Maro ty mpitondra fanjakagne manao aferafera magneran-tane, sady mampalahelo ty voka’e. a Tamy i arete-manjamagne COVID-19 igne ohatse, le nisy manam-pahefagne tamy ty tane maromaro trea fa nagnodikodigne vola natokagne hialiagne amy i aretegney, mba hahavy aze ho mpagnarivo. Ty voka’e, nanjare tsy nahazo ty fitsaboagne nilae’e o ndatio sady maro ty nijale naho nimate.

 Maro ty voka-draty o aferafera atao o fanjakagneo. Hoe ty David Cameron, praiminisitse taloha ta Royaume-Uni agne: “Hoe tragnom-porarotse jabajaba mamehefehe o aferaferao, le tratse ao iaby o firenenao.”

 Faie afake matoky tikagne fa tsy ho ela, le tsy hisy sasa ze karazan’aferafera iaby. Ino ty anto’e? Dineho ty raha rehafe ty Baiboly fa hataon’Andrianagnahare.

 Izao ty raha rehafe ty Baiboly miomba an’Andrianagnahare: “Izaho Jehovah le tea ty rare’e sady malaigne ty fitavanagne naho ty tsy hamarenagne.” b (Isaia 61:8) Vazohon’Andrianagnahare ze kila o ndaty mijale voka ty aferafera atao ty hafa. (Ohabolana 14:31) Mampitamà reke tie: “Satria ampahoreagne o ndaty mijaleo ... le hiongake raho sady hanao raha.”​—Salamo 12:5.

 Ino ty raha hataon’Andrianagnahare? Tsy tihoe hohasoa’e o fanjakagne misy amy izaò, fa hosoloa’e i fanjakà’e an-dagnitse agney, i atao tihoe “Fanjakàn’Andrianagnaharey.” (Marka 1:14, 15; Matio 6:10) Izao ty rehafe ty Baiboly: “Hagnoregne fanjakagne tsy ho rava sasa i Andrianagnahare i lagnitseỳ. ... Hopotepotehe o fanjakagne iohoe naho hofoagna’e o fanjakagne hafao iaby, fa ireke avao ro haharetse nainai’e.” (Daniela 2:44) Izay ty fomba hamoagnan’Andrianagnahare o aferafera treantikagne amy izaò.

 Akore ty ahafantarantikagne fa tsy hanao aferafera i Fanjakàn’Andrianagnaharey? Dineho ty raha magnarake retoagne:

1.  1. Fahefagne. I Andrianagnahare Fara’e Maherỳ ro magnomey fahefagne o Fanjakagne iohoe.​—Apokalypsy 11:15.

    Nagnino zay ro raha lahibey? Miantehetse amy ty vola mea ty vahoa’e ty fanjakà o ndatio mba hampandeha soa ty asa’e. Mateteke izay ro hararaote o ndatio mba hanoagne aferafera naho hangalaragne vaho hitavanagne. Faie tena hafa ty ahy i Fanjakàn’Andrianagnaharey, satria i Andrianagnahare Fara’e Maherỳ ty manohagne io. Ho vita i Fanjakàn’Andrianagnaharey avao areke ty hagnomey ze raha ilae ty vahoa’e.​—Salamo 145:16.

2.  2. Mpitondra. I Jesosy Kristy ty tinendren’Andrianagnahare ho Mpitondra o Fanjakagne iohoe.​—Daniela 7:13, 14.

    Nagnino zay ro raha lahibey? Ndra o mpitondra fara izay ty manao ty soao aza mbe voatarike hanao raha tsy mete avao. (Mpitoriteny 7:20) Faie tsy hoe izay ty Jesosy, satria fa natoro’e tie tsy azo anoagne aferafera reke. (Matio 4:8-11) Tena tea’e ty vahoa’e sady mipay ze hahasoa iareo reke, le izay avao ty mikomandy aze isake tie hanao raha reke.​—Salamo 72:12-14.

3.  3. Lalàna. Voririke ty lalà i Fanjakàn’Andrianagnaharey, sady tena mahavelombolo iaby.​—Salamo 19:7, 8.

    Nagnino zay ro raha lahibey? Mateteke ty lalà o ndatio ro tena sarotse sady mavesatse vaho tsy ampiharegne arake ty toko’e ho ie, le manjare te hanao aferafera o ndatio. Faie tsy hoe izay ty lalàn’Andrianagnahare fa azo ampiharegne soa sady mahasoa. (Isaia 48:17, 18) Ankoatse izay, le tsy ty raha atao o ndatio avao ty tafilitse amy i lalàna rey fa ty anto’e anoa’e raha ka. (Matio 22:37, 39) Mahavazoho ze am-po o ndatio agne ka ty Andrianagnahare. (Jeremia 17:10) Mihevetse ty fihetseham-po iareo naho ty raha iaigna iareo avao areke reke naho fa mampihatse i lalàna rey.

 Mandrisike azo zahay mba hianatse ty miomba i fampitamà ty Baiboly manao tihoey tie tsy hisy aferafera sasa amy ty hoavy.

•   Vakio ty lahatsoratse tihoe “Tsy Manao Kolikoly ny Fanjakan’Andriamanitra”, fa hahatrea anto’e telo fagnampe’e rehe magnaporofo fa tena tsy hanao aferafera o Fanjakagne iohoe.

•   Henteo ty video tihoe Inogne o Fanjakàn’Andrianagnahare Zao?, naho tea’o ty hahafantatse soa ty miomba o Fanjakagne iohoe naho ty raha hatao’e an-tane etoa amy ty hoavy.

•   Oharo i fianaragne Baiboly maimaim-poagne atao’aỳ, fa hotrea’o ao tie akore ty hahafaha’o handrambe soa boake amy ty fampitamà ty Baiboly.