Misy asa lahibey anoe ty Vavolombelo i Jehovah amy ty tane losotse ty 200 agne mba hagnampeagne o ndatio. Faie ty 35 eo ho eo amo o tane rehoe avao ro afake mikarakara ze raha paliave iareo boake amy ty vola fagnomezagne mea iareo. Fa akore ty amy i tane ila’e tsy ampe avao ty vola fagnomezagne azo iareo rey?

 Dinehe ty Filan-keve-pitantana ty Vavolombelo i Jehovah ty raha paliave o vahoa i Jehovah magneran-taneo mba hanompoagne aze naho hanoagne ty asa fitoriagne. Henteagne soa areke ty raha ipaliagne vola mba hahavy i fagnomezagne rey hiasa amy ty fomba soa. Naho mihoatse ze toko’e ho paliaegne ohatse ty fagnomezagne voarae ty sampagne amy ty tane raike, le alefa amy ty tane hafa agne ty amby i fagnomezagney mba hagnampeagne ze tsy ampe avao ty fagnomezagne azo’e. Tsy vaho amy izao ty nisia ty raha hoe izay. Nifagnampe ohatse o Kristiana tamy ty taonjato voaloha’eo mba ‘hisia ty fitoviagne.’ (2 Korintianina 8:14) Namenoa iareo ze tsy ampe tamy ty Kristiana nama iareo vata’e ty amby ty fanagna iareo.

 Ino ty raha tsapa o rahalahio naho o rahavaveo naho fa nahazo fagnampeagne boake amy ty amby ty vola fagnomezagne tamy ty sampagne hafa agne? Valo arivo ariary latsake eo ho eo isan’andro ty karama ty antsasa ty ndaty a Tanzania agne. Amby ty fagnomezagne boake tamy ty sampagne hafa agne areke ro nampiasaegne mba hagnavaozagne ty Anjomba i Fanjakagne ampiasae ty fiangona i Mafingay. Hoe iareo: “Nitombo ty mpagnatreke fivoriagne tama’ay eto tafara i fagnavaozagney. Tena misaotse i fandaminagne naho ty rahalahy iaby magneran-tane zahay noho ty fatariha iareo. Fale zahay managne Anjomba tena soa mba hanompoagne i Jehovah.”

 Noho i aretegne manjamagne coronavirus-ỳ, le nanjare tsy le nanagne raha hohanegne ty ila’e amy ty rahalahintika a Sri Lanka agne. Agnisa izay ty rahavave Imara Fernando naho i Enosh, ana-dahi’e. Nahazo ze raha paliae’e iareo noho i fagnomezagne boake amy ty sampagne hafa agne rey. Izao ty nisorate iareo: “Tena mankasitrake o rahalahio zahay noho iareo bey hatea, le nagnampe anay tagnate i fotoan-tsarotse ignehoe. Tena fale zahay agnisa o keleiagne magneran-tane iohoe. Mivavake lognandro ka zahay mba hagnampea i Jehovah o rahalahintikagneo iaby amo ze o andro fara’e zao.”

 Vognogne hizara ze raha anagna iareo amy ty hafa o rahalahy naho o rahavaventikagneo ndra aia ndra aia misy iareo. Namboatse boate kedekede ty Enosh mba hamoria’e vola hatao’e fagnomezagne hagnampeagne o mpiara-manompo sahiragneo. Managne toe-tsaigne manahake aze ka ty Guadalupe Álvarez, mitoboke a Meksika agne. Kidikidy avao ka ty karama ty ndaty agne, ndra tsy mahazo karama isam-bolagne. Faie mbe manao fagnomezagne arake ze anagna’e avao reke. Hoe reke: “Tena misaotse i Jehovah raho noho ty hasoa fagnahi’e naho ty hatea tsy misy hoe’e anagna’e. Haiko fa agnampeagne ty fagnomezagne atao o rahalahio ty fagnomezagne ataoko mba hagnampeagne o rahalahiko sahiragneo.”

 Tena mahafale i sampagne magnomey vola rey ka ty magnampe ty tane hafa mila fagnampeagne. Hoe ty Anthony Carvalho, agnisa ty Komity ty Sampa i Brezila: “Nipay fagnampeagne tamy ty tane hafa agne zahay tagnate ty taogne maro mba hamitagne ty asa ama’ay eto. Noho ty fagnampea iareo, le nisy fitomboagne bey ty ama’ay eto. Niova ty toe-karena ama’ay a Brezila eto hinane zao, le afake magnampe ty hafa ka zahay. Dinehe o rahalahintika ama’ay atoy io ty asa fitoriagne atao magneran-tane mba hahatreava iareo ze raha azo iareo atao mba hagnampeagne ty hafa.”

 Ino ty atao o Vavolombelo i Jehovah-o mba hagnampeagne i rahalahy naho i rahavave iareo sahiragne rey? Tsy le avy le mandefa vola amy i sampagne mipay fagnampeagney agne iareo, fa amy ty alala ty fagnomezagne hanohagnagne ty asa atao magneran-tane ty agnomea iareo aze. Azo atao amy i boate misy soratse tihoey “Fagnomezagne Hoahy ty Asa Magneran-tane”, amy i Anjomba i Fanjakagney agne zay ndra amy tihoe donate.pr418.com ao. Tena mankasitrake anareo zahay amy ty fagnomezagne atao’areo.