Mitovy avao ty fandaharagne amy ty havoriambey vondrom-paritse hohentea ty rahalahy naho ty rahavave magneran-tane amy Jolay naho Aogositra 2020. Samba’e vaho hisy ty raha hoe izay. Faie tsy ho tanterake zay naho tsy adika amy ty firehake losotse ty 500 i fandaharagney. Mateteke tao’e raike ndra mahery izay vaho vita ty asa hoe izay. Faie noho ty fisia ty arete manjamagne coronavirus, le efa-bolagne latsake avao ty nanagna o rahalahio naho o rahavaveo mba handikagne ty Havoriambey Vondrom-paritse 2020 manao tihoe “Mifalea Lognandro!”

 Nagnampe tamy ty fagnatanterahagne o asa lahibey iohoe ty Sampan-draharaha Foibey ty Fandikan-drehake naho ty Sampan-draharaha ty Fivilianagne Entagne Magneran-tane, amy ty Foibey ty Vavolombelo i Jehovah agne. Trea ty Sampan-draharaha Foibey ty Fandikan-drehake tie maro ty ekipa mpandika rehake mipay fitaovagne fagnampe’e, agnisa izay i mikirò tena soa rey. Nivily mikirò 1 000 areke ty Sampan-draharaha ty Fivilianagne Entagne Magneran-tane, le nalefa tamy ty toeragne 200 latsake kede agne.

 Le avy le maro ty niviliegne tamy izay mba tsy ho maro loatse ty vola lany. Nalefa tamy ty toeragne raike agne o mikirò rehoe, taloha ty nandefasagne aze tamo o mpandika rehake magneran-taneo agne. Eo ho eo amy 170 dolara (650 000 ariary eo ho eo) ty vily ty mikirò raike naho ty foré’e naho mivily maro. Fa mbe ambone izay ty vili’e naho niviliegne kiraike.

 Tamy i volagne Avrily naho volagne Mey 2020 teo ignehoe ty Sampan-draharaha ty Fivilianagne Entagne Magneran-tane ro tsy maintsy nivily naho nandefa o entagne rehoe. Tena nanjamagne i aretegne coronavirus-y tamo o volagne rehoe, le tsy afake niasa arake ty toko’e ho ie ty mpivarotse maro. Faie mbe tsy nitapake i volagne Meỳ, le fa nahazo ty fitaovagne nipaliae’e ty ankamaroa o mpandika rehake amy ty birò fandikan-drehake mitokagne agneo naho amy ty birò i sampagne vaho amy ty toeragne hafa misy mpandika rehakeo agne, ndra tie teo aza o raha sarotse iohoe.

 Hoe ty Jay Swinney miasa amy ty Sampan-draharaha ty Fivilianagne Entagne Magneran-tane ao: “Niara-niasa soa tamo o sampan-draharaha amy i Betela etoagneo o fivilianagne entagne lahibeio tamy ty tetik’asa toy. Vita malaky ze kila raha natao sady niasa tamy ty fomba soa ka i vola fagnomezagne natao hagnampeagne o rahalahy naho o rahavaveoy. Tsy ho nivita zay naho tsy teo ty fagnahy masy i Jehovah.”

 Hoe ty Nicholas Ahladis, miasa amy ty Sampan-draharaha Foibey ty Fandikan-drehake ao: ‘Fa tsy afake niboaboake ty tragno’e ty ndaty tamy ty toeragne ila’e agne noho i aretegne manjamagney. Faie nahazo tamo o fitaovagne niviliegne rehoe avao ty mpandika rehake tagne. Tena nampahery iareo zay. Ty anto’e, ndra tie tsy afake nifankatrea nivantagne aza ty ekipa raike, le afake niara-niasa soa avao iareo naho fa nandika naho nangalake feo i lahajaka naho i tantara vaho i hiray rey amy ty firehake losotse ty 500.’

 Natao hoahy ty rahalahy naho ty rahavave magneran-tane ty Havoriambey Vondrom-paritse 2020 manao tihoe “Mifalea Lognandro!” Maro ty asa natao mba hahavitagne io. Faie vaho ty raike amy ty asa natao avao i rinehantika teoy. Ty fagnomezagne natao’areo tamy donate.pr418.com ao naho tamy ty fomba hafa ty nahafahagne nivily i fitaovagne tena ilaegne rey.