Nibey ta Warialda, tanàgne kede a Nouvelle-Galles Atimo agne raho. Mpiteza agnombe naho agnondry ty ndaty agne sady mpambole. Malio o tanàgne iohoe sady tsy le misy hampiarotegne ka.

Folo zahay ro troke raike sady iraho ty talé’ay. Vaho 13 taogne raho, le fa niasa, mba hagnampeagne ty vola militse an-tragno ao. Faie ndaty tsy le nianatse raho, le niasa tamy ty toeragne fitezagne o bibio agne. Mpamolake sovala ty asako tamy tie raho ni-15 taogne.

Nisy nahasoa aze naho naharaty aze ty niasa tamy ty toeragne fitezagne o bibio agne. Tena teako ty asako naho ty tontolo iaignagne agne. Namindro tamo o afò raho naho fa nihariva sady nagnente o volagne naho o kintagneo. I tiotiokey ka minday ty hagny o akatakatao naho i ala magnodidigney. Nieretseretse raho tamy i fotoagne rey tie tsy maintsy nisy namorogne i raha mahaveregne rey. Faie izao ty tsiko’e: Firey mateteke ty ndaty mirehake raty, tsy sarotse ty mahatrea sigara. Ty voka’e, nanjare zatse nifoke sigara naho nirehake raty raho.

Nifindra ta Sidney agne raho tamy tie raho ni-18 taogne. Te ho nanjare maramila raho faie tsy nivoarae satria tsy le nianatse. Nahatrea asa raho, le nijanogne tagne tagnate ty herentaogne. Tamy izay raho ro nifankatrea voaloha’e tamy ty Vavolombelo i Jehovah. Nisy nandrisike ahy hivory, le nandeha vata’e raho. Le avy le nitsapako fa maregne ty fampianara iareo.

Faie tapa-kevetse hiheregne ambanevolo agne raho, tsy ela tafara izay, le niavy ta Goondiwindi, a Koinlandy agne. Nahatrea asa raho, le nanambaly. Faie nanomboke ninon-toake ka raho.

Naho fa terake i ana-dahi’ay roe rey, le nanomboke nieretseretse ty hiafarà ty fiaignako raho. Tadidiko i raha nirehafegne tamy ty fivoria ty Vavolombelo i Jehovah ta Sidney agney, le tapa-kevetse hanao raha raho.

Nahatrea fitakalesan-davitse fa haehae ka raho, sady nisy adiresy ty birò sampa ty Vavolombelo i Jehovah ta Ostralia tao. Nanoratse tagne raho, le nisy Vavolombelogne raike soa fagnahy naho bey hatea niavy hitilike ahy. Tsy ela zahay le nanomboke niarake nianatse Baiboly.

Tsapako fa tena nila niova raho, naho fa nandeha i fianaragney. Tena nisy voka’e tamako, ohatse, ty 2 Korintianina 7:1 mandrisike antikagne mba “hagnalio ty tegnantikagne ho afake amy ze kila raha mandoto ty nofotse.”

Nanapa-kevetse raho fa tsy hifoke sigara naho hinon-toake sasa. Fa nahazatse ahy fa ela reo, sady tsy mora ty niala tama’e. Faie vognogne ty hiova raho mba hampifaleagne an’Andrianagnahare. Tena nagnampe ahy ty toro lalagne amy Romanina 12:2 ao manao tihoe: “Ko magneke hovolavolae ty vanim-potoagne misy antika hinane zao toy sasa, fa miovà le havaozo ty sai’areo.” Tsapako tie ty toe-tsaiko ro mila miova naho te hagnova ty fahazarako raho. Toko’e hanahake ty fomba fivazohoan’Andrianagnahare raha raho, le hagneke tie raty i raha nahazatse ahy rey. Nagnampe ahy reke, le nireseko avao i fahazaran-dratiko rey.

Faie tena tsy nimora tamako ty tsy hirehake raty sasa. Fantako i torohevetse amy Efesianina 4:29 ao manao tihoey tie: “Ko engagne hisy rehake raty hiboake amy ty vava’areo.” Faie tsy le avy le nahavita nampihatse izay raho. Nagnampe ahy ty nisaintsaigne ty Isaia 40:26. Izao ty nirehafe’e miomba i lagnitse feno kintagney: “Henteo i lagnitsey le talakeso. Ia ty namboatse o raha rehoe? Ireke i mamoake irey manahake ty mamoake tafikey sady i magniake iareo tsikiraikiraikey. Sady mitoka iareo amy ty agnara’e iaby. Matanjake reke sady tena mahaveregne ty heri’e, le tsy misy montso rey ndra raike aza.” Nieretseretse raho tie naho managne hery hamorognagne ze kila raha iaby ty Andrianagnahare, le tsy ho vita’e vao ty hagnampe ahy hiova mba hampifaleagne aze? Nivavake mafe raho sady nikezake mafe ka, le tsy nirehake raty sasa naho fa tafara tatoy.

Tsy le niafake nirehake ama o ndaty raho tamy iraho mbe nimpamolake sovalay. Tsy le nisy ndaty ty tagnila i toeragne fitezagne biby niasàkoy. Faie nianatse naneho hevetse raho, noho i fampiofagnagne tamy ty fivoria ty Vavolombelo i Jehovah tagne rey. Nagnampe ahy hirehake ama o ndaty miomba i talily soa i Fanjakàn’Andrianagnaharey ka i fampiofagnagne rey.​—Matio 6:9, 10; 24:14.

Fa taogne maromaro zay ty naha androanavi-pagnahy ahy tamo o fiangonagneo eo. Rambeseko ho tombotsoa ty manao ze azoko atao mba hagnampeagne ty mpiharo finoagne amako. Faie ty fitahiagne lahibey niazoko le tihoe miarake manompo i Jehovah zahay keleian-draike.

Misaotse i Jehovah raho noho ireke vognogne hampianatse ahy, ndra tie ndaty tsy le nianatse aza raho. (Isaia 54:13) Tena maregne ty raha rehafe ty Ohabolana 10:22 manao tihoe: “Ty fitahia i Jehovah ro mampanan-karena.” Tsy ligne’ay keleian-draike ty hianatse raha maro miomba i Jehovah naho hanompoagne aze nainai’e.