Amo ze andro fara’e zao, le fa haintika tie “haharey aly naho tatetse miomba ty aly ” tika. (Matio 24:6) Maro amo rahalahintikagneo ty miatreke raha sarotse noho o alio, faie mahazo ze fagnampeagne paliave’e iareo. Nahazo fampaherezagne tika boake amy i Vaovao Fara’e Boake amy ty Filan-keve-pitantanagne (2022) #3 oy. Nirehafegne tao zao ohatse ty fagnampeagne ze niazom-boigne ta Eropa atignanagne agne noho i aly a Ukraine agney. Ino ty raha natao mba hagnampeagne ze niazom-boigne ndra tie mbe mitohy avao aza i alỳ?

 Nanomboke i aly a Ukraine agney tamy 24 Fevrie 2022. Le avy le nekè ty komity ty mpandrindra areke tamo fotoagne iohoe ty hagnakaragne vola hampiasaegne mba hagnampeagne o rahalahy naho rahavave a Ukraine agneo. Le avy le nivily ze raha azo viliegne tan-toeragneo ka ty sampa i Ukraine sady nanomboke nizara fagnampeagne. Komity Mikarakara ze Niazom-boigne 27 areke ty tinendre i sampagne mba hanao izay.

 Tsy izay avao fa nanao raha malaky ka ty foibey ty Vavolombelo i Jehovah magneran-tane, le nandineke tie inogne iaby ty fagnampeagne azo omeagne mifagnarake amy ty raha misy a Ukraine agne. Nirehake areke ty Komity ty Mpandrindra naho ty Komity ty Fanoratagne fa mila miara-miasa amy ty solontegna ty sampa i Ukraine naho i Polony ty Sampan-draharaha ty Fivilianagne Entagne Magneran-tane. Mba hindesagne i fagnampeagney naho handaminagne i asa hataoy ty anto’e nanoagne izay. Mba handaminagne i asay areke, le niarake nivory isan’andro ty rahalahy boake amy ty Sampan-draharaha ty Fivilianagne Entagne Magneran-tane naho ty Fandefasagne Entagne vaho ty Lalàna miarake amy ty rahalahy raike agnisa ty komity ty sampa i Ukraine.

 Hoe ty Jay Swinney, boake amy ty Sampan-draharaha ty Fivilianagne Entagne Magneran-tane: “Nifantare’ay voaloha’e heike tie ino ty tena ilaegne. Tea’ay ty hagnomey hanegne naho ty fitaovagne fagnaliovagne fampiasà o rahalahy reo. Nikezahe’ay fantaregne tie inogne ty raha tena paliaegne, faie mbe ty ambi’e amy olagney avao zay. Tsy maintsy nidinehe’ay ka tie akore ty haneseagne i entagne rey a Ukraine agne agnate i alỳ ao, mba hoavy agne fara izay ty tsiela sady ho voaro ka ty fiay ty ndaty manday aze.

 Tamy 9 Marsa 2022 le nifantatse tie inogne iaby ty fagnampeagne ilaegne. Nimeagne hena, sardina, vare, tsaramaso, naho savony vaho taratasy ampiasagne an-kabonè agne iareo. Natao agnate ty Borotse o fagnampeagne reohoeke. Nieretseretegne ho 270 000 ariary isa o ndaty tamy ze fotoagne zay ty fagnampeagne maharetse vola’e raike. Faie rahalahy agnarivo’e ty nipay fagnampeagne le nekè ty komity ty mpandrindra ty hamoahagne vola bey mba hagnampeagne ze niazom-boigne. Ino areke ty azo atao mba ho voaro avao ty fiay ze ndaty manday i fagnampeagne rey?

 Tamy 13 Marsa le nisy rahalahy roe boake amy ty sampa i Polony agne, nirahegne nanese fagnampeagne amy ty tragno raike fisiagne entagne marine i Lviv a Ukraine agne mba hagnoharagne aze. Nampea ty rahalahy amy ty sampa i Polony naho i Ukraine iareo roe lahy mba hagnomagne ty lia’e andro tsiampeampe taloha ty niala iareo. Nivita ty sampa i Polony ty nikarakara ze taratasy paliaegne mba hahafahagne mandeha amy ty sisi-tane Ukraine mbeo. Tsy maintsy nasiagne soratse mazava soa ka ty amy ty tobile iareo, amy izay fantatse tie tobile mpinday fagnampeagne. Niara-niasa tamo Rahalahy a Ukraine ao ka ty sampa i Polony mba hahatreavagne ty lalagne fara izay ty marine naho fa tafilitse a Ukraine ao iareo roe lahy. Niomagne soa iareo sady nitahy ty kezake mafe nanoe iareo ka ty Jehovah, le tsy ampe andro raike tafara ty niavia iareo ta Lviv tao le fa nivoazara tamy ty Komity Mikarakara ze Niazom-boigne i fagnampeagne rey. Tsy nisy raha nahazo aze ka i rahalahy roe rey fa le nitoly soa ta Polony tagne.

 Maregne fa nilamigne soa i fagnandramagne ignehoeke faie mbe fagnampeagne tsy ampe tòny raike ty nateregne tamy igne. Nieretseretegne ho 200 tòny eo ho eo ty fagnampeagne mbe paliaegne. Akore areke ty natao mba hoavy agne naho ho voazara fara ze ty tsiela ze fagnampeagne tsiefa rey zay?

 Naboake tamy jw.org ao ty raha nanjò o rahalahintikagne a Ukraine agneo le ndaty maro magneran-tane ty te hagnomey fagnampeagne naho fa boake namaky aze. Ndaty maro boake amy ty toeragne lavitse agne ro nanao fagnomezagne hoahy ty asa magneran-tane atao ty Vavolombelo i Jehovah, satria fanta iareo fa hampiasagne arake ty toko’e ho ie i vola omea’ey. Ze firenena nagnodidigne teo ka le afake nagnomey ty fotoa’e naho ty heri’e vaho ty fanagna’e. Intoa misy ohatse:

 Entagne nifognosagne agnale’e ty nikarakara o mpiasa an-tsitrapo a Polony agneo, le ty ajaja namboatse sare tamy ty karatse kedekedeke. Hoe ty Bartosz Kościelniak miasa amy ty Sampan-draharaha ty Fivilianagne Entagne amy ty sampa i Polony agne: “Mateteke raho ro namaky ty Salamo 110:3 tie hanolo-tegna an-tsitrapo ty vahoa i Jehovah. Faie naho fa ty vata-tegnako ro nahita i mpiasa an-jato’e rey niavy sady vognogne hiasa, le treako tie tena maregne vata’e i raha rehafe i andine’eỳ.”

 Nisy vavolombelogne raike zay managne orinasa lahibey le namea’e hampiasaegne iaby i tobile’e bey rey sady mbe ireke avao ka ty niantoke gazoaly. Hoe reke: “Teako ty Jehovah naho o rahalahiko reo le fotoagne hanoroako izay zao. Tena fifaleagne ho ahy ty nagnampe.” Eretseretegne ho 7 700 litatse ndra mihoatse izay ty esansy naho gazoaly hatao fagnomezagne. Nampiasa soa ty fotoa’e naho ty heri’e o rahalahy reo le nahavita lalagne 48 000 kilometatse ty tobile manday i fagnampeagne nandese iareoy.

 Nahafoe tegna naho bey hatea o rahalahy naho rahavaventikagne reo le fagnampeagne 100 tòny ty niavy a Ukraine agne tamy 28 Marsa ndra 15 andro tafara i fagnandramagne voaloha’ey. Hanegne naho fitaovagne fagnaliovagne vaho fagnafoly naho fitaovagne fitsaboagne ty nasese tagne. Tena matarike o rahalahio naho i mpizara fagnampeagne rey. Ty voka izay le nihegne ty vola nipaiagne mba hivilianagne entagne naho ty haneseagne i fagnampeagne rey. Fagnampeagne 190 tòny mahery ty fa natere o Vavolombelo i Jehovah-o a Ukraine agne hatrake amy zao. Ino ty nivoka ze raha rey zay tamo rahalahintikagneo?

 Vata’e vaho niavy ta Lviv tao i fagnampeagne rey le zinara ty Komity Mikarakara ze Niazom-boigne tamy i ndaty niazom-boigne rey. Tanàgne maro ty naneseagne i fagnampeagne rey, ty ila’e aza le 1 300 kilometatse miala i Lviv. Faie mbe mandany fotoagne avao ze asa rey zay ndra tie fa nalamigne soa aza. a

 Hoe ty rahalahy Markus Reinhardt komity ty sampa i Ukraine: “Tagnate ty aly toy ty nahatsapà ty rahalahy maro tie tena tea aze vata’e ty Jehovah sady mahasoa lognandro ty magnorike ty tari-dalagne omea ty fandamina’e, ndra tie mbe tsy miseho aza i lozay. Nirisihe iareo zao ohatse ty tsikiraidraike mba hagnaja hanegne naho rano azo ampiasagne agnate ty heregnandro tsiampeampe. Izao ty nirehafe i Anton androanavi-pagnahy a Lviv ao, miomba o tari-dalagne iohoeke: ‘Magnomagne antika hiatreke raha sarotse o fandamina i Jehovah-o, le tena mankasitrake izay zahay.Tena namonje ty fiai’ay ty nanagne hanegne naho rano vaho radio.’ Soa fa nagnorike o tari-dalagne rehoeke i rahalahy rey, le nagnampe ty birò i sampagne hanagne fotoagne handaminagne i fagnampeagne ze nizoem-boigney zay.”

 Ino ty nitsapa o rahalahintikagne reo naho fa niavy i fagnampeagne rey? Nampiboake ty am-po’e ao ty Mykola naho i Zinaida mipetrake a Kharkiv ao. Hoe iareo: “Tena tsapa’ay am-po’ay ao ty fitretréza’areo anay. Misaotse tamy hanegne naho i fagnafolỳ. Tena ty fità i Jehovah ty nikarakara ze raha nipalià’ay.” Zao ka ty nirehafe i Valentyna mipetrake a Kharkiv ao avao: “Vata’e vaho nanomboke i alỳ, le nisy filaharam-bey ty tamo mpivarotseo tey. Mateteke tegna ro tsy afake mivily ze raha tena paliavegne. Faie i Jehovah le mahay naho mahavazoho ty raha paliaventikagne. Nanendre i rahalahy rey hizara fagnampeagne isan-tragno reke sady le tena ze raha paliave’ay vata’e ty tagnate i borotse rey tao. Naho fa amy rehe miatreke raha sarotsey sady tsy mahatrea vahaolagne sasay ro mahatsapa tie mitretré azo manokagne ty Jehovah naho ty fandamina’e. … Avy amy ty fotoagne mete naho amy ty tena ipaliavagne aze ty fagnampeagne omea’e.”

 Izao ty nirehafe i Yevhen naho Iryna vaho i Mykyta, nilay boake a Mariupol agne: “Le vata’e mankasitrake anareo zahay satria nikarakara naho nagnampe ty keleia’ay nareo. Tena tamy ty fotoagne nipaliavagne aze rey. Tamy ty voaloha’e le nieretseretse zahay tie ze entagne nipaliave’ay avao ty tagnate i borotse rey ao. Faie naho fa namoha aze zahay, le nitrea’ay tao ka ty hatea’areo.”

 Ndra tie ‘maharey aly’ naho ‘tatetse miomba ty aly aza tika’ le matoky fa ty fagnahy masy i Jehovah ro nitarike o vahoa’eo mba ho afake nanday i fagnampeagne rey. Ty fagnomezagne natao’o hoahy ty asa magneran-tane, agnisa izay ty natao amy ty alala ty donate.pr418.com ty nahafahagne nanao izay. Le vata’e mankasitrake anareo amy ty fatariha areo zahay.

Fagnampeagne ze Niazom-boigne Fara Ze ty Tsiela sady Azo Antoke

1. 24 Fevrie 2022: Nagneke ty hagnakaragne vola mba hagnampeagne o rahalahy a Ukraine agneo ty Komity ty Mpandrindra, le afake nanomboke nanday fagnampeagne ty tamy sampagne ao

2. 24 Fevrie–8 Marsa 2022: Nivily ty raha ila’e tan-toeragne amy iareo ao ty sampa i Ukraine, le nanomboke nizara fagnampeagne tamy ty alala ty Komity Mikarakara ze Niazom-boigne. Niomagne handrambe naho hizara ty fagnampeagne boake a Polony agne ka ty birò i sampagne

3. 9 Marsa 2022: Nekè ty Komity ty Mpandrindra ty handefasagne fagnampeagne hoahy ze niazom-boigne a Ukraine agne

4. 10-12 Marsa 2022: Fiomanagne amy lia hagnoharagne hanese hanegne naho fagnampeagne hafa boake ta Polony hasese a Lviv, a Ukraine agney

5. 13 Marsa 2022: Natao i fagnoharagne nanese hanegne naho fagnampeagne hafa boake a Polony agne ho mba Lviv, a Ukraine agney

6. 14-16 Marsa 2022: Nampiasa ty anjomba havoriambey marine i Poznan a Polony agne ty Mpiasa An-tsitrapo Manao Fagnoregnagne mba hikarakaragne i borotse hasiagne hanegne naho i fitaovagne fagnaliovagne rey

7. 17 Marsa 2022: Efatse andro tafara i fagnandramagney le fagnampeagne 13 tòny ty nanomboke nandesegne tamy ty sisi-tane i Ukraine

8. 21-27 Marsa 2022: Manahake ty natao taloha avao, le navory a Polony tao heike ze fagnampeagne niavy tafara vaho izay nalefa a Ukraine agne. Nizaraegne tamy ze faritse niazom-boigne tamy i andro ignehoeke avao ka i fagnampeagney

9. 28 Marsa 2022: Tagnate ty 20 andro tafara ty nagnekea iareo amy foibey agne, le nahatratse 100 tòny ty hanegne naho ty fitaovagne fagnaliovagne vaho ty fagnafoly naho ty fitaovagne fitsaboagne niavy ta Ukraine agne

 Hatrake amy izao le fagnampeagne 190 tòny mahery ty nalefa o Vavolombelo i Jehovah-o a Ukraine agne