Agnisa ty raha tena fa tsy niligne o Vavolombelo i Jehovah-o ty hahatrea ty Fizaràgne 1 amy i video Talily Soa Miomba i Jesosỳ, tamy ty taogne toy. Ndaty an-tapetrisa’e ty fa nahatrea o video iohoe sady vaho ty raike amy i fizaràgne 18-y avao igne! Ino ty asa atao o rahalahy naho o rahavaveo mba hamitagne o fizaràgne rehoe, le ino ka ty raha fa natao’o mba hagnampeagne iareo hamita izay?

 Amy ty sampa i Aostralazia agne ty angalagne ty ankamaroa i Video Talily Soa Miomba i Jesosỳ, le ndaty 50 hatrake 80 eo hoe eo ty miseho sehatse. a Misy rahalahy naho rahavave manjotso hanegne atoandro naho hariva vaho raha azo tsamitsamihegne hoahy i ekipa rey. Fa omane iareo mialoha bey tie ino ty raha hohanegne. Hoe ty Esther miasa amy ty Sampan-draharaha ty Lakozy ao: “Mivily hanegne amy ty mpivarotse sambehafa zahay, amy izay mba ze hanegne soa sady tsy simba faie tsy lafo ty azo’ay. Mateteke, le ahèin’ay ka ty hanegne andrahoe’ay mba tsy hisy hanegne hariagne.” Isan’andro, le efatse dolara eo ho eo ty lani’ay amy ty hane ty ndaty raike.

 Tsy hanegne avao ty palia i ekipa rey fa fiarovagne ka. Fiarovagne amy ty ino ohatse zay? Mafana naho mipisagne ty andro a Aostralia agne sady ambone ty taratse manimba alefa i masoandroy tie agne. Nanangagne tragnolay naho toeragne mampanintsinintsy areke o rahalahy naho o rahavaveo mba hiarovagne ty tsikiraidraike amy i masoandroy naho i hafanagney arake ze azo atao. Natao iareo azo antoke ka tie fa managne menake fiarovagne amy ty masoandro, elo naho rano maro iareo. Izao ty nirehafe i Kevin, miasa amy ty Sampan’asa ty Feo Naho Video: “Mpiasa an-tsitrapo amy Betela ao ty ankamaroa ty rahalahy naho rahavave magnampe amy ty asa toy. Tena miambane iareo sady falefale. Tena mipay ty fagnampea iareo zahay amy ty asa toy.”

 Misy amy ty ila’e amy i video rey tsy hay alaegne amy i birò sampagne ao, ndra amy i toeragne fangalagne videoy ao zay ndra amy i fangalagne feoy ao. Mila alàgne ivela i sampagne agne areke ty video hoe izay. Mba hampifagnarahagne i videoy amy ty toeragne taloha rehafegne amy Baiboly ao, le mila mandeha amy ty toeragne mitokagne tsy ahatreavagne potò jiro, lalagne pavé, naho i tragno amy i hinane zao rey i ekipa rey. Mila indese iareo amy i toeragney agne ka ty akanjo naho ze fitaovagne iaby ilaegne amy i videoy. Arova iareo soa i fitaovagne rey naho fa avy agne. Aloha ty hangalagne i videoy, le atao i mpandrindra mpagnampe amy ty famoahagne i videoỳ azo antoke tie fa misy goropy, rano malio hinomegne, naho fivegnagne ty eo. Mivantagne amy ty mpiara-manompo an-toeragne eo ndra amy ty hotely, ndra amy ty tragno kidikidy, ndra mipetrake amy ty tobile misy tragno i ekipa rey.

 Va’e handany vola naho handany fotoagne vaho handrokake ze ndaty miasa amy i tetik’asay, ty fandenàgne amy ty toeragne lavitse mba hangalagne i video rey. Neke o Filan-keve-pitantanagneo areke ty hivilianagne ekran jabajaba afake maneho ty toeragne toko’e hisy i ndaty halàgne videoy. Mahery ty 2 tapetrisa dolara ty vily o ekran jabajaba iohoe. Tena mazava soa ty sare aboa i ekran-y. Misy jiro ka apily i ndaty halàgne videoy sady afake miovaova arakarake ze sare atoro amy i ekran-y eo ty fazava’e . Le hoe tena amy i toeragne ivela’ey agne areke i ndaty halàgne videoy. Noho ty fisia o teknolojia vaovao iohoe, le mateteke tika ro tsy voatere mandany vola handenagne lavitse naho fa hangalake i videoy. Hoe ty Darren, agnisa ty Komity ty Sampa i Aostralazia: “Tsy le rokake loatse o ekipao noho ty fampiasagne i ekran jabajabay sady afake magnerenkeregne malake video eo iareo arakarake ze ilae iareo. Ohatse zao, naho ivela’e agne ty hangalagne video, le fa heankeagnegne avao ty hangalagne video i masoandro mitsofotsey satria minitra tsiampeampe avao ty hahafahagne manao izay. Faie naho i ekran jabajabay ty ampiasaegne, le afake mamorogne masoandro mitsofotse mateteteteke zahay amparake ty hahazoagne sare mete soa.”

 Anjato’e ty mpandrambe anjara amy i video Talily Soa Miomba i Jesosỳ ilaegne. Maro ka ty ekipa paliaegne mba hagnatanterake ty fizaràgne tsikiraidraike ama’e. Ino ty tsapa o rahalahy naho o rahavaveo amy ty fikarakaragne atao o keleia i Betelao amy iareo?

 Mipetrake a Melbourne agne zao ohatse ty Amber. Nanao lia lavitse 700 kilometatse reke mba handrambesagne anjara amy i tetik’asay. Izao ty nisorate’e: “Naho vata’e vaho niavy tan-garan-dropilany eo raho, le avy le nikarakara ahy ty rahalahy naho rahavave boake amy Betela ao. Maro ty Betelita nanasa ahy hihinagne ndra hino dité miarake amy iareo. Natao iareo ka ze hahavy ahy tsy hihafahafa naho hahatsapa ho teagne naho fa tamy i toeragne fangalagne videoy agne. Maro ty fitahiagne niazoko tamy i lia nataokoy. Noho ze raha zay le nihalignoko iaby ze raha nafoeko!”

 Miara-miasa amo o ekipa mpanao video reo ty Derek. Hoe reke: “Vata’e vaho nanomboke i tetik’asay, le fa maro ty sampan-draharaha nanohagne anay. Tena fale raho managne rahalahy naho rahavave mahafoe fotoagne naho fanagnagne vaho hery mba hanohagnagne ty tetik’asa toy. Lava vognogne hagnampe avao iareo sady soa fagnahy. Azo antoke fa mitahy iareo ty Jehovah le mitahy antikagne iaby ka. Rese lahatse raho fa tsy tihoe ty voka ty asa ataontika avao ro lahibey amy i Jehovah fa ty fomba hagnatanterahagne i asay ka.”

 Misaotse anareo amy ty fagnomezagne atao’areo mba hanohagnagne ty fagnamboaragne i video mifampitohỳ, agnisa izay ty fagnomezagne atao’areo amy ty alala ty donate.pr418.com.