Ino ty Rehafe ty Baiboly Miomba o Hakeregne amy Izaò?
“Tsisy ndaty ho keré.” Izay ty tea o mpitondra fanjakagne magneran-taneo hatao mba hamahagne ty raike amo o olagne tena lahibey manahiragne o ndatiò. Izay zao ty mahavy iareo mizara hanegne. a Faie hisy fotoagne vao tena tsy hisy sasa o hakeregneo? Ino ty rehafe ty Baiboly?
Fa nirehafe ty Baiboly mialoha tie hisy hakeregne ty amo o androntika zao
Fa nirehafe ty Baiboly mialoha fa hisy hakeregne amo o androntikagne zao. “Andro fara’e” ty itokava’e aze. (2 Timoty 3:1) Tsy boake aman’Andrianagnahare o hakeregneo, faie fa nisaontsie’e amantikagne mialoha tie hisy zay. (Jakoba 1:13) Mareho ty faminaniagne roe rehafe ty Baiboly retoa:
“Hisy keré ... amy ty toeragne sambe hafa.” (Matio 24:7) Fa nirehake mialoha ty Baiboly fa maro ty toeragne hahatreavagne o hakeregneo magneran-tane. Izao ty tatetse boake amo o ndaty mandineke ty fiakara o vokatseo naho o fizaran-kanegneo: “Vao mainke mihamanjeke hinane zao i hakeregney naho ty hanegne tsy ara-pahasalamagne.” b Ndaty an-jato’e tapetrisa boake amy ty firenena am-polo’e hinane zao ty tsy mahazo ty hanegne paliae’e. Fa ty tena mampalahelo, le maro amy i ndaty rey ty mate noho ze raha zay.
“Treako fa inge nisy sovala mainte sady nisy balantsy ty tan-tagna i mpitingitse azey ey.” (Apokalypsy 6:5) Ty rehake tihoe sovala naho i mpitingitse azey amy i faminaniagney ao, le manondro ty hakeré amy ty andro fara’e. c I balantsy an-tagna i mpitingitse azey ty hampiasae’e mba hanjaragne hanegne amy ze ndaty iaby. Trea amy ty raha nirehafe i mpitingitse sovalay fa hionjogne ty vily o hanegneo sady mampitao o ndatio mba tsy handanilany avao ty hane’e. (Apokalypsy 6:6) Treantika amy ty raha miseho fa tena mihamanjeke i hakeregney magneran-tane. Ndaty maro ty tsy managne fahafahagne mba hivily hanegne ara-pahasalamagne.
Akore ty hahafoagne o hakeregneo?
Rehafe o manam-pahaiagneo fa mamokatse hanegne maro mandikoatse ty sahaza o ndatio ty tane toy. Faie ino avao areke ty mbe mampisy o hakeregneo? Sady ino ka ty rehafe ty Baiboly fa hatao i Jehovah, d i Mpamorogne antikagney mba hagnafoagnagne o hakeregneo?
Olagne: Noho o fanjakagneo tsy afake magnafoagne o fahantragneo sady tsy mahavita mampisy ty fitoviagne ara-toe-karena ty anto’e mahavy o ndatio ho keré.
Vahaolagne: Hosoloen’Andrianagnahare i fitondra’e voririkey ndra i Fanjakàn’Andrianagnaharey o fitondran’olombelogne tsy voririkeo. (Daniela 2:44; Matio 6:10) Maro amy ty ndaty amy hinane zao ty mahantra, le sahiragne vaho mahavoavily hanegne, faie hiova zay naho fa i Fanjakàn’Andrianagnaharey ty hitondra. Izao ty rehafe ty Baiboly miomba i Jesosy, i Mpanjaka i Fanjakàn’Andrianagnaharey: “Hovonje’e ze ndaty mahantra naho ze mipay vonje, ty madineke naho ty tsy misy mpagnampe. ... Hahavokatse ty tane toy, le ndra ty ambone i vohitsey ho vokatse iaby.”—Salamo 72:12, 16.
Olagne: Maro ty raha simba noho o alio sady miterake fiovaovagne ara-toe-karena zay. Voka izay le manjare voafetra avao ty hanegne afake zaraegne ndra ka va’e ho voarara.
Vahaolagne: “Mampitsahatse aly amy ze kila tane reke [Jehovah]. Tapatapahe’e ty folesidory sady potepotehe’e ty lefogne. Oroa’e ty sarete findese o maramilao mialy.” (Salamo 46:9) Horingane i Jehovah o fitaovam-pialiagneo naho ze ndaty mitsovotsovoke aly. Tsy ho sahiragne sasa o ndatio ty amy izay fa hahazo hanegne ara-pahasalamagne. Izao ty fampitamà ty Baiboly: “Hihamaro ty ndaty maren-tane sady tena hiadagne.”—Salamo 72:7.
Olagne: Mamono o voleo naho o bibio o toets’andro ratio naho o loza arake ty natiorao.
Vahaolagne: Managne hery afake mifehe ty tane toy ty Andrianagnahare. Mete soa ty lamigne napetra’e miomba ty fitomboa o voleo. Hoe ty Baiboly: “Mampijanogne o tiobeio reke [Jehovah], le tsy mivalitaboake sasa o onjan-driakeo. ... Hovae’e ho tane legne o tane fatrambeio, le ty tane maike hatao’e misy rano mandeha. Hampitobohe’e ao ty ndaty keré. … Hitongy an-tetekey iareo ro sady hambole voaloboke.”—Salamo 107:29, 35-37.
Olagne: Noho o ndatio tea mena naho manao aferafera le izay ty agnisa ty mahavy o hanegneo tsy ho voaro sady tsy ho avy amy ty ndaty toko’e homeagne aze agne.
Vahaolagne: Horinganen’Andrianagnahare ze ndaty tsy maregne naho manao aferafera. (Salamo 37:10, 11; Isaia 61:8) Izao ty rehafe ty Baiboly miomba i Jehovah Andrianagnahare: “I Mpagnomey rare’e ze ndaty gegé o ndatioy, i Mpagnomey hanegne ze keregney.”—Salamo 146:7.
Olagne: Ty ampahatelo ty hanegne magneran-tane ty simba avao ndra montso isan-taogne.
Vahaolagne: Naho fa hitondra i Fanjakàn’Andrianagnaharey, le hovoazara mifagnarake amy ty toko’e ho ie o hanegneo. Nitao soa ka ty Jesosy mba tsy handanilany o hanegneo tamy ireke tambone tane etoỳ. Ohatse zao naho fa ireke nanao fahagagagne mba hagnomeagne hanegne ndaty mihoatse ty 5 000. Tafara izay reke le nampianatse i mpiana’e rey tie: “Avorio o potepote’e tsy lanio tsy ho motso avao.”—Jaona 6:5-13.
Noho i Fanjakàn’Andrianagnaharey hagnafoagne ze raha mahavy o hakeregneo, le afake ty hankamamy o hanegneo o ndatio iaby sady afake ty hihinagne hanegne ara-pahasalamagne. (Isaia 25:6) Naho tea’o ty hahafantatse tie ombia ty hagnatanteraha i Fanjakàn’Andrianagnaharey izay, le henteo ty lahatsoratse tihoe “Rahoviana ny Fanjakan’Andriamanitra no Hitondra ny Tany?”
a Ty Programme de développement durable à l’horizon 2030, le neké ze firenena iaby agnisa ty Firenena Mikambagne tamy 2015.
b Tatetse niombogna ty Sampan-draharaha ty Firenena Mikambagne Miomba ty Hanegne Naho ty Famboleagne, ty Banke Iraisam-pirenena Miandraikitse ty Fampandrosoagne o Famboleagneo, ty Sampan-draharaha ty Firenena Mikambagne Mikarakara o Reneo Naho o Ajajao, ty Programan’asa ty Firenena Mikambagne Miomba ty Hanegne Magneran-tane vaho ty Fikambanagne Iraisam-pirenena Miomba ty Fahasalamagne.
c Naho tea’o ty hahafantatse i mpitingitse sovala efatse amy i Apokalypsy aoy, le henteo ty lahatsoratse tihoe “Iza Ireo Mpitaingin-tsoavaly Efatra?”
d I Jehovah ty tahinan’Andrianagnahare. (Salamo 83:18) Henteo ty lahatsoratse tihoe “Ia o Jehovah Zao?”
Va'e ho Tea'o Ka
VALEM-PAGNONTENEAGNE ARA-BAIBOLY
Ino ty Famantaragne i “Andro Fara’ey” ndra i “Fara Androy”?
Nirehake mialoha fisehoan-draha maro hiarake hiseoh amantaragne ty andro fara’e ty Baiboly.
FOTO-KEVETSE SAMBE KARAZA’E
Tsy ho Sahiragne Ara-toe-karena vao o Ndatio Indraike Andro Agne?
Hisy fanjakagne raike handamigne ze kila raha ambone tane etoy, sady hamoagne o fahantragneo naho o olagne ara-toe-karenao.
ESSENTIAL BIBLE TEACHINGS
Inogne o Fanjakàn’Andrianagnahare Zao?
Tamy ty fanompoagne natao i Jesosy, le ty Fanjakàn’Andrianagnahare ty foto-keve ty fampianara’e. Tagnate ty taogne maro, le nangatake ty hiavia o Fanjakagne iohoe ze mpanonjohy ty lia’e.
