“Tsy le nahazo hanegne ara-pagnahy amy ty endre’e elektronike tikagne tie taloha.” Mitovy hevetse amy izay vao rehe? Agnisa ty raha nirehafe i rahalahy Geoffrey Jackson tamy ty lahajaka mampahery tamy ty Vaovao Fara’e Boake amy ty Filan-keve-pitantanagne (2020) #6 o rehake rehoe. Hoe indraike reke: “Fa tsy hoe izay ty amy izao satria tena miasa bey amantikagne ohatse ty JW Library mba hahazoantikagne hanegne ara-pagnahy amo ze o fotoan-tsarotse zao. Nanao raha mialoha ty Jehovah Andrianagnahare mba hahavitantika hiatreke ty raha sarotse iaignantikagne amy izao.”

 Akore ty nagnomana i Jehovah antikagne mba hampiasa io? Ino iaby ty natao naho fa namorogne o JW Library iohoe? Akore ty atao mba hahafaha’e handeha soa avao, le ino ty atao mba ho fagnasoagne aze?

 Tamy Mey 2013, le nirehake amy ty sampan-draharaha ty MEPS, amy i foibey agne, ty Filan-keve-pitantanagne mba hamorogne application ndra programa hisiagne ty Dikan-drehake Tontolo Vaovao nihavaozegne. Hoe ty Paul Willies, miasa amy ty MEPS: “Mbe tsy namorogne application atao agnate o varam-bazahao ao tikagne tie taloha. Najano’ay heike areke ty asa ila’e, le navori’ay ty ekipa niasa tamy irey mba hiasa amy ty sampan-draharaha hafa mba hamorogne o application iohoe naho ty raha agnate’e ao. Nivavake mateteke zahay. Noho ty fagnampea i Jehovah, le nivita avao i application-y sady naboake tamy ty fivoriagne fatao isan-taogne, dime volagne tafara tatoy.”

 Faie akore ty hahavy i application-y hitamiry boke hafa ankoatse ty Baiboly sady hisy amy ty firehake maro? Nanomboke tamy Janvie 2015, le maro amy ty raha naboantikagne amy ty firehake angilé ty fa niseho amo o fitaovagne iohoe ao. Enem-bolagne tafara izay ka, le fa afake nanintogne i raha rey amy ty firehake hafa an-jato’e o ndatio.

 Nanomboke teo, le maro ty fagnasoagne natao o rahalahio amy i fitaovagney. Afake nampidiregne video ty tao, natambatse amy ty toeragne raike i fitaovagne vita an-tsoratse rey, le amy ty toeragne raike hafa ze video ndra raki-peo ndra sare ampiasaegne amy ty fivoriagne. Naho fa migineke andine’e raike amy Baiboly ao ka rehe, le avy le mahatrea loharanon-kevetse amy Fitaovana Fikarohana ao magnazava i andine’ey.

 Varam-bazaha 8 tapetrisa isan’andro ty mampiasa JW Library. Isam-bolagne le 15 tapetrisa mahery ty mampiasa aze. Akore areke ty atao mba hahavy o fitaovagne iohoe handeha soa amo o varam-bazaha mampiasa aze rehoe? Hoe ty Rahalahy Willies: “Tsy ombia ho tampetse zao ty fagnasoagne atao amy ty application raike. Mikezake mampilitse raha vaovao naho magnasoa aze avao areke zahay mba hahavy aze ho mora amo o ndatio ty mampiasa aze. Mateteke magnonjogne ty version o varam-bazaha ampiasaentikagneo ty orin’asa mamboatse aze, le mikezake ka zahay manao ze hahavy i fitaovantikagney ho mete ampiasaegne amy i varam-bazahay. Havaoze’ay mateteke ka i JW Librarỳ amy izay mba afake mitombo ty raha vita an-tsoratse naho ty raha nalaem-peo azo ampidiregne agnate’e ao, satria mihamitombo avao rey.” Fa ho 200 000 mahery ty raha vita an-tsoratse, le 600 000 mahery ty raha nalaem-peo naho video amy ty firehake maro sambe hafa, misy amy JW Library ao.

 Mba ho fikojakojagne o JW Library iohoe avao, le misy raha hafa ankoatse ty fitaovagne ampiasaegne amo o ordinaterao ilaegne. Programan’ordinatera maro ty tsy maintsy viliegne. Ty raike ama’e zao, le fa ho 1 500 dolara (Ar 6 000 000 latsake) isan-taogne. Tsy vita izay fa mandany eo amy ty 10 000 dolara (Ar 40 000 000 latsake) isan-taogne o MEPS io satria mivily o programa ampiasaegne amo o varam-bazahao boake amo o ndaty manam-pahaiagneo mba hahavy i JW Library igne handeha soa avao amy ty ordinatera, tablety naho telefony.

 Tena nampihegne ty vola ampiasaentikagne amy ty fanoagne pirinty raha vita an-tsoratse, naho ty fagnakambanagne aze vaho ty fandefasagne iareo i fitaovagne JW Library io. Eretsereto ohatse ty bokekele Fandinihana ny Soratra Masina Isan’andro. Fa ho 12 000 000 zao ty natao pirinty tamy 2013. Faie eo amy ty 5 000 000 avao ty natao pirinty tamy 2020 ndra tie fa ho 700 000 mahery ty mpitory magneran-tane tamo o taogne iohoe. Nagnino ro nisy fiovagne hoe izay? Satria maro amy ty rahalahy naho ty rahavaventikagne ro mampiasa JW Library a naho fa mamaky teny vakiegne.

 Maro ty soa rambesegne boake amy ty fampiasagne JW Library. Nahatsapa ohatse ty Geneviève, mipetrake a Kanada agne, fa nahavy aze vao mainke nazoto nianatse i fitaovagney. Nirehake reke tie: “Naho navoriko amy ty toeragne raike i boke toko’e hianarako rey, le va’e nitapatapake ty fianarako. Faie noho iraho mampiasa JW Library amy i tabiletekoy, sady fa ao iaby ze raha ilaeko, le mianatse tsy tapake isake maraindraigne raho. Nagnatanjake ty finoako sady nagnampe ahy hifandrambe marine amy i Jehovah zay.”

 Tena nagnampe ty fisia o fitaovagne iohoe tagnate i fotoagne nisia i arete-manjamagne COVID-19 igne. Hoe ty Charlyn, boake Etazonia agne: “Fa tao’e raike zay ty tsy nampiboahagne boke vaovao vita pirinty noho i arete-manjamagne COVID-19 igne magneran-tane. Faie noho ty fisia i JW Library igne, le matanjake avao ty finoantikagne satria mahazo ze raha ilaentikagne tika. Tena misaotse i Jehovah raho noho o fagnomezagne sarobily boake ama’e iohoe.”

 Maro amantikagne ty mahatsapa manahake i Faye, boake a Filipiny agne. Hoe reke: “Mampiasa ty fitaovagne raike tena mahery toy raho mba hahavy ahy tsy hivalike amy i Jehovah. Ao ty misy ty raha vakieko voaloha’e isake maraindraigne, ty raha tsanogneko naho fa manao tolon-draha. Fa ao iaby ty raha ianarako naho fa hivory. Io ka ty ampiasaeko naho fa magnomagne raho aloha ty hampianatse Baiboly. Magnente video ao raho naho fa malalake. Mamaky lahatsoratse ndra Baiboly ama’e naho fa misy raha lignasako. Tena tsy voavilim-bola io.”

 Tena ilaegne amy ty fanompoagne ka o fitaovagne iohoe. Dineho ty ohatse raike toy. Niarake nanompo amy ty rahavave hafa ty rahavave mipetrake a Kamerony agne toy. Nampiasa andinin-teny i rahavave niarake ama’ey tamy izay. Heregnandro maromaro tafara tatoy, le tea’e hampiasaegne ka i andinin-tenỳ faie tsy tadidi’e. Izao ty nirehafe’e: “Soa avao fa nisy fehezanteny boake amy i andine’ey tadidiko. Nanokake JW Library raho, le nagnente amy Baiboly ao, sady nikaroke i fehezantenỳ. Tsy ela tafara izay le nitreako i andinin-tenỳ. Tena maro ty andinin-teny halignoko kindraike faie magnampe ahy hahatrea iareo ty fampiasako i fitaovagney.”

 Ty fanoa’o fagnomezagne amy donate.pr418.com ao ty nahafahantikagne namboatse, naho mikojakoja sady magnasoa i fitaovagne JW Library igne mba hahasoa ty rahalahy naho ty rahavaventikagne magneran-tane. Misaotse azo amy ty fatariha’o.

1. Oktobra 2013​—Naboake o fitaovagne iohoe sady fa nisy ty Dikan-drehake Tontolo Vaovao nihavaozegne

2. Janvie 2015​—Maro ty raha vita an-tsoratse niseho ao amy ty firehake Angilé. Nisy amy ty firehake hafa an-jato’e ka i raha rey tafara izay

3. Novambra 2015​—Nanjare afake nandoko ze raha vakiegne ao

4. Mey 2016​—Natokagne amy ty toeragne raike ze raha hampiasaegne amy ty fivoriagne

5. Mey 2017​—Afake nandrambesagne an-tsoratse

6. Desambra 2017​—Nampidiragne Baiboly Fianaragne (Angilé)

7. Marsa 2019​—Afake nanintonagne raha nalaem-peo naho nandefasagne video, sady naho fa migineke andine’e raike le avy le ente’e amy ty loharanon-kevetse amy Fitaovana Fikarohana agne magnazava aze

8. Janvie 2021​—Nisy fagnasoagne natao mifandrambe amy ty boke Ankamamio Nainai’e o Fiaignagneo!