“Maro ty raha atao o ndatio amy izao atahoragne hanimba o toets’andrò tsy ho ela. Atahoragne hisy ranobey ty amy i tanàgne rova bey rey agne voka izay. Va’e vao mainke ho mae bey ka i androy. Atahoragne ty hisia ty tiobey mampatahotse sady mandravarava. Ho maro ty toeragne maike tsy hisy rano. An-tapetrisa’e ty raha mitiry naho ty biby atahoragne ho mate naho tsy hisy sasa. Raha azo eretseretegne hisy ze raha rezay fa tsy tihoe, ‘aia ka le ho maregne zay.’ Azo antoke tie hisy vata’e ze raha rezay naho tsy magnova ty fanapahan-keve’e miomba ty fomba ahazoagne ‘courant’ naho ampiasagne izay o fanjakagneo.”​—Reha i António Guterres, sekretera jeneraly ty Firenena Mikambagne miomba ty tatetse natao ty Fikambanagne Iraisam-pirenena Manao Fikarohagne Miomba ty Fiovà o Toets’andrò, tamy 4 Avrily 2022.

 “Rehafe o mpahay siansao tie faritse voaro miiake 423 eo ho eo, misy raha soasoa maro naho biby vaho raha mitiry tsiefa, a Etazonia eto, ro atahoragne ho simba noho ty fiovà o toets’andrò, lohotsie naho manjare mae bey i androy. Ze raha hiseho zay varagne ty loza treantika rehafe o Baibolio. Agnisa ze loza zay retoagne: Afo naho ranobey mandravarava, vonga gilasy manjare rano amo o lengon-tane avaratseo agne, fionjogna o riakeo, hafanam-bey.”​—“Ranobey Tsy Hay Volagnegne ta Yellowstone agne, Magnambara ty Hisia o Kirizio,” Hoe ty Gazete i New York, tamy 15 Jona 2022.

 Mbe hiaregne avao vao o tontolo iaignagneo? Naho eka, ia ty hanao izay? Dineho ty raha rehafe ty Baiboly retoagne.

 Rehafe ty Baiboly fa “hamonovono ze manimba o taneo” ty Andrianagnahare. (Apokalypsy 11:18) Mampianatse antikagne ty raha telo retoagne o andine’e boake amy Baiboly ao iohoe:

1.  1. Tena hanimba ty tane toy ty raha atao o ndatio.

2.  2. Hisy fifaragna’e ty fanimbagne ty tane toy.

3.  3. I Andrianagnahare fa tsy o ndatio ty hamaha ty olagne amo o tontolo iaignagneo.

 Rehafe ty Baiboly fa “maharetse nainai’e o taneo.” (Mpitoriteny 1:4) Hisy ndaty hipetrake avao ty ama’e eo.

•   “Ze ndaty maregne ro handova ty tane toy, sady ho velogne nainai’e etoy.”​—Salamo 37:29.

 Hihasoa manahake ty namboaragne aze tamy voaloha’e ty tanentikagne toy.

•   “Hifale i tane fatram-beỳ naho ty tane maike, le hirebeke ty lemake maike sady ho feno folera.”​—Isaia 35:1.