Le vata’e mampiriatse holitse ty raha niseho magneran-tane nanomboke tamy ty volagne Jolay 2022. Izao ty raha niseho miomba ty hampiarotegne amy ty alala ty fitifiragne basy:

•   “Nahaboseke ty ndaty tamy ty tanà i Japon sady tsy nampoize ty ndaty magneran-tane ty namonoagne i Shinzo Abe [i Praiminisitse taloha sady mpanao politike tena nalazay]. Niboseke iareo satria tsy le ahatreavagne vono ndaty manahake izay ty ta Japon agne sady ty lalàna apetra iareo miomba ty fampiasagne basy ka le vata’e mafemafe.”​​—10 Jolay 2022, The Japan Times.”

•   “Nisy lahilahy raike ninday basy le namono ndaty telo, tamy ty labodike bey ta Copenhague ao. Tsy nampoize ty ndaty a Danemark ao ze raha zay.”​​—4 Jolay 2022, Reuters.

•   “Afrika Atimo: Nisy lahilahy maromaro ninday basy nizilike tamy ty bara raike amy ty tanà i Soweto ao, le ndaty 15 ty nimate.”​​—10 Jolay 2022, The Guardian.

•   “Fa losotse ty 220 ty ndaty nimate nisy nitifitse a Etazonia agne, tamy ty fara heregnandro 4 Jolay. Andro tsy fiasagne ty ta Etazonia agne tamo o 4 Jolay iohoe.”​​—5 Jolay 2022, CBS News.

 Mbe hifaragne vao ty hampiarotegne hoe ireo indraike andro agne? Ino ty rehafe ty Baiboly?

 Atao ty Baiboly tihoe “andro fara’e” ze o andro iaignantikagne zao. (2 Timoty 3:1, 3) Amo o fotoagne iohoe le tena hasiake, ho tea aly o ndatio. Maro ty hampiarotegne voka izay, le fa matahotse avao o ndatio. (Lioka 21:11) Faie mampitamà ty Baiboly tie mbe hisy fifaragna’e o hampiarotegneo sady ‘o ndatio, hitoboke amy ty toeragne anjakà ty fiadanagne, tsy misy raha mampatahotse sady milamigne.’ (Isaia 32:18) Faie akore ty hahatanterake izay?

 Hafahan’Andrianagnahare ty ndaty raty fagnahy sady hopotehe’e o fitaovam-pialiagneo.

•   “Fa ty raty fagnahy horinganegne tsy ho amy ty tane toy.”​—Ohabolana 2:22.

•   “Atao’e [Andrianagnahare] ty tsy hisia o alio sasa magneran-tane. Tapatapahe’e ty folesidory sady potepotehe’e ty lefogne. Oroa’e ty sareten-tsovala findese o maramilao mialy.”​—Salamo 46:9.

 Hampianaren’Andrianagnahare o ndatio mba hahay hilongo soa ama o ndaty amy izay le lia’e ho foagne o hampiarotegneo.

•   “Tsy hagnisy raty ndra ia ndra ia iareo, sady tsy hanimba ndre inogn’ino magneneke ty vohiko masigne, satria ho feno fahalalagne miomba i Jehovah ty tane toy, manahake ty andrakofa o ranò ty lavake magnambane o riakeo.”​—Isaia 11:9.

•   Ndre amy hinane zao, le fa mampianatse ty ndaty magneneke ty tane toy mba tsy ho mpiarotegne naho tsy hampiasa fitaovam-pialiagne ty Andrianagnahare. Hoe ‘manefe ty mesabei’e ho lasarỳ iareo, vaho ty lefo’e ho mesa fanapaham-boaloboke.’​—Mika 4:3.

 Vakio ty lahatsoratse tihoe “Ho Foana ve ny Tahotra Indray Andro Any?” mba hahatreava’o fagnazavagne fagnampe’e miomba ty fampitamà ty Baiboly tihoe tsy hisy sasa ty raha mampatahotse ambone tane etoa.

 Mba hahafantara’o ty vahaolagne maharetse amo o hampiarotegneo, le vakio ty lahatsoratse tihoe “Ela ny Ela ka Hilamina Ihany ny Tany!”