OLAGNE: Tsy nifoagne o Baibolio ndra tie mora simba aza ty fitaovagne nanoratagne aze sady ndra tie maro ty nikezake hamoagne aze. Faie ni-te hagnova ty agnate’e ao ty mpandika rehake naho ty mpanao dika soratse ila’e. Nikezahegne nampifagnarahagne tamy ty fampianara’e ty Baiboly fa tsy natao’e nifagnarake tama’e ty raha nampianara’e. Intoagne misy ohatse:

• Toeram-pivavahagne: Nagnampe rehake tamy Eksodosy 20:17 ao ty mpanoratse ty Boke Dime Voaloha’e amy ty rehake samaritana, tagnelagnela ty taonjato fahaefatse naho faharoe T.K. Nampea’e izao i andine’ey: “... amy ty vohitse Gerizima agne. Sady agne rehe ro hagnoregne alitara.” Le hoe mirehake ty Soratse Masigne tie toko’e hagnoregne tempoly amy ty vohitse Gerizima agne o Samaritanao.

• Fampianaragne miomba ty Andrianagnahare miharo raike. Nagnampe rehake amy 1 Jaona 5:7 ao ty mpanoratse raike mino o fampianaragne iohoe, 300 taogne latsake tafara ty nahavitagne o Baibolio. Izao ty nagnampea’e aze: “... ty an-dagnitse agne, le i Rae, ty Saontsy sady ty Fagnahy Masigne: Le iareo telo reo raike avao.” Faie tsy trea tamy i soratse tagnagne tam-boaloha’e tagney reo. Hoe ty Bruce Metzger, manam-pahaiagne miomba ty Baiboly: “Nanjare niherenkeregne tamy i soratse tagnagne latina fa hambo’ey naho ty Vulgate [latina]” o rehake rehoe, “nanomboke tamy taonjato fahaenegne.”

• Ty tahinan’Andrianagnahare: Maro ty mpandika Baiboly nagnafake i tahina’ey amy ty Soratse Masigne ao, satria iareo nagnorike ty raha fahatane ninoa o Jiosio. Sinolo iareo agnaram-boninahitse tihoe “Andrianagnahare” ndra “Tompo” i tahina’ey. Faie tsy i mpamorogney avao ty tokavegne amo o agnaragne rehoe amy Baiboly fa ndra o ndatio, ndra o sampio ndra i Devoly.—Jaona 10:34, 35; 1 Korintianina 8:5, 6; 2 Korintianina 4:4. *

NAGNINO O BAIBOLIO RO TSY NIOVA? Voaloha’e, maro ty mpanao dika soratse tena mahay naho nitao soa, ndra tie tsy niraharaha naho namitake aza ty ila’e. Nahere o Masoretao nadika ndra dika mitovy ohatse ty Soratse Hebreo tagnelagnela ty taonjato fahaenegne naho fahafolo. Natao tihoe soratse natao o Masoretao io. Nisahe iareo ty rehake naho ty litera tao mba hahatreavagne naho ohatse misy diso ndra tsy misy. Sinora’e tamy ty sisy i pejey tey ka ze raha nampiahiahy aze tamy i soratse tagnagne naheregne nadikay tao. Tsy nipaoha iareo hovagne ty rehake tamy i Baibolỳ tao. Hoe ty mpikaroke raike atao tihoe Moshe Goshen-Gottstein: “Nihevetse iareo fa manao fahotagne lahibey ze misatry raha magnova aze.”

Faharoe, magnampe o manam-pahaiagne miomba ty Baibolio hahatrea ze diso ty soratse tagnagne maro amy hinane zao. Nampianaregne ty mpitarike fivavahagne tagnate ty taonjato maro ohatse, fa ty Baiboly amy ty rehake latina ro tena maregne. Faie fa nampea iareo i hevetse diso nirehafegne taloha teoy ty 1 Jaona 5:7. Ndra ty Fandikan-dreha o Fiangona o Jesosy Mamonjio aza ahatreavagne io ka. Faie ino ty naseho i soratse tagnagne hafa nitrea tafara tatoy rey? Hoe ty Bruce Metzger: “Tsy trea amy i soratse tagnagne talohay tao (syriàka, kôpta, armeniana, etiopiana, arabo, naho slavônika) i fehezanteny nampeagne [tamy 1 Jaona 5:7 aoy]. Tsy i soratse tagnagne tamy ty rehake latinay avao ro misy io.” Nafahagne tamy ty ankamaroa o Baiboly malagasio areke i fehezanteny disoy.

Porofoe o soratse tagnagne fa hambo’eo vao fa tsy miova o Baibolio? Trea tamy 1947 i horognam-boke ty Riake Matey, i sinoratse fa arivo taogne mahery taloha ty soratse hebreo natao o Masoretaò. Afake mampitaha o sora-tagnagne roe reo areke o manam-pahaiagneo. Mirehake ty lahilahy agnisa ty mpandaligne o horognam-boke amo o Baibolio ao fa horognagne raike, le fa “magnomey porofo tsy azo lieregne tie, nitao soa sady tsy nanao diso o Jiosy mpanao dika soratseo naho fa nagneregne nandika o Baiboly sinoratse tagnagne tagnate ty arivo taogne mahery reo.”

Ahatreavagne taratasy papyrus misy amy ty ankamaroa ty boke amy ty Soratse Grike Kristiana ty Fagnajariam-boke Chester Beatty, a Irlandy agne. Agnisa izay ty soratse tagnagne tamy ty taonjato faharoe ndra 100 taogne teo ho eo tafara ty nahavitagne i Baibolỳ. Hoe ty diksionera Vatofantsike Miomba ty Baiboly (anglisy): “Maregne aloha fa nahatreavagne pitsopitson-draha maro i taratasy papyrus rey. Faie trea amy irey ka fa tsy miova i Baiboly sinoratse tagnagne rey naho fa naheregne nadika.”

INO TY VOKA’E? Tsy nampihen-danja o Baibolio ty fisia o soratse tagnagne maro fa hambo’e reo, fa vao mainke nahavy aze azo atokisagne. Hoe ty A^toa Frederic Kenyon miomba ty Soratse Grike Kristiana: “Io avao ty boke fa hambo’e managne porofo maro fa taloha fa ela bey tie, maregne ty raha agnate’e ao. Naho manam-pahaiagne tsy mitsaratsara rehe, le tsy maintsy magneke fa maregne o Baiboly anagnantikagne amy izaò.” Hoe ka ty manam-pahaiagne atao tihoe William Green miomba ty Soratse Hebreo: “Tsy diso tikagne naho mirehake fa tsy misy asa soratse hambo’e naboake amy ty fomba maregne soa hoe izay.”