FANTARO TY TANTARANTIKAGNE
Maro ty Ndaty Ampianaregne Mamaky Teny Naho Manoratse Magneran-tane
Hoe ty Agostinho, a Brezila agne: “Tamo o toeragne famboleagneo agne ty nahabey ahy, sady nahantra ka zahay. Tsy maintsy nijanogne tsy nianatse sasa raho, le nipay asa mba hagnampeagne ty ndaty tama’ay ao.” Fa 33 taogne ty Agostinho vaho izay nahay namaky teny naho nanoratse. Hoe reke: “Nanjare nahatsiaro ho managne ty maha ie ahy raho naho fa nahay namaky teny naho nanoratse.”
Ndaty 250 000 mahery ty fa nampianare o Vavolombelo i Jehovah-o hamaky teny naho hanoratse tagnate ze 70 taogne lasa zay, le agnisa izay ty Agostinho. Fa ino ty anto’e mahavy iareo manao izay? Ino ty soa azo o ndatio boake amy i fianaragne rey?
Sarotse ty miana-draha naho fa tsy mahay mamaky teny naho manoratse rehe
Nitory tamy ty firenena 115 o Vavolombelo i Jehovah-o tamy 1935. Naho fa nitory tamy ty ndaty nampiasa firehake sambe karaza’e o misionerao, le nandefa lahajaka ara-baiboly nalaem-peo amy ty fireha i ndatỳ ndra nagnomey boke aze amy ty fireha’e. Tena maro ty liagne tamy ty raha rehafe o Baibolio. Faie nisarotse tamy ty ankamaroa iareo ty niana-draha, satria tsy nahay namaky teny naho nanoratse iareo.
Tsy afake namaky Baiboly o ndaty rehoe. Ty voka’e, sarotse tamy iareo ty nagnorike ty fanoroagne agnate’e ao. (Josoa 1:8; Salamo 1:2, 3) Tsy afake namita ty andraikitse toko’e hatao o Kristianao ka iareo. Naho tsy mahay mamaky teny ohatse o rae aman-dreneo, le ho sarotse amy iareo ty hampianatse ty ana iareo Baiboly. (Deoteronomia 6:6, 7) Tsy afake nampiasa Baiboly ka o mpitory vaovaò naho fa nampianatse Baiboly satria tsy nahay namaky teny.
Nisy kezake manokagne natao mba hagnampeagne o ndaty tsy mahay mamaky teny naho manoratseo
I Nathan Knorr naho i Milton Henschel ty agnisa ty nitarike ty asa o Vavolombelo i Jehovah-o tamy taogne 1940 naho 1950 tagne ho agne. Nitete tane maro iareo mba handamigne o asa fitoriagneo. Maro ty ndaty tsy nahay namaky teny naho nanoratse tamy ty tane ila’e agne. Nirisihe iareo areke ty birò i sampagne tamy i toeragne rey agne mba handamigne fianaragne mamaky teny naho manoratse amo o fiangonagneo eo.
Naboake tamy ty havoriambey tamy 1954, ta Chingola, a Zambia agne, i bokekele fianaragne mamaky teny amy ty firehake cinyanjaỳ
Nimea i birò i sampagne toromareke o fiangonagneo tie akore ty toko’e hanoagne i fianaragney. Fa nisy tekinike ndra boke fampianaragne o ndatio tamy ty firenena ila’e agne, le irey avao ty nampiasae ty Vavolombelo i Jehovah tagne. Nimea o fanjakagneo fitaovagne naho boke ohatse ty sampa i Brezila, le nalefa tamo o fiangonagneo agne i fitaovagne rey. Faie tsy hoe izay ty tamy ty tane ila’e agne, satria ty Vavolombelo i Jehovah tagne ro tsy maintsy nipay tekinike hampianaragne o ndatio.
Natao hoahy ze kila ndaty o fianaragne iohoe, ndra ampela zay ndra lahilahy, ndra antetse ndra tanora. Nampeagne i ndatỳ mba hahay hamaky teny amy ty fireha’e. Nanjare firehake maromaro areke kindraike ro tsy maintsy nampianaregne tamy ty fiangonagne raike.
Mahasoa o ndatio i fianaragney
Ino ty soa azo o ndatio boake amy i fianaragney? Hoe ze Vavolombelo i Jehovah raike a Meksika agne zay: “Manjare azoko soa hinane zao ty raha rehafe o Baibolio, sady tena manohigne ty foko. Nanjare tsy natahotse ty hirehake amo o mpiara-monegne amakò ka raho naho fa nahay namaky teny. Maro aza ty ndaty nanjare azoko nagnambaràgne ty raha rehafe o Baibolio.”
Faie tsy tihoe magnampe o ndatio hahafantatse ty raha rehafe ty Baiboly avao i fianaragney. Hoe ty Isaac boake a Burundi agne: “Nanjare afake nianatse ty miomba o famboaragne tragnò ka raho naho fa nahay namaky teny naho nanoratse. Ty voka’e, nanjare mpamboatse tragno raho. Magnara-maso zao ty asako naho fa misy fagnoregnagne lahibey hatao.”
Fampianaragne mamaky teny chichewa tamy ty Anjomba i Fanjakagney a Lilongwe, a Malawi agne, tamy 2014
Fa 49 taogne ty Jesusa tamy i reke nanomboke nianatse namaky teny naho nanoratsey. Hoe reke: “Mpiasa an-tragno raho, le mila magnente ty vily o entagneo naho ty agnara ty raha avily a bezara ey. Sarotse tamako ty nanao izay tie taloha. Hasoan-draha fa nisy i fianaragne mamaky teny naho manoratsey. Manjare matoky tegna raho hinane zao naho fa manao bezara.”
Fa tagnate ty taogne maro ty manam-pahefagne amy ty tane maro agne ro nidera o Vavolombelo i Jehovah-o tamy kezake natao iareo mba hampianaragne o ndatio hamaky teny naho hanoratse. Mbe mampianatse o ndatio mamaky teny naho manoratse o Vavolombelo i Jehovah-o hatrake amy izao, sady mihasoa lognandro ty fomba fampianara iareo naho ty fitaovagne ampiasae iareo. Namboatse ze bokekele rezay iareo mba hagnampeagne o ndatio hahay mamaky teny naho manoratse. Fa ho 224 tapetrisa zay ty natao pirinty tamo o bokekele rehoe, amy ty firehake 720. a
a Misy amy ty firehake 123, ohatse, i bokekele tihoey Kezaho ty Mamaky Rehake Naho Manoratse, le misy amy ty firehake 610 i bokekele tihoey Janjigno ty Andrianagnahare.
