Ino ty hagnampe azo ho tea mamaky Baiboly naho handrambe soa boake amy ze raha vakie’o? Retoa misy soso-kevetse dime. Ndaty maro ty nandrambe soa naho fa nampihatse o soso-kevetse rehoe.

Filio soa ty toeragne hamakiagne Baiboly. Mipaliava toeragne bangigne, amy izay rehe afake mifantoke soa amy ze raha vakie’o. Mitoboha amy ty toeragne misy hazavagne soa fa tsy maienkiegne sady anò azo antoke tie azon-tioke i toeragney.

Managna toe-tsaigne soa. Boake amy i Raentikagne an-dagnitse agney ty Baiboly. Naho ihe manao manahake o ajaja vognogne hitsanogne ty fagnanaran-drae’eo, le handrambe soa rehe naho fa mamaky Baiboly. Afaho an-tsai’o ao ze eretseretse va’e hahavy azo tsy hazoto hamaky Baiboly. Magnenga an’Andrianagnahare hampianatse azo rehe amy izay.​—Sal. 25:4.

Mivavaha hey aloha ty hamakia’o Baiboly. Saontsin’Andrianagnahare ty Baiboly. Tsy maintsy mipay ty fagnampea’e areke tika naho te hahazo ze raha rehafegne agnate’e ao. Mampitamà reke fa hagnomey ‘fagnahy masigne hoahy ze mangatake ama’e.’ (Lioka 11:13) Afake magnampe azo hahatakatse ty heven’Andrianagnahare o fagnahy masigne iohoe. “Ndra ty raha laleke miomba an’Andrianagnahare aza”, le ho taka’o iaby.​—1 Korintianina 2:10.

Kezaho takaregne ze raha vakie’o. Ko meke hahavita vaky avao fa saintsaigno ka ze raha vakie’o. Saintsaigno ohatse tie: “Inogne iaby zao ty azoko ianaragne boake amy ty tantara o ndaty vakieko toy? Akore ty azoko ampiharagne ty raha vakieko toy amy ty fiaignako?”

Managna tanjogne. Mikezaha hianatse ze raha tena hahasoa azo. Azo’o atao tanjogne ohatse ty hahafantatse soa an’Andrianagnahare, ty hagnasoa ty toetse’o, ty ho lasa valy fanjaka. Ie naho fa avy eo, le jobogno ze tantara amy Baiboly ao afake magnampe azo hagnatratse tanjogne. *

Hagnampe azo hazoto hamaky Baiboly ty fampiharagne o soso-kevetse rehoe. Faie akore ty hahavy aze hahafinaritse? Izay ty ho trea’o amy ty lahatsoratse magnarake.