’e naho mba misy raha fantako. Namaky Baiboly mateteke raho tie taloha, faie tsy tena nihevetse io ho sarobily. Tsy fantako iaby aza ty raha safirien’Andrianagnahare miomba ty tane toy naho o ndatio.

Nahafantatse raha maro raho naho fa nianatse Baiboly tamy ty Vavolombelo i Jehovah. Fantako ohatse ty tahinan’Andrianagnahare naho ty raha hatao i Jesosy mba hagnatanterahagne ty fikasan’Andrianagnahare. Haiko ka tie manao akore o ndatio naho fa mate. Manjare zatse mampiasa Baiboly raho tie amy izao, sady teako ty mirehake amy ty hafa ze nianarako. Fa hatrake amy izay ty nahafantarako fa misy ty Andrianagnahare, faie amy izao raho vaho afake mirehake ama’e manahake ty namako tena marine ahy. Natao badisa raho tamy 12 Jolay 2004, le nanjare Vavolombelo i Jehovah. Nanjare mpitory marain-tsy hariva raho enem-bolagne tafara izay.

Niasa tamy ty foibey ty Vavolombelo i Jehovah a Brooklyn a New York agne raho tagnate ty dime taogne. Tena fale raho satria nagnampe tamy ty famokaragne Baiboly naho boke magnazava Baiboly mahasoa ndaty an-tapetrisa’e magneran-tane. Fale ka raho fa mbe afake magnampe ndaty maro hianatse ty miomba an’Andrianagnahare.