Mihamafe ty fiaigna ty ndaty amy ty tane maro satria mionjogne iaby ty vilin-draha. Agnisa ty miatreke izay ka o Vavolombelo i Jehovah-o. Faie ndra tie eo zay, le tsy minekoneko loatse iareo satria hay iareo tie “tsy ombia hahafoe” ty mpanompo’e ty Jehovah. (Hebreo 13:5) Lava nitagne ze fampitamà’e zay avao ty Jehovah amparake izay sady mbe nanao raha mifagnarake amy izay ka ta Filipiny agne. Mahantra ty ankamaroa ty ndaty agne faie vao mainke niatreke raha sarotse iareo tamy 1970 naho 1980 tagne ho agne.

 Hoe ty rahavave raike atao tihoe Vicky a: “Tsiaroko tie nisy fotoagne raho nitagny satria nitsiampe avao ty hanegne nanagna’ay. Le fa vare, sira naho rano avao ty mba nanagna’ay mateteke.” Tsy nahatrea asa ka ty rahalahy raike atao tihoe Florencio. Hoe reke: “Semiza telo naho pataloha telo avao ty nampifandimbezeko naho fa namonje fivoriagne naho havoriambey raho.” Akore ty niatreha o vahoa i Jehovah-o ze raha sarotse iaby rezay? Ino ty nagnampe iareo hatanjake ara-pagnahy avao? Nagnino ty ohatse nimey iareo ro magnampe antikagne naho miova tampoke ty raha iaignantika?

 Tagnate i fotoan-tsarotsey, le natoky ty Vavolombelogne ta Filipiny agne tie hikarakara iareo ty Jehovah. (Hebreo 13:6) Mateteke, le tsy nampoize iareo ty fomba nagnampea i Jehovah iareo. Izao ohatse ty raha nirehafe ty rahavave raike atao tihoe Cecille: “Nisy fotoagne, le fa ze vare nandrahoe’ay maraindraigne zay avao ty sisa tama’ay ao. Tsy nisy hohanegne sasa zahay efatse tafara izay. Nivavake areke zahay mba hahazo ze raha ilae’ay amy i androy. Ie amy izahay mbe agnate ty mihinagne maraindraigney, le niavy ze rahalahy raike zay sady ninday vare dime kilò. Tena nifale loatse zahay, le nipoke ty ranomaso’ay noho i fitahiagne boake amy i Jehovah-y. Tsy indraike avao ty nahazoa’ay ty fitahia i Jehovah hoe izay.”

 Nampihatse ty torohevetse feno fahendreagne amy Baiboly ao ka o vahoan’Andrianagnahareo. (Ohabolana 2:6, 7) Namborake ty tam-po’e ao tamy i Jehovah ohatse ty rahavave raike vaho vita badisa vaho tsiela atao tihoe Arcelita. Mbe tsy nanambaly reke tamy izay sady nialy mafe mba hahazahoagne ze raha ilae’e. Nisaintsaigne ty raha rehafe ty Ohabolana 10:4 reke naho fa boake nivavake. Izao ty rehafegne ao: “Mampahantra ty tagna ty kamo, fa ty tagna ty mazoto mampanan-karena.” Te hampihatse o andine’e iohoe ty Arcelita, le nanapa-kevetse ty hambole. Hoe reke: “Tena nitahy ty kezake nataoko ty Jehovah satria nimaro ty vokatse niazoko. Naviliko ty ila’e mba hanoako foré, le ty ambi’e nahampe hohaneko.”

 Tsy niampe hivilianagne tane naho hagnoregnagne Anjomba i Fanjakagney ka ty vola i rahalahy rey. Faie tsy nikalagne iareo tsy hagnorike i lily tihoe toko’e hiarake hivory naho hifampaherỳ zay. (Hebreo 10:24, 25) Nanao ze azo natao avao iareo. Izao ohatse ty raha nirehafe ze rahavave raike atao tihoe Deborah zay: “Enegne teo ho eo zahay ty nivory tamy ze tragno kedekede namboare’ay amy i mpisava lalagne fahamarokoy zay. Rave ze hatae mitovitovy amo o danteo, mitiry amoron-drano ey zay ty natao’ay tafo i tragnoy, le rave coco ty natao’ay rindri’e. Vata-dante ka ty natao’ay seza.”

 Tragno ty mpiara-manompo ty nivoria ty ankamaroa o rahalahy naho rahavaveo. Hoe ty rahavave raike atao tihoe Virginia: “Namboaregne tamy ty akata naho bambò ze tragno’ay kedekede zay. Isake sabotsy, le tsy maintsy nakisa’ay ty enta’ay amy izay mba malalake i tragnoy, le afake hivoriagne ty hamaray igne.” Mitegne ty tragno ila’e anoagne fivoriagne. Hoe ty rahalahy raike atao tihoe Noel: “Naho fa avy i oragney, le asia’ay sihoagne ty tandrife i loakey eo. Faie ndra tie eo aza ze olagne iaby rezay, le hoe tsy nitrea’ay zay noho izahay nanompo i Jehovah miarake amo o rahalahy naho rahavaveo.”

 Ndra tie tsy nanan-draha fire aza o Vavolombelogne ta Filipiny agneo, le tsy nampihegne ty zotom-po iareo tamy ty fanompoagne zay. Izao ty nirehafe i Lindina, boake amy ty tokonose i Negros agne: “Lava tsy nanam-bola hatao foré avao zahay satria maro an-tragno, ie amy izao i Baba raike avao ty niasa. Mateteke areke zahay ro nandeha tomboke naho fa hamonje faritane. Faie ndra tie teo aza zay, le nifale avao zahay satria naresake ty tan-dalagne ey sady nifanta’ay ka tie nahafale i Jehovah i kezake natao’aỳ.”

 Agnisa ty tena tsy nimora ka ty nitory amo o faritane mitokagne naho be vohitseo satria nitsiampe ty tobile ndra motò nandeha mbeo ndra ka tena tsy nisy. Hoe ty Esther, mipetrake amy ty tokonose i Luzon agne: “Misy mpitory enegne hatrake amy roe amby folo eo ho eo zahay ty magnalegnalegne satria hanao lia tomboke lavitse. Mitory avao zahay amparake ty hahariva i androy. Ninday hane masake zahay, le tambane aloke ey ty nihinagne. Tsy nanan-kanegne ty ila’e tamo o rahalahy naho o rahavaveo faie nandeha avao. Hoe zahay tamy iareo: ‘Ko matahotse fa hifampizarantika ze hanegne eo.’”

 Tena nitahie i Jehovah ze fahafoezan-tegna iareo zay. Tamy 1970 zao ohatse, le ni-54 789 ty isa ty mpitory ta Filipiny agne. Faie kede tsy ho indroe izay ty isa iareo tamy 1989, zane hoe nanjare 102 487. Le tamy 2023 iareo nahatratse 253 876.

 Ndra tie nisahiragne ara-bola aza ty Vavolombelogne ta Filipiny agne, le mbe nifale avao iareo sady nibey atao amy ty fanompoagne i Jehovah. Hoe ty rahalahy raike atao tihoe Antonio: “Tsy nahakalagne anay tsy ho tea i Jehovah ty fahantra’ay.” Izao ka ty nirehafe i rahavave Fe Abad: “Nikezake nifandrambe maifitse amy i Jehovah avao zahay mirovaly naho fa niatreke olagne ara-bola. Nanagne fiaignagne tsotra zahay faie nifale avao. Voka’e, nanjare nianatse niantehetse amy i Jehovah ka i ana’ay rey.”

 Izao ty nirehafe i Lucila, mitoboke amy ty tokonose Samar agne: “Ndra tie mahantra aza tika, le tsy olagne amantika zay noho itika manompo i Jehovah. Naho ty fanompoagne an’Andrianagnahare ro ataontika voalohan-draha, le afake ty ho fale naho ho afa-po sady hanagne toe-tsaigne soa avao tika. Tena nahafale ahy ty nahatrea ty mpianako Baiboly nanjare nahafantatse i Jehovah. Nahafale ahy ka ty nahatrea iareo nanao mpisava lalagne naho fa tafara tatoy.”

 Fantantika tie hiatreke raha sarotse tika amy ty hoavy. Andao areke hotadidientika ty raha nisorate ty androanavi-pagnahy atao tihoe Rodolfo toy. Hoe reke: “Nahatsapa ty fagnampea i Jehovah naho ty hatea’e raho tagnate i fotoan-tsarotse tamy 1970 naho 1980-y. Ndra tie tsy le nanam-bola fire aza raho, le tsy nahatsapa ho nahaferenaigne. Tena nikarakara soa ahy ty Jehovah. Le vata’e mahafa-po ahy ty fiaignako sady fa tsy ligneko ka ‘i tena fiaignagne’ amy paradisa aoy.”​—1 Timoty 6:19.