Tam-panomboha ty taogne 1930, le mbe tsy nisy Vavolombelo i Jehovah nitory ty ta Indonezia agne, ta Malazia agne naho ta Papouasie Nouvelle Guinée agne. Akore areke ty nahavy ty ndaty tamo o tane rehoe agne naharey i talily soay? Nivily ze sambo misy motera’e zay areke ty sampa i Aostralia. Enegne amby folo metatse eo ho eo ty halava’e. Lightbearer ndra Mpinday Hazavagne ty agnaragne nimeagne i samboy. Ty anto’e, nampiasaegne mba hinday hazavagne ara-pagnahy amy ty tane fara’e lavitse agne o sambo iohoe. (Matio 5:14-16) Mpisava lalagne a fito ty nandeha tama’e.

 Niala ta Sydney, Atignana i Aostralia agne o mpisava lalagne rehoe tamy Fevrie 1935, le nandeha ta Port Moresby, a Nouvelle Guinée agne. Namintagne iareo naho fa tan-dalagne ey. Mateteke ka iareo ro nijanogne naho fa nisy figaràn-tsambo, mba hivily essence naho hanegne sady nagnamboatse ze simba tamy i samboy. Niala ta Cooktown, a Queensland agne iareo tamy 10 Avrily 1935. Vinelo iareo i motera i samboỳ naho fa nandalo tamy i akoran-driake jabajaba magnoho-dozay iareo. Faie ndra nihafahafa zay ty fagneno i moteray, le tsy maintsy nivonoegne. Hiheregne vao iareo, sa mbe hanohy i lia iareo ho a Nouvelle Guinée agney avao? Hoe ty Eric Ewnis, i kapiteny i samboỳ: “Tsy te hiheregne zahay.” Nivelare iareo areke i lay i samboỳ, le nanohy i lia iareoy avao iareo. Nitoly soa a Port Moresby agne i sambo mpinday hazavagney tamy 28 Avrily 1935.

 Namboaregne i motera i samboỳ naho fa niavy ta Port Moresby tao. Faie nagnararaotse nitory i talily soay tamy i tanàgney teo i rahalahy rey, ankoatse i rahalahy Frank Dewar. Mpisava lalagne tsy mate totoegne ty agnaragne nimey ze rahalahy raike niarake tamy iareo zay i Frank. Hoe ty Frank: “Nangalake boke maro raho, le nandeha tomboke 32 kilometatse ndra va’e nihoatse izay mba hitory amo o ndaty mpifindra monegneo.” Naho fa niheregne reke, le lalagne hafa ty nomba’e sady tsy maintsy nandalo tamy i renerano kedekede misy voae zay. Faie nitao soa reke, le nitoly soa a tanàgne agne avao. Nisy voka’e soa ty kezake natao iareo naho fa tafara tatoy. Ty anto’e, nanjare Vavolombelo i Jehovah ty ila’e amy i ndaty nandrambe ty boke nimeagne iareo rey.

 Naho fa nivita i moteray, le niala ta Port Moresby tao ty Lightbearer, le nandeha ta Java agne. A Holandy, Atignana i Inde agne ty misy o tanàgne iohoe. Mateteke iareo ro nijanogne naho fa nahatrea tanàgne mba hivily hanegne. Niavy ta Batavia agne i samboy tamy 15 Jolay 1935.

 Agnisa ty nandeha tamy i sambo mpinday hazavagney ka ty Charles Harris. Faie nijanogne ta Java tao reke, tamy iareo nandalo tagney, le nitoria’e ze tanàgne tamo o tokonose iohoe tao. b Hoe reke: “Nametrake boke ara-baiboly ty tena natao’ay tamy izay. Ie tafara izay zahay, le nifindra tamy ty tanàgne hafa agne ka. Ninday boke naho gazete amy ty firehake anglisy, arabo, holandey, indoneziana naho sinoa raho. Tena tea o ndatio i raha rey, le 17 000 mahery ty boke naho gazete nivoazarako isan-taogne.”

 Tena nazoto nitory ty Charles, hafara’e nivoamare ze manam-pahefagne holandey zay. Nagnontane ze rahalahy raike nitory ta Java agne zay o manam-pahefagne iohoe. Hoe reke: “Fire ty Vavolombelo i Jehovah mitory a Java Atignanagne agne, amy i tanàgne misy i Charles-y agne?” Le hoe i rahalahỳ: “Raike avao!” Le nitrevoke aze i manam-pahefagney tie: “Aia ka kahe le ho maregne zay? Kanao maro ty boke voazara mbeombeo, le tsy maintsy maro ka ty mpitory agne.”

 Niala ta Indonezia agne i Lightbearer-y, le niavy ta Singapour tagne tamy 7 Aogositra. Nandefa lahajaka ara-baiboly nalaegne feo i rahalahy rey isake tie nijanogne. Tena magneno ty parilera i samboy, le igne ty nampiasae iareo mba handefasagne aze. Mateteke ro nimaro ty ndaty nivoasintogne tamo o fomba fitory iohoe. Izao ohatse ty nirehafe ze gazete raike atao tihoe Singapore Free Press zay: ‘Nisy feo ty boake an-driake ey, tamy i Larobia halegney. Kay toriteny nalefa boake amy i sambo “Lightbearer-ỳ” i feoy. Mandefa ty toriteny o Vavolombelo i Jehovah a Singapour etò o sambo iohoe amparake ze niavia’e boake Aostralia agne zay.’ Nirehake ka i gazetey tie ‘naho tsy avy i oragney ndra tsy mitioke i androy, le tena rey soa i toriteny rey, ndra tie eo amy ty telo ndra efatse kilometatse miala i samboy aza ty misy azo.’

 Mbe nijanogne ta Singapour tao avao i sambo Lightbearer-y. Fa i Frank Dewar ro nandeha sady namonje i faritane’e vaovaoy. Hoe reke naho fa nahatsiaro i fotoagne nandehana’ey: “Tagnate i samboy ao ty nitoboha’ay tamy izahay nanomboke nitory ta Singapour taoy. Nisy raha nirehafe i Eric Ewin zay tena nahaendrake ahy, tamy i fotoagne nialà iareo taoy. Hoe reke: ‘O Frank, i rehe moa fa nirehake tie i Siam (Tailandy amy izao) ty faritane nijobogne’o. Eto zane ty fara’e azo’ay agnateragne azo, le mahazo mandeha amy izay rehe.’ Tena nitaitse raho, le izao avao ty nibeiko: ‘Tsy fantako ndra raike anio tie aia ty misy ze o Siam zao!” Nirehake tamy i Frank ty Eric tie ho avy agne rehe naho mandeha lamasina boake a Kuala Lumpur agne. (I Malezia ty irehafagne o tane iohoe amy izao.) Nandeha a Kuala Lumpur agne areke ty Frank, le niavy ta Tailandy agne reke volagne tsiampeampe tafara izay. c

 Nandeha ahandrefa i Malezia agne i sambo Lightbearer-y. Nijanogne reke naho fa ta Johore Bahru, Muar, Malacca, Klang, Port Swettenham (Port Klang amy izao), naho ta Penang agne. Nandefa lahajaka ara-baiboly nalaegne feo i rahalahy rey isake tie nijanogne. Hoe ty Jean Deschamp, Vavolombelo i Jehovah nanompo ta Indonezia agne tamy izay: ‘Ndra raha boake amy ty planeta hafa aza tsy hahaliagne ndaty maro hoe izay.’ Nizotso boake amy i samboy ey i rahalahy rey naho fa nivita i lahajakay, le nizara boke naho gazete tamy ze ndaty liagne.

 Nandeha tamy ty ria i Malacca i samboy naho fa boake ta Penang agne, le nandeha a Medan a Sumatra agne. (I Indonezia ty irehafagne o tane iohoe amy izao.) Hoe ty Eric Ewins: “Tena nitea’ay ty nijanogne ta Medan agne, sady tena maro ty ndaty nitsanogne i talily soay tagne.” Boke naho gazete 3 000 teo ho eo ty nizarae o rahalahy rehoe tamo o faritse iohoe.

 Nandeha niagn’Atimo i Lightbearer-y, le nandalo tamy i figaràn-tsambo bey tamy i faritse atignana i Sumatra agne zay. Nitory avao o rahalahy rehoe isake tie nijanogne tamy i figaràn-tsambo rey. Niheregne ta Singapour agne i samboy tamy Novambra 1936, sady tsy nandeha niarake tama’e sasa ty Eric Ewins. Nanambaly Irene, Vavolombelo i Jehovah nitoboke ta Singapour tagne ty Eric heregnandro tsiampeampe tafara izay. Niarake nanao mpisava lalagne ta Sumatra agne iareo naho fa niavy eo. Nipay kapiteny vaovao areke ty Lightbearer.

 I Norman Senior, tan-tsambo fa za-draha zay indraike areke ty nanjare kapiteny i samboy. Niavy boake a Sydney agne reke tamy Janvie 1937. Niala ta Singapour tao areke i rahalahy rey, le nandeha ta Bornéo agne naho ta Célèbes (Sulawesi ty irehafagne aze amy izao). Nitory tamy ty toeragne maro iareo naho fa niavy agne, hafara’e nandeha hatrake amy ty tanàgne 480 kilometatse agne.

 Naho fa tam-pigaràn-tsambo a Samarinda a Bornéo agne ty Lightbearer, le tsy nimea ty mpiandraikitse i figaràn-tsamboy alalagne hitory tamy i tanàgney eo i rahalahy rey. Faie nenga’e hitory tao avao i rahalahy rey naho fa nihazavae i Norman tama’e ty miomba i asa fitoriagne ataontikagney. Ie aza nandrambe naho fa nimeagne ze boke tsiampeampe rey zay.

 Nisy mpitarike fivavahagne zay ka nangatake tamy i Norman mba hitory teny am-piangonagne amy iareo ao tie indraike. Faie tsy nanao lahajaka ty Norman, fa lahajaka nalaegne feo dime ty nalefa’e tamy ty grafofone. Tea i mpitarike fivavahagne ty raha nirei’e, le nangatake boke naho gazete tsiampeampe reke mba homei’e ty nama’e. Faie nisy mpitarike fivavahagne ila’e tsy nitea ty asa fitoriagne atao o Vavolombelo i Jehovah-o. Niboseke iareo naho fa nahatrea i rahalahy rey sahy nitory, sady sinere iareo aza o manam-pahefagneo mba tsy hampilitse i Lightbearer-y amy ty figaràn-tsambo hafa.

 Noho ty fandraragne nanoe o mpitarike fivavahagneo, le niheregne ta Aostralia agne ty Lightbearer tamy Desambra 1937. Ara-potoagne soa ty niavia i rahalahy rey tamy ty figaràn-tsambo i Sydney tagne, le afake nagnatreke i havoriambey vondrom-paritse nanoe ty Vavolombelo i Jehovah tamy Avrily 1938 iareo. Ela ty ela ta niavy ta Sydney tao avao indraike ty Lightbearer. Telo taogne mahery zay ty niala’e tao. Navarotse o sambo iohoe tam-panomboha ty taogne 1940, tafara kede ty nandraragne ty asa ty Vavolombelo i Jehovah ta Aostralia agne. Hoe ty Rahalahy Ewins: “Tena bey ty nivita i Lightbearer.” Nirehake ka reke tie ty fanompoagne nanoe’e tamy ie nandeha tamo o sambo iohoey ty fotoagne tena fara izay ty tea’e tamy ty fiaigna’e.

 Nitongy ty voa i Fanjakagney tamo o tane bey sady maro ndatio agne i rahalahy nandeha sambo Lightbearer rey. Ndra tie teo aza i fandraragne rey, le nitombo tsikedetsikede ty ndaty nanjare Vavolombelo i Jehovah. (Lioka 8:11, 15) Ty anto’e, fa 40 000 mahery ty isa ty mpitory amy i toeragne nitoria i mpisava lalagne voalohandoha’e rey tagne amy hinane zao. Nagnenga lova sarobily vata’e i rahalahy bey herim-po rey naho i sambo mpinday hazavagne nandehana iareoy.