Eo ho eo amy ty 70 tapetrisa ty ndaty karegnegne magneran-tane, le 200 mahery ty firehake baiko moagne misy. Mampiasa firehake baiko moagne ty ankamaroa iareo naho fa mifampirehake. Faie mampalahelo, fa mateteke iareo ro ampijalé o ndatio. Mareho amy ty tatetse retoa ty fomba isehoa izay:

•   “Magneran-tane, le mateteke ro tsy darea o ndatio ty zo anagna ty ndaty karegnegne naho ty ndaty tsy le maharey soa.”​—Fikambana ty Karegnegne a Etazonia agne.

•   “Agnisa ty ndaty fara izay ty mahantra magneran-tane o ndaty karegnegneo. Mateteke ro tsy mitovy amy ty fampianaragne azo o ndatio ty fampianaragne azo iareo, ty asa atao’e, naho ty fahalalagne azo’e.”​—Foibey ty Karegnegne Magneran-tane.

 Akore ty tsapa i Jehovah naho fa mahavazoho o ndaty karegnegneo? Ino ty raha rehafe ty Baiboly miomba iareo? Le akore ty agnampea ty Vavolombelo i Jehovah o ndaty karegnegneo ty amy izao?

Ty Fiheveran’Andrianagnahare o Karegnegneo

 Rehafe ty Baiboly fa mikarakara o ndaty karegnegneo ty Jehovah a Andrianagnahare. Tsy tea’e naho ampijalegne iareo fa tea’e naho mandrambe soa boake amy ty fampianaragne omei’e.

 Andinin-teny: “Ko magnozogne o karegnegneo.”​—Levitikosy 19:14.

 Andinin-teny: “Tsy magnavakavake ty Andrianagnahare.”​—Asan’ny Apostoly 10:34.

 Andinin-teny: ‘Le nandeha nitsoeke ... nitory ty talily soa i Fanjakagney ty Jesosy.’​—Matio 9:35.

 Andinin-teny: ‘Nampahareize i Jesosy ty ndaty karegnegne, le nampirehafe’e ty ndaty moagne.’​—Marka 7:37.

 Andinin-teny: “Hampahareizegne ty sofy ze karegnegne.”​—Isaia 35:5.

 Ino ty tea’e horehafegne? Fa nisaontsie i Jehovah mialoha fa haharey o ndaty karegnegneo.​—Isaia 29:18.

Akore ty Agnampea ty Vavolombelo i Jehovah o Ndaty Karegnegneo ty amy Izao?

 Magnambara hafatse magnomey fampitamagne hoahy o ndaty karegnegne magneran-taneo ty Vavolombelo i Jehovah. Akore ty anoa’ay izay? Mampiboake Baiboly naho video fampianaragne Baiboly amy ty firehake baiko moagne losotse ty 100 zahay. Mampianatse Baiboly naho mandamigne fivoriagne amy ty firehake baiko moagne ka zahay. Maimaim-poagne ty anoa’ay izay hoahy ze ndaty mipay ty fagnampean’Agnahare. Fa nagnino? Satria izao ty nandilia i Jesosy: “Fa nahazo maimaim-poagne nareo, le magnomea maimaim-poagne.”​—Matio 10:8.

 Azo henteagne amy internet ao ndra sintone’o amy i fitaova’oy ao zay, le anò ze hahatreava’o aze:

 Amy JW.ORG ao. Naho fa tafilitse ao rehe, le gineho i fagnovàgne firehake amy fara’e amboneý mba hahatreavagne i firehake baiko moagne paliae’oy.

 Amy ty application JW Library Sign Language ao. Aziliho maimaim-poagne amy i fitaova’oy ao o application iohoe, amy izay rehe ho afake hanintogne ndra hagnente mivantagne i video amy ty firehake baiko moagne rey.

Ino Iaby ty Fitaovagne Fampianaragne Ara-baiboly Aboa’ay?

 Baiboly amy ty firehake baiko moagne. Ty Soratse Masigne Dikan-drehake Tontolo Vaovao amy ty Firehake Baiko Moagne Amerikana ty Baiboly feno voaloha’e naboa’ay tamy ty firehake baiko moagne. Maro ka ty firehake baiko moagne managne i Dikan-drehake Tontolo Vaovaoy feno ndra ty ampaha’e ama’e. Isan-taogne le mitombo avao ka ty firehake andikagne aze. (Mba hahafaha’o mahatrea i firehake rey ndra hahafaha’o mahatrea Baiboly amy internet ao, le henteo ty efajoro tihoe “ Dikan-drehake Tontolo Vaovao, Baiboly amy ty Firehake Baiko Moagne.”)

•   Henteo ty video tihoe Fa Misy amy ty Baiko Moagne Amerikana i Baiboly Dikan-drehake Tontolo Vaovaoy Feno, mba hahatreava’o ty asa atao’ay amy ty fampiboahagne Baiboly amy ty firehake baiko moagne.

•   Mba hagnasoa’o ty famakia’o Baiboly, le aziliho agnate i fitaova’oy ao ty application JW Library Sign Language. Hagnampe azo hahatrea andinin-teny voafaritse soa amy ty firehake baiko moagne o application iohoe.

•   Karegnegne ty Dmytro naho i Vita fa ty ana iareo maharey. Isan’andro, le mandrambe soa iareo keleian-draike naho fa magnente video misy Baiboly nadika amy ty firehake baiko moagne.

 Video mampianatse Baiboly. Mampiboake video maro amy ty firehake baiko moagne o Vavolombelo i Jehovah-o mba hagnampeagne o ndatio hahazo naho hampihatse ty toroheve ty Baiboly hoahy ty ...

•   Mpivaly naho ty keleiagne

•   Tanora

•   Ajaja

 Fianaragne Baiboly miarake amy ty mpampianatse. Afake ty hahazo ty fampianaragne boake amy Baiboly ao amy ty firehake baiko moagne rehe naho manokagne fotoagne hianaragne aze miarake amy ty mpampianatse. Mangataha hianatse Baiboly maimaim-poagne, le hatoro azo ty fomba fianaragne aze.

 Nitrea i Jeson Senajonon mitoboke a Filipiny agne zao ohatse tie nagnampe aze hifandrambe maifitse aman’Andrianagnahare ty fianara’e Baiboly.

 I Mario Antúnez ni-pastera tamy ty fiangonagne raike ta Honduras tagne ka zao le nirehake fa nitrea’e ty vale ty fagnonteneagne ara-baiboly nanahiragne aze. Henteo amy ty lahatsoratse tihoe ‘Be dia Be ny Fanontaniako Mbola Tsy Voavaly’ ty tantara’e.

 Fivoriagne naho ty fandaharagne hafa. Misy fiangonagne naho antokom-pitory maro amy ty firehake baiko moagne magneran-tane. Miarake mianatse naho manompo an’Andrianagnahare o ndaty karegnegneo isan-keregnandro. Mandamigne havoriambey natao hampianaragne Baiboly amy ty firehake baiko moagne ka zahay isan-taogne. Ty amy i fivoriagne naho i fandaharagne rey ao ka le misy fandikan-drehake hoahy ty ndaty karegnegne sady goa. Fa misy amy ty firehake braille ka ty boke naho gazete aboa’ay sady maimaim-poagne.

•   Paliao ze fiangonagne marine azo.

•   Fantaro ty havoriambey fatao’ay isan-taogne.

•   Magnatreha ty Fahatsiarovagne ty nimateza i Jesosy. Io ty fotoagne tena miambake ama’ay isan-taogne.

 Mitoboke a Meksika agne ty José Luis Ayala. Fa karegnegne boake an-troke agne reke, le naho fa tafara toy nanjare goa. Mareho ty fomba nagnampeagne aze mba hanjare mpampianatse Baiboly mahay.