MIAMBENA LOGNANDRO!

Misy Mpitondra Mirehake tie Tsy ho ela le Hipoake ty Aly Aramagedona: Inogne ty Rehafe ty Baiboly?

MANDEFA

Nandefa misily ta Ukraine agne ty Rosia tamy ty Tinainy maraindray, 10 Oktobra 2022. Ty anto’e, te hamale fate i Ukraine iareo amy i bomba nipoake tamy i ragiragy mampitohy i Crimée naho i Rosia, roe andro taloha izaỳ. Tafara kede ty nirehafe o mpitondrao tie va’e hisy aly Aramagedona hipoake tsy ho elay, ty nisehoa o raha rehoe.

‘Fa nanomboke tamy i Kirizy Misily ta Kiba agney, tamy i nitondrà i John F. Kennedy, filoha i Etazoniay tika ro fa nagnarine i Aramagedonay. Satria naho fa o fitaovagne fialiagne niklerao ro ampiasaegne, le ty Aramagedona zay ro avy, arake ty eretsereko.’—Joe Biden, filoha i Etazonia, tamy 6 Oktobra 2022.
‘Magneke raho tie hisy Aramagedona hagnoho-doza magneran-tane.’—Hoe ty Volodymyr Zelensky, filoha i Ukraine naho fa nagnonteneagne ty voka ty fampiasagne o fitaovagne niklerao, BBC News, 8 Oktobra 2022.

Ty fampiasagne o fitaovagne fialiagne niklerao vata’e vao ty hahavy i Aramagedonay? Inogne ty rehafe ty Baiboly?

Ty fampiasagne o fitaovagne fialiagne niklerao vao ty hahavy i Aramagedonay?

Oho’o, tsy izay. Indraike avao ty ahatreavagne ty rehake tihoe Aramagedona agnate Baiboly ao, le amy Apokalypsy 16:16 ao ty ahatreavagne aze. Faie tsy aly hifanoa ty firenena sambe firenena io, fa aly hataon’Andrianagnahare amy “ty mpanjaka ty tane toy” iaby. (Apokalypsy 16:14) Amy ty alala o aly Aramagedona iohoe ty hamoagnan’Andrianagnahare o fitondran’olombelogneo.—Daniela 2:44.

Naho te hahafantatse ty raha hiseho amy i Aramagedonay rehe, le vakio ty lahatsoratse tihoe Ino ty Atao Tihoe Aly Hara-magedona?

Ho rava ty aly niklera vao ty tane toy naho ty ndaty iaby?

Aha’a. Maregne fa va’e hampiasa o fitaovagne fialiagne niklerao o ndatio amy ty hoavy, faie tsy hengàn’Andrianagnahare ho rava ty tane toy. Magnamaregne izay ty raha rehafe ty Baiboly retoa:

“Ty tane toy haharetse nainai’e.”—Mpitoriteny 1:4.
“Ty ndaty maregne ro handova ty tane toy, sady hitoboke eto nainai’e.”—Salamo 37:29.

Faie naho henteagne ty faminania ty Baiboly naho ty raha miseho amy izao, le trea tie kede sisa le hisy fiovagne lahibey ty ambone tane eto. (Matio 24:3-7; 2 Timoty 3:1-5) Magnampe azo hahay ty raha rehafe ty Baiboly miomba ty hoavy ty fianaragne Baiboly maimaim-poagne atao’ay.