Tamy 2022 zao, le nahatratse hatrake amy 2,24 tapetrisa tapetrisa dolara amerikana ty vola lany amo o maramilao magneran-tane. Mbe tsy nisy ndra ho indraike ty fandaniam-bola hoe izay. Ty aly atao i Rosia naho Ukraine ty nahavy izay. Izao ty tatetse naboa ty Stockholm International Peace Research Institute (SIPRI) tamy Avrily 2023, miomba ty raha niseho tamy 2022:

•   “Nionjogne 13 isan-jato” ty vola nilanie ty firenena a Eropa ao amo o maramilao. “Tafara ty taogne 1991, le io ty fitomboagne fara izay ty bey tamy ty vola nilanie ty firenena a Eropa ao tagnate ty tao’e raike.”

•   “I Rosia zao le nampitombo 9,2 isan-jato ty vola nilanie’e amo o maramilao. Taloha zao reke le nifahadime tamy ty firenena nandany vola amo o maramilao magneran-tane. Faie amy izao reke nanjare fahatelo magneran-tane.”

•   I Etazonia ty voaloha’e amy ty firenena mandany vola amo o maramilao satria “ty 39 isan-jato ty vola nilaniegne hoahy ty maramila magneran-tane” ro lanie’e amo o maramila’eo.

 Hoe ty Dr. Nan Tian, agnisa ty nanoratse i tatetse naboa i SIPRI-y: “Vao mainke manjeke ty tsy filaminagne magneran-tane, le izay ty anto’e mahavy o fanjakagneo mampitombo lognandro ty vola lanie’e amo o maramilao.”

 Fa nirehafe ty Baiboly mialoha fa hifaninagne o fanjakagne matanjake magneran-taneo sady toe treantika zay amy hinane zao. Fa nirehafe’e avao ka tie ino ty raha azontika tamaegne fa tena hampisy i tena fiadanagney.

•   Rehafe ty Baiboly fa miaigne amy ty “fotoa ty fara’e” tika.​—Daniela 8:19.

•   Fa nirehafe ty boke i Daniela mialoha fa hifaninagne o fanjakagne matanjakeo amo o fotoagne iohoe. “Hifanoseke” iareo, ty dika izay hifaninagne satria sambe te hanjare fanjakagne fara izay ty matanjake. Handany “harena” ndra vola bey iareo mba hanoagne izay.​—Daniela 11:40, 42, 43.

 Naho te hahazo fagnazavagne fagnampe’e miomba o faminaniagne boake agnate Baiboly ao iohoe rehe, le henteo ty video tihoe Faminaniagne Nitanterake​—Daniela Toko Faha-11.

•   Rehafe ty Baiboly fa hosoloen’Andrianagnahare o fanjakàn’olombelogneo. “Hagnoregne fanjakagne” raike reke sady ‘tsy ombia ho rava o fanjakagne iohoe ro tsy homeagne ndaty hafa. Hopotepotehe’e naho hofoagna i fanjakà’ey o fanjakagne rehoe iaby, fa i azey avao ro haharetse nainai’e.’​—Daniela 2:44.

•   Tsy ho ela ty Jehovah a Andrianagnahare le hanao ze raha tsy vita o ndatio ty manao aze. Agnisa izay ty hampisy ty tena fiadanagne naho filaminagne magneran-tane. An-dagnitse agne o fanjakagne iohoe, le io ty hampiasaen’Andrianagnahare mba hamotepoteke o fitaovam-pialiagneo sady hagnafoagne o hampiarotegneo.​—Salamo 46:8, 9.

 Naho tea’o ty hahafantatse ty raha hatao i Fanjakàn’Andrianagnaharey, le vakio ty lahatsoratse tihoe “Ho Be ny Fiadanana” Rehefa Hitondra ny Tany Ilay Fanjakana.