Soa fa mbe misy o Baibolio, le afake managne naho mamaky aze rehe. Afake matoky rehe tie mifagnarake soa amy i soratse tagnagne tam-boaloha’e tagney i Baiboly vakie’oy naho soa ty dikan-drehake filie’o. * Mahagaga fa mbe misy avao o Baibolio ndra tie mora simba aza ty fitaovagne nanoratagne aze, ndra tie nisy te hamoagne aza io vaho ndra tie nisy te hagnova aza ty tagnate’e tao. Ino ty anto’e? Ino ty mampiambake o boke iohoe?

Hoe ty apostoly Paoly: “Ty Soratse Masigne atoagne iaby le boake amy ty hery ty fagnahy masin’Andrianagnahare.” (2 Timoty 3:16) Maro ty mpianatse Baiboly magneke izay. Mino iareo tie Saontsin’Andrianagnahare o Baibolio sady narova’e kanao mbe misy hatrake amy izao. Nianatse Baiboly ty Faizal i nirehafegne taloha tagney satria te hahafantatse tie maregne vao zay. Nahagaga aze ty raha nitrea’e. Tsy ela le nifanta’e tie tsy amy Baiboly ao ty ankamaroa ty fampianara o Fivavahagne Manao ty Vata’e ho Kristianao. Nanohigne ty fo’e ka ty nahafantatse ty raha safirien’Andrianagnahare miomba ty tane toy.

Hoe ty Faizal: “Rese lahatse iraho hinane zao tie fagnomezagne boake aman’Andrianagnahare o Baibolio. Ireke ty namorogne ze kila raha, le azo antoke fa vita’e ty magnomey boke antikagne sady miaro aze. Hoe magnisy ty fetra ty hery i Andrianagnahare Fara’e Maherỳ raho naho mirehake fa tsy mahavita izay reke. Le ho vaniko vao ty hanao izay?”​—Isaia 40:8.