Mbe Hiheregne Manahake ty Taloha ty Nisia i Aretegney vao ty Fiaignantika? Akore ty Agnampea ty Baiboly Antika Hahavita Hiatreke o Fiovagne Magneran-tane Iohoe?
“Teantika naho miheregne manahake ty taloha indraike ty fiaignantika.”—Angela Merkel, Chancelier Alemà.
Va’e mitovy hevetse ama’e ka rehe, satria nisy voka’e tamy ty ndaty magneran-tane i COVID-19 oy. Faie ino ty dika tihoe “miheregne manahake ty taloha”? Ino ty raha tea’o o ndatio hatao?
Miaigne manahake ty taloha ty nisia i aretegney. Tea ty ndaty ila’e naho mba afake miarake amy ty nama’e naho afake mamihigne iareo naho afake mifandrambe tagnagne amy iareo reke. Tea ty ila’e ka naho afake manao lia lavitse indraike iareo. Amo o ndatio, hoe ty Dokotera Anthony Fauci a tihoe ‘miheregne amy ty fiaignagne taloha le tihoe afake mandeha amy ty hotely agne ndra magnente fampisehoagne ndra manao raha hafa mitovy amy izay.’
Magnasoa ty fiaigna’e. Maro ty magniry hanagne “fiaignagne vaovao” zane hoe fiaignagne soa mandikoatse ty fiaigna’e taloha. Tea iareo naho tsy mitake fotoagne naho hery bey amy ty ndaty ampiasae’e o orinasao sady tsy magnavakavake ty mpiasa ama’e ao. Tea iareo ka naho tsy misy ndaty azo ty areten-tsaigne. Izao ty nirehafe i Klaus Schwab, mpamorogne ty Fihaognam-bey Miomba ty Toe-karena Magneran-tane: “Nanagne fahafahagne hagnasoa naho hagnitsy ty fiaignantika tika tamy i arete-manjamagney faie tsy naharetse ze fahafahagne zay.”
Maro ty ndaty tena nijale vokatse i aretegney. Mieretseretse aza iareo tie “tsy hiova sasa o fiaignagneo.” Maro amy iareo ohatse ty namoe ty asa’e, ty tragno’e, naho ze raha soa nanagna’e. Misy aza ty namoe ty longo’e tsy foe’e.
Mazava ho aze fa tsy misy amantika mahay tie hanao akore ty fiaignagne naho fa tampetse i aretegney. (Mpitoriteny 9:11) Faie afake magnampe antika tsy ho diso tamà naho hiatreke ty raha hiseho amy izao o Baibolio. Fagnampe izay, mirehake raha hiseho amy ty hoavy o Baibolio sady va’e tsy hampoize’o ze raha rehafe’e zay.
Nagnino i arete-manjamagne COVID-19 oy ro niseho?
Fa ela ty Baiboly ro nirehake tie hisy “aretegne manjamagne” aloha ty “hifaragna ty tontolo toy.” (Lioka 21:11; Matio 24:3) Naho itika mitadidy izay, le hotreantikagne fa magnatanterake o faminania ty Baiboly iohoe ty fisia i arete-manjamagne COVID-19 oy, manahake ty ahatanteraha ty faminaniagne miomba ty aly, horohoron-tane naho hakeregne.
Nagnino ro mahasoa antika ty mahay izay? Va’e hihegne ty ndaty voa ty aretegne toy. Faie fa nampitao antika ty Baiboly tie miaigne amy ty “fotoan-tsarotse tsy mora atrehegne” tikagne. (2 Timoty 3:1) Magnampe antika hiatreke ze o fotoan-tsarotse zao ty fahaiagne izay.
Magnampe antika hifantoke amy ty lafesoan-draha ty Baiboly: Ndra tie mihasarotse avao ty raha iaignantika amy ty tontolo toy, le hiova ty fiaignantikagne amy ty hoavy. Hiova hanao akore?
Raha raike tsy hampoize’o hiseho amy ty hoavy
Tsy o raha sarotse iaignantika amy izaò avao ro rehafe ty Baiboly fa ty fiaignagne fanjaka hiaignantika amy ty hoavy ka. Misy raha soa tsy vita o fitondra o ndatio, fa ty Fanjakàn’Andrianagnahare avao ro rehafe ty Baiboly tie mahavita aze. Hoe reke: “Hofafa’e ze ranomaso amy ty maso iareo, le tsy hisy sasa ty fate, ty alahelo ndra ty toreo ndra ty fanaintaignagne, fa tsy ho eo iaby ty raha taloha.”—Apokalypsy 21:4.
Nampitamà ty Jehovah b Andrianagnahare tie: “Ataoko vaovao ze kila raha.” (Apokalypsy 21:5) Hovaha’e ze olagne iaby mahazo antikagne, agnisa izay ka ty voka-draty o aretegneo. Intoa ty raha hatao’e amy ty hoavy:
Ho voririke ty vatantikagne naho ty saintikagne sady tsy hisy sasa ka o aretegneo naho o fateo.—Isaia 25:8; 33:24.
Hanagne asa maha afa-po sady mahafale tikagne sady tsy hipay asa mandrerake sasa.—Isaia 65:22, 23
Hiadagne ty ndaty tsikiraidraike sady tsy ho keré naho hahantra sasa.—Salamo 72:12, 13; 145:16.
Tsy hahakivy antika sasa ty raha niseho tamy ty fiaignantika taloha, satria hifankatrea indraike amy i longontika fa nimate rey tikagne.—Isaia 65:17; Asan’ny Apostoly 24:15.
Nagnino ro magnampe antika ty mahafantatse izay? Hoe ty Baiboly: “Ze raha tamaegne anantikagne zay ro vatofantsike ty aintikagne.” (Hebreo 6:19) Mahavy antika tsy hivali-doha o fampitamagne fanjaka rehoe sady magnampe antika tsy hinekoneko. Magnampe antikagne ho tony vaho hahavita hiatreke ty raha sarotse iaignantikagne amy izao ka reo.
Faie tena azo’o atokisagne vao ty raha ampitamae o Baibolio? Henteo ty lahatsoratse manao tihoe: “Milaza ny Marina Foana ny Baiboly.”
Toro lala ty Baiboly afake magnampe azo hiatreke ty fiaignagne afara i arete-manjamagney
Sarobily o aigneo
Andinin-teny: ‘Miaro ty fiay ze managne aze ty fahendreagne.’—Mpitoriteny 7:12.
Midika inogne ho azo zay? Ko manao raha va’e hamparare azo. Fantaro soa ty raha misy amy ty toeragne misy azo eo. Oriho ty torohevetse mea o fanjakagneo miomba ty fahasalamagne, ty isa ty ndaty voa i aretegney an-toeragne eo naho ty isa ty ndaty vita vaksiny.
Mitaoa soa avao
Andinin-teny: ‘Mitao soa ty hendre le miala amy ty raty, fa ty gege tsy miraharaha sady matoky tegna loatse.’—Ohabolana 14:16.
Midika inogne ho azo zay? Mikezaha hiaro ty fahasalama’o avao. Mirehake o manam-pahaiagneo tie va’e haharetse agnate ty fotoagne lavalava o korona virisio.
Ko le avy le mino ze raha reio
Andinin-teny: “Mino ze rehake rei’e ze mbe tsy nandia fiaignagne, faie mandineke ty lia’e ty mahimbagne.”—Ohabolana 14:15.
Midika inogne ho azo zay? Mitandrema Amin’ny Vaovao Tsy Marina. Va’e ho simba ty fahasalama’o naho tsy azo antoke ty toro-hevetse orihe’o.
Managna toe-tsaigne soa
Andinin-teny: “Ko mirehake tie: ‘Nagnino ro soa mandikoatse ty amy izao ty taloha? Satria tsy fahendreagne ho azo ty magnontane izay.’”—Mpitoriteny 7:10.
Midika inogne ho azo zay? Mikezaha hagnasoa ty fiaigna’o. Ko mieretseretse bey loatse miomba ty fiaigna’o taloha ndra mieretseretse ty raha niazo’o natao taloha ty nisia i aretegney.
Hajao ty hafa
Andinin-teny: “Hajao ty karaza o ndaty iaby.”—1 Petera 2:17.
Midika inogne ho azo zay? Tsy mitovy ty fomba niatreha o ndatio i aretegney naho ty voka-drati’e tamy iareo. Ko serégne hagnorike ze hevetse trea’o tie mete mba hiatrehagne i aretegney areke ty ndaty hafa. Mitaoa soa naho fa mifandrambe amy ty ndaty mbe tsy vita vaksiny, ty ndaty antetse naho ty ndaty marefo ara-pahasalamagne.
Managna faharetagne
Andinin-teny: “O hatea zao manam-paharetagne, soa fagnahy.”—1 Korintianina 13:4.
Midika inogne ho azo zay: Naho misy ndaty mirehake tie mbe tsy toko’e hanohy hanao i fahazara’e taloha i aretegneỳ reke, le toko’e hagneke izay tika. Mbe mila managne faharetagne avao ka rehe, naho misy raha tea’o hatao manokagne ndra tie fa mihegne aza i fameperagney.
Magnampe o ndatio hiatreke i arete manjamagney o Baibolio
Mampionogne o Vavolombelo i Jehovah-o ty fampitamagne fanjaka amy Baiboly ao miomba ty hoavy sady magnampe iareo tsy hifantoke amy i aretegney. Mifanohagne iareo mba hagnorihagne ty lily ty Baiboly tihoe toko’e hiarake hivory tsy tapake. (Hebreo 10:24, 25) Atao iareo amy ty alala ty vidéoconference ty fivoria iareo, le ze ndaty iaby afake magnatreke aze.
Maro ty ndaty nirehake tie nagnampe iareo hiatreke i aretegney ty fiarahagne mivory miarake amo o Vavolombelo i Jehovah-o. Nisy ampela nivoa ty korona zay nagneke ty fanasa ty Vavolombelo i Jehovah aze mba hiarake hivory amy iareo. Nagnampe aze tsy ho kivy i fivoriagney ndra tie nindra aza i arete’ey. Hoe reke: “Tsapako tie agnisa o keleiagne iohoe ka raho naho fa nivory niarake tamy iareo. Nagnampe ahy ho tony naho hilamin-tsaigne ty famakiagne Baiboly. Nahavy ahy hifantoke amy ty raha tamaeko amy ty hoavy zay fa tsy amy i aretekoy. Misaotse anareo nagnampe ahy hifandrambe aman’Andrianagnahare, satria izay ty raha nirieko amy ty fiaignako amparake izay.”
