Tena maro ty boke naho gazete vaho lahatsoratse amy ty endreke elektronike naho ty video aboa ty Vavolombelo i Jehovah amy hinane zao naho oharegne amy ty taloha. Faie tena lafo ty fanoagne Internet amy ty toeragne maro magneran-tane, hafara’e tsy le afake manao Internet ty mpiara-manompo agne. Tapatapake avao ka ty jiro amy ty toeragne ila’e agne, le tsy tena mandeha soa ty connection agne, ndra tena tsy misy connection ty agne.

 Faie ndra tie eo zay, le maro zao ty rahalahy naho ty rahavave afake mangalake video naho lahatsoratse amy ty endreke elektronike, faie tsy mampiasa Internet. Fa inogne ty atao iareo?

 Mampiasa ze fitaovagne kedekede atao tihoe JW Box zay iareo. Nimeagne o fitaovagne iohoe ze fiangonagne tsy misy Internet ty amy iareo agne. Misy raha telo ty agnate o JW Box iohoe ao: Fitaovagne fizaràgne raha amy ty endreke elektronike niviliegne tamy ty orinasa raike, programa namboare ty Sampan-draharaha ty Ordinatera amy i Betela agne, boke naho gazete vaho video boake amy jw.org ao. Eo ho eo amy ty 75 dolara (290 000 ariary eo ho eo) ty vily ty JW Box raike.

 Amy i Anjomba i Fanjakagney agne ty isiagne o JW Box iohoe. Ampifandrambese o rahalahy naho o rahavaveo amy i Wi-Fi i JW Box-y i telefony iareoy ndra ty fitaovagne hafa anagna iareo, le afake mangalake boke naho gazete vaho video amy izay iareo. Azo ampifandrambesegne amy i JW Box-y ty varam-bazaha ampiasae o rahalahy naho o rahavave rehoe ndra tie fa taloha naho tsotsotra avao aza. Faie akore naho tsy misy Internet i fiangonagne managne i JW Box-y? Akore ty hahazoa iareo ze video naho lahatsoratse niboake fara’e hatao agnate i JW Box-y ao? Fa atao i sampagne agnate USB ao ze raha niboake fara’e amy jw.org ao, le alefa’e tsy tapake amo o fiangonagneo agne i USB igne mba hazilike amy JW Box ao. Eo ho eo amy ty 4 dolara (16 000 ariary eo ho eo) ty vily ty USB raike.

 Tena magnampe o rahalahy naho o rahavaventikagneo vao o JW Box iohoe? Hoe ty Nathan Adruandra, loha ty keleiagne raike mitoboke amy ty Repoblika Demokratika i Congo agne: “Fa ela raho ty nangalake i video tihoey ‘O Jehovah, ... ihe ro itokisako’ naho i video tihoey Tsiarovo i Valy i Lotay, faie le nitofa avao, hafarako nikivy. Faie afake mangalake o video rehoe amy i telefonikoy raho hinane zao. Le vata’e magnampe anay mirovaly i video rey naho fa mampianatse i ana’ay rey zahay.”

 Hoe ty rahalahy raike magnampe fiangonagne maro a Nigeria agne miomba ty fampiasagne i JW Box-y: “Ze hirike le mirehake tihoe tie fagnomezagne miambake boake amy i Jehovah o JW Box-o. Tena fale iareo, satria tsy sahiragne sasa naho fa mangalake boke naho video boake amy i Fitaovagne Fampianaragney ao.”

 Fa losotse ty 1 700 zay ty JW Box nalefa tamo o mpiara-manompo amantika Afrika agne, a Oseania agne naho Amerika agneo. Fa manao fandaharagne ka tika amy hinane zao mba handefasagne aze amy ty fiangonagne maro agne. Boake aia ty vola ampiasaegne amy ze raha zay iaby? Boake amy ty fagnomezagne ataontika hoahy ty asa magneran-tane. Maro zao ty manao fagnomezagne amy donate.pr418.com ao. Tena matarike nareo, le misaotse anareo zahay!