Nanafike i Ukraine ty Rosia tamy 24 Fevrie 2022. Tena magnoho-doza zay le ndaty an-tapetrisa’e ty nikezake nilay malaky arake ze azo atao. a

 “Naharey bomba nipoake maromaro zahay. Tena nampatahotse i rahay. Le avy le nandeha zahay naho vaho nirei’ay tie nisy lamasina azo ilaisagne. Tsy maintsy nenga’ay iaby ze kila raha satria kitapo kedekede isa o ndaty avao ty azo entegne. Taratasy, fagnafoly, rano, naho hanegne kedekede avao ty leo’ay. Nafoe iaby ze kila raha hafa le nimbamy gara i lamasinay mbeo zahay. Ie amy izao ty feo i bombay mbe nirei’ay avao.”​—Nataliia, boake a Kharkiv, Ukraine agne.

 “Nieretseretse avao zahay tie tsy hisy aly sasa. Faie naharey raha nipoake tagne ho agne raho, le nihozongozogne iaby i lafinetey. Tamy 8 maraindraigne pily raho ty niala boake an-tragno ao, le nandeha lamasina nimba Lviv mbeo, le naho fa avy eo nandeha bisy nimba Polony mbeo.”​—Nadija, boake a Kharkiv, Ukraine agne.

Amy ty lahatsoratse toy

•  Ino ty tena anto’e mahavy ty ndaty maro amy izao mitsoa-ponenagne?

•  Ia ty afake magnomey fanantenagne o ndaty mpitsoa-ponenagneo?

•  Afake magnampe o mpitsoa-ponenagneo vao ty Baiboly?

 Ino ty tena anto’e mahavy ty ndaty maro amy izao mitsoa-ponenagne?

 Ty fanafiha ty tafy i Rosia ro mahavy ty mpitsoa-ponenagne maro boake a Ukraine agneo. Faie atoro ty Baiboly amantikagne fa tena misy anto’e hafa mahavy ty ndaty maro hitsoa-ponenagne:

•   Tsy vita o fanjakan’olombelogneo ty nagnomey ze raha ilae o ndatio. Mateteke o mpitondrao ro magnararaotse fahefagne le mampijale ty ndaty hafa.​—Mpitoriteny 4:1; 8:9.

•   I Satana Devoly ty “mpitondra ty tontolo toy”, le izay ty mahavy ty ankamaroa o ndatio tena ho raty toetse. Rehafe ty Baiboly tie “ty tontolo toy fehe i ratỳ.”​—Jaona 14:30; 1 Jaona 5:19.

•   Ankoatse ty olagne fa nisy teo avao hatrake amy izay, le fa miaigne amy ty andro fara’e tikagne ty amy izao. Fa nirehafe ty Baiboly mialoha io tie: “Amy ty andro fara’e, le hisy fotoan-tsarotse tsy mora atrehegne.” (2 Timoty 3:1) Faie mampiambake ty andro fara’e ka o alio, ty loza boake amo o natiorao, ty keré, ty arete manjamagne, le izay ty mahavy o ndatio hitsoa-ponenagne.​—Lioka 21:10, 11.

 Ia ty afake magnomey fanantenagne o ndaty mpitsoa-ponenagneo?

 Aseho ty Baiboly fa tea sady mitretré o mpitsoa-ponenagneo naho o ndaty tsy maintsy mifindra toeragneo ty Jehovah, b i Mpamorogne antikagney. (Deoteronomia 10:18) Mampitamà reke fa hafaha’e iaby o olagne mahazo o mpitsoa-ponenagneò. I fanjaka’e an-dagnitse agney, i atao tihoe Fanjakàn’Andrianagnaharey ro hampiasae’e hanoagne izay sady io ty hisolo o fanjakan’olombelogneo iaby. (Daniela 2:44; Matio 6:10) Hampiasa i Fanjaka’ey ty Jehovah mba hamonovonoagne i Satana Devoly. (Romanina 16:20) Tsy hisy sasa ty sisin-tane mahavy o ndatio hizarazara, satria hanjaka magneran-tane o Fanjakagne iohoe. Ho keleiagne raike iaby o ndatio. Tsy hisy anto’e toko’e hiala o ndatio ty tragno’e sasa ty amy izay satria mampitamà ty Baiboly fa: “Sambe hitoboke ambane ty voalobo’e naho ty fihami’e iaby ka iareo, vaho tsy hisy raha hampihondrahondra aze, fa ty falie i Jehovah Tompo ty tafike ro fa nisaontsy.”​—Mika 4:4.

 I Fanjakàn’Andrianagnaharey avao ty afake magnafake ty olagne manjò o mpitsoa-ponenagneo. Toe hampiasa i Fanjaka’ey ty Jehovah mba hagnafahagne ty olagne mahavy o ndatio tsy maintsy hifindra toeragne. Hafaha’e ohatse retoagne:

•   Aly. “[Atao i Jehovah] tsy misy aly sasa.” (Salamo 46:9) Vakio i lahatsoratse tihoey “Ahoana no Hampisy Fiadanana etỳ An-tany?” naho tea’o ho fantatse tie akore ty ataon’Andrianagnahare mba hamaragnagne o alio.

•   Fampijaleagne naho hampiarotegne. “Hagnafake iareo amy ty fampijaleagne naho ty hampiarotegne” ty Jehovah. (Salamo 72:14) Vakio i andian-dahatsoratse tihoey “Afaka ny Hifankatia ve ny Olona Mifankahala?” naho tea’o ho fantatse tie akore ty hampiova ty ndaty raike managne toetse raty fa tagnate ty taogne maro.

•   Fahantragne. “[Horombahe i Jehovah] ty mahantra mila vonje.” (Salamo 72:12) Naho tea’o ho fantatse tie akore ty hagnafahan’Andrianagnahare ty anto’e mahavy o fahantragneo, le vakio ty lahatsoratse tihoe “Tsy ho Sahiragne Ara-toe-karena vao o Ndatio Indraike Andro Agne?”

•   Keré. “Hahavokatse ty tane toy.” (Salamo 72:16) Vakio ty lahatsoratse tihoe “Ho Foana ve ny Hanoanana?” naho tea’o ho fantatse tie akore ty hataon’Andrianagnahare mba tsy hampisy o keréo sasa.

 Afake magnampe o mpitsoa-ponenagneo vao ty Baiboly?

 Ie. Tsy vita tihoe magnomey fampitamaegne azo antoke hoahy ty mpitsoa-ponenagne avao ty Baiboly, fa magnomey torohevetse hagnampeagne iareo hiatreke ty olagne atrehe’e amy izao ka.

 Toro lala ty Baiboly: “Ko minekoneko amy ze raha iaby, fa amy ze kila raha, le ampahonigno an’Andrianagnahare amy ty vavake naho ty fihalaleagne miharo fisaoragne ty fangataha’areo. Le ty fiadanan’Andrianagnahare, i mandilatse ze kila raha taka ty say o ndatioy ro hiambegne ty fo’areo naho ty sai’areo.”​—Filipianina 4:6, 7.

 Ty dika izay: Ndra ino ndra ino olagne atrehe’o, le ihalaleo ty Andrianagnahare mba hagnampe azo ho tony naho hilamin-tsaigne. Henteo ty lahatsoratse “Filipianina 4:6, 7: ‘Aza Manahy na Inona na Inona.’”