Le fa fifandrambiognagne, vonoagne ndaty, alim-poko vaho ty aly atao o firenenao avao ty raha reintika ndra treantika amo o vaovaò.

•   “Noho ty aly atao i Israely naho i Gaza, le vao mainke mifandrabirabiogne amo o tragnom-porarotseo ao o ndatio. Tsy izay avao fa noho iareo mifankalaigne naho mpiarotegne ka ty mahavy izay.”​—The New York Times, 15 Novambra 2023.

•   “Nanomboke tamy 7 Oktobra, le vao mainke nindra fa tsy nanahake ty taloha sasa ty fifandrabirabiognagne naho ty hampiarotegne. Noho ty fifankalaignagne ty mahavy izay.”​—Dennis Francis, prezidà ty Fivoriambey natao o Firenena Mikambagneo tamy 3 Novambra 2023.

 Tsy vaho amy izao ty ahatreavagne ndra ahareizagne o fifandrabirabiognagneo, o hampiarotegneo naho o alio. Rehafe ty Baiboly fa ‘nikendre tamy ty bala folesidoro’e, le nagnomey kamaike’ ty ndaty taloha. Trea boake amy izay fa nimpiarotegne naho nitea aly iareo. (Salamo 64:3; 120:7; 140:1) Faie hazavae ty Baiboly fa misy dika’e lahibey o fifankalaignagne treantika amy hinane zaò.

 Mirehake anto’e roe mahavy ty fifankalaignagne amy hinane zao o Baibolio.

1.  1. Fa nirehafe’e mialoha fa “hihamanintsigne ty hatea ty ndaty maro.” (Matio 24:12) Izay ty mahavy o ndatio hifankalaigne fa tsy hifankatea.​—2 Timoty 3:1-5.

2.  2. Vao mainke mihamanjeke ty fifankalaignagne magneran-tane noho ty raha atao i Satana Devoly, i raty fagnahỳ. Rehafe ty Baiboly fa “fehe i ratỳ ty tontolo toy.”​—1 Jaona 5:19; Apokalypsy 12:9, 12.

 Faie ndra tie eo zay le rehafe ty Baiboly avao ka fa hafahan’Andrianagnahare ty anto’e mahavy o fankalaignagneo. Tsy izay avao fa hofoagna’e ka ty fijaleagne azo boake ama’e. Izao ty ampitamae ty Baiboly:

•   “Hofafa’e [Andrianagnahare] ze ranomaso amy ty maso iareo, fa tsy hisy sasa ty fate, ty alahelo ndra ty toreo ndra ty fanaintaignagne, fa tsy eo iaby ty raha taloha.”​—Apokalypsy 21:4.