Nirehake miomba an-dRae’e ty Jesosy tie indraike zay ta Jerosalema tagne sady nampibaribary ty haratia o mpitondra fivavahagneo tamy izay. (Jaona 8:12-30) Magnampe antikagne handineke ty raha inoa ty ndaty amy izao i reha i Jesosỳ. Hoe ty Jesosy tamy izay: “Naho magnorike ty rehako avao nareo, le tena mpianako vata’e, sady ho fanta’areo ty maregne, vaho hagnafake anareo.”​—Jaona 8:31, 32.

Nirehake ty Jesosy fa ‘magnorike ty reha’e avao o mpiana’eo.’ Atoro’e eo ty fomba hahafantaragne naho maregne ty fampianara ty fivavahagne raike ndra tsy maregne. Naho fa maharey rehake miomba an’Andrianagnahare rehe, le saintsaigno tie: ‘Mifagnarake amy ty reha i Jesosy naho ty Soratse Masigne iaby vao zay?’ Tsikombeo i ndaty nitsanogne ty reha i apostoly Paoly rey. “Nandineke soa ty Soratse Masigne isan’andro iareo mba hahatreavagne naho tena maregne ze nirehafegne tamy iareo ndra tsy maregne.”​—Asan’ny Apostoly 17:11.

Nandineke soa ty raha inoa’e ty Marco naho i Rosa vaho i Raymonde, i nirehafegne tamy i lahatsoratse voaloha’ey, naho fa nianatse Baiboly tamy ty Vavolombelo i Jehovah. Ino tasa iareo?

Marco: “Nampiasa Baiboly i ndaty nampianatse anay mirovalỳ mba hamaleagne ze fagnontenea’ay. Nanjare tea i Jehovah zahay sady vao mainke nifankatea.”

Rosa: “Nieretseretse raho tamy ty voaloha’e fa ty fiheveran’Andrianagnahare o ndatio avao ty amy Baiboly ao. Faie nivoavale tsikedetsikede i fagnonteneakoy. Fantako hinane zao fa tena misy ty Jehovah sady azoko itokisagne.”

Raymonde: “Nivavake taman’Andrianagnahare raho mba hampea’e hahafantatse aze. Nanomboke nianatse Baiboly zahay mirovaly, tsy ela tafara izay. Nanjare nahafantatse ty maregne miomba i Jehovah zahay, le tena nifale!”

Tsy ty vande miomba an’Andrianagnahare avao ty abaribary o Baibolio. Rehafegne ao ka fa managne toetse fanjaka reke. Boake amy ty fagnahy masin’Andrianagnahare o Baibolio sady magnampe antikagne ‘hahafantatse ty raha nimea’e antikagne taman-kasoa fagnahy.’ (1 Korintianina 2:12) Tena soa naho ty vatan-tegna’o ro magnente ty vale’e mea ty Baiboly miomba ty fagnonteneagne lahibey fapetra o ndatio miomba an’Andrianagnahare naho ty fikasa’e vaho ty hoavy. Henteo tihoe “Fampianara ty Baiboly> Valem-pagnonteneagne Ara-baiboly”, amy www.pr418.com/tdx ao. Afake mangatake hianatse Baiboly ka rehe ao, ndra mirehake amy ty Vavolombelo i Jehovah. Hotrea’o fa mora tsy arake ty nieretsereta’o aze ty ho tea an’Andrianagnahare.