MIAMBENA LOGNANDRO!
Mifamono o Ndatio Noho ty Anto’e Ara-politike: Ino ty Rehafe ty Baiboly?
Trea mbetia mberoa o aly ara-politikeo, le hafarà’e maro ty ndaty minekoneko.
Kadindà 39 ty nisy namono ta Meksika agne, tamy ty fifidianagne tamy 2023-2024. Mbe tsy nisy hoe izay indraike ty tagne amparake izay. Fa tsy volagnegne sasa ty raha raty hafa niseho tagnate ze fotoagne zay ao.
Manjeke ty aly ara-politike ty a Eropa agne. Fa ho nisy namono zao ohatse ty praiminisitse ta Slovakia agne tamy 15 Mey 2024.
Tsy nampoize o ndatio ty raha niseho tamy 13 Jolay 2024 naho fa ho nisy namono ty Donald Trump, i filoham-pirenena taloha ta Etazonia agney.
Nagnino o aly ara-politikeo ro mihamanjeke? Hisy fifaragna’e vao zay? Ino ty rehafe ty Baiboly?
Fa nirehafe ty Baiboly mialoha tie tsy hiharo saigne o ndatio noho ty tsy fitovian-kevetse ara-politike
Fa nirehafe ty Baiboly mialoha tie ho maro ty ndaty mpiarotegne naho tsy hitovy hevetse amy ty “andro fara’e.”
“Amy ty andro fara’e, le hisy fotoan-tsarotse tsy mora atrehegne. Fa ty ndaty ... tsy hahay hisaotse, tsy ho megnatse ty hivalike, ... tsy ho azo ifagnarahagne, ... hasiake, ... ho mpifotetse, ho bey zizo, hirengevoke.”—2 Timoty 3:1-4.
Fa nirehafe ty Baiboly mialoha avao ka tie hisy korontagne ty hampiambake o andro iaignantikagne hinane zao, le agnisa izay ty fagnongagnam-panjakagne naho ty goreve. (Lioka 21:9) Faie ndra tie eo ze raha rezay, le tsy tihoe hitohy nainai’e.
Fa tsy ho ela le ho tapetse agne o aly ara-politikeo
Hazavae ty Baiboly tie hafahan’Andrianagnahare ty fitondra o ndatio, le ty Fanjakà’e an-dagnitse agne ty hasolo’e aze.
‘Hagnoregne fanjakagne i Andrianagnahare i lagnitseỳ. ... Hopotepotehe’e naho hofoagna i fanjakà’ey o fanjakagne rehoe [fanjakà o ndatio] iaby, fa i azey avao ro haharetse nainai’e.’—Daniela 2:44.
Hampiharo saigne o ndatio sady hinday fiadanagne magneran-tane o Fanjakàn’Andrianagnahare iohoe.
Atao tihoe “Roandria ty Fiadanagne” ty Mpitondra i Fanjakàn’Andrianagnaharey, le hatao’e azo antoke tie “haharetse nainai’e ty fiadanagne handese’e.”—Isaia 9:6, 7.
Ndra tie amy hinane zao aza, le fa ianara ze ndaty ambane fifehea i Fanjakàn’Agnaharey ty raha toko’e hatao mba hilongoagne soa amo o ndatio. Izao ty rehafe ty Baiboly miomba ty voka ze raha zay: “Le sambe hanefe ty fibira’e ho lasarìgne iareo, vaho ty lefo’e ho mesa fagnetefagne voaloboke. Tsy hifampitomboke amy ty mesa sasa o ndatio sady tsy hianatse aly sasa.”—Isaia 2:3, 4.
Naho te hahazo fagnazavagne fagnampe’e rehe, le vakio ty lahatsoratse tihoe “Inona no Hataon’ny Fanjakan’Andriamanitra?” Henteo ka ty video tihoe Inogne o Fanjakàn’Andrianagnahare Zao?