Maro ty ndaty tra o ranobeio magneran-tane. Mareho moa ty tatetse retoa:

•   “Tamy itoy ty tena nisy oragne niavy bey naho ampitahaegne amy ze 140 taogne mahery lasa zay. Tam-pagnivoa ty lahady naho ty larobia, le ni-744,8 milimetatse i ranon’oragney.”​—AP News 2 Aogositra 2023.

•   “Tamy i Kamisy maley ty andro faharoe niavia ty tsikolony atao tihoe Khanun amy ty faritse atimo i Japon agne sady ninday tiobey naho oram-bey. Ndaty roe farafahakede’e ty nimate. ... Naho ty tombatombagne, le va’e hinday oragne 0,6 metatse o tsikolony iohoe amy ty faritse maro vohitse agnivo i Taïwan agne.”​—Deutsche Welle, 3 Aogositra 2023.

•   “Tagnate ze 50 taogne zay, le mbe tsy nisy oram-bey manahake ty tamy ty taogne toy ty tamy ty sisi-tane ty ria i Atlantika agne. Izay ty nahavy i ranobey tamy ty fara i heregnandro teoy [ta Nouvelle-Écosse agne].”​—BBC News, 24 Jolay 2023.

 Ino ty raha rehafe ty Baiboly miomba i raha miseho rey?

 Ampahafantare ty Baiboly antika fa “andro fara’e” ze o andro iaignantika zao. (2 Timoty 3:1) Fa rineha i Jesosy mialoha fa hahatrea “raha mampatahotse” ndra raha mbe tsy mahazatse o ndatio. (Lioka 21:11) Noho ty fiovaovà o toets’andrò, le manjare maro ty raha miseho tsy mahazatse antika. Tampoke antika ty isehoa’e sady miherenkeregne ty fiavi’e ro mbe tsy tame ka.

 Mirehake ty Baiboly fa toko’e hahavy antika hanagne raha tamaegne o raha raty miseho amy izaò. Ino ty anto’e? Hoe ty Jesosy: “Naho fa trea’areo ka fa miseho ze raha zay, le ko haligno fa antitotse ty Fanjakàn’Andrianagnahare.”​—Lioka 21:31; Matio 24:3.

 Trea amy ty raha misy amy hinane zao fa kede sisa, le hifehe tanterake o hery ty natiorao i Fanjakàn’Andrianagnaharey. Agnisa izay ty fiodikodigna o ranò.​—Joba 36:27, 28; Salamo 107:29.

 Naho tea’o ty hahafantatse tie ino ty hatao i Fanjakàn’Andrianagnaharey mba hagneregnagne amy ty pilasi’e o tontolo iaignagneo, le vakio ty lahatsoratse tihoe “Iza no Hahavita Hanavotra ny Tany?”