Mbe voafetra avao ty hanegne azo tamiriegne magneran-tane noho i aly a Ukraine agney naho ty fiovaovà o toets’andrò. Amo o tane mahantrao agne ty tena ahatreavagne izay, satria sahiragne ty ankamaroa ty ndaty agne vaho mahatrea ty raha hohane’e.

•   “Manjare sarotse ty mahavokatse naho ty mipay hanegne noho o alio naho ty fiovaovà o toets’andrò.”​—António Guterres, sekretera Jeneraly i ONU, 17 Jolay 2023.

•   “Tsy neké o Rosianao sasa i fifagnarahagne miomba ty famoahagne hanegne boake a Ukraine aoy. Mieretseretse areke o manam-pahaiagneo tie vao mainke hanjeke ty hakeregne magneran-tane sady hionjogne ka ty vily o hanegneo amy ty tane mahantra agne. Le i Afrika Avaratse naho i Moyen-Orient ty tena ho lafo ty vily ty hanegne agne.”​—Atalayar.com, 23 Jolay 2023.

 Mareho tie ino ty raha rehafe ty Baiboly miomba o hakeregneo naho ty raha hiseho amy ty hoavy.

•   Izao ty faminaniagne nirehafe i Jesosy: “Hisy firenena hialy amy ty firenena, le hisy fanjakagne ka hialy amy ty fanjakagne. Sady hisy hakere.”​—Matio 24:7.

•   Mirehake miomba ty mpitingitse sovala efatse ty Boke i Apokalypsy. Manondro aly ty raike amy ireo. Nisy mpitingitse sovala raike nagnorike aze. Manondro o hakeregneo o sovala iohoeke. Ty dika izay, ho sarotse ty hahatrea hanegne amy ze fotoagne zay sady hionjogne iaby ty vilin-draha. “Treako fa inge nisy sovala mainte sady nisy balantsy ty tan-tagna i mpitingitse azey ey. Naharey feo . . . raho manao tihoe, ‘denaria raike ty vily ty varem-bazaha kilò raike sady denaria raike ty vily ty vare orza telo kilò!’”​—Apokalypsy 6:5, 6.

 Fa tanterake amo o ze fotoagne rehafe ty Baiboly fa “andro fara’e” zao o faminaniagne miomba ty hakeregne rehoeke. (2 Timoty 3:1) Naho mipay fagnazavagne fagnampe’e miomba tihoe “andro fara’e” naho i mpitingitse sovala efatse rehafe i Boke i Apokalypsỳ rehe, le henteo ty video tihoe Niova ty Tontolo toy Nanomboke Tamy 1914. Vakio ka ty lahatsoratse tihoe “Iza Ireo Mpitaingin-tsoavaly Efatra?”

•   Misy torohevetse azo ampiharegne ty agnate Baiboly ao. Afake magnampe azo mba hiatreke olagne rey. Ohatse zao naho fa miakatse ty vilin-draha ndra naho fa misy ty hakeregne. Ty ila’e amy izay, le hotrea’o amy lahatsoratse tihoe “Ahoana Raha Lasa Nihena ny Vola Miditra Aminao?”

•   Mampitamà ka ty Baiboly fa mbe hihasoa ty fiaignagne. Rehafe’e ao fa “hahavokatse ty tane toy” sady hanagne hanegne iaby o ndatio. (Salamo 72:16) Naho mipay fagnazavagne fagnampe’e miomba ty hoavy naho ty anto’e mahavy azo toko’e hatoky izay rehe, le vakio ty lahatsoratse tihoe “Mbola Hihatsara ve ny Fiainana Amin’ny Hoavy?”