Ndaty an-ketse’e isan-taogne ty atao badisa. Ty voka’e, maro ty tragno natao hanompoagne i Jehovah mila aoregne. Nanao tetik’asa areke ty Sampan-draharaha Miandraikitse ty Fagnoregnagne An-toeragne eo magneran-tane fa hagnoregne tragno ampiasaegne amy ty fanompoagne i Jehovah miiake 2 700 mahery ndra hagnavao aze tamy i taom-panompoagne 2020 ignehoe. a

 Faie sarotse ty nanao izay noho ty fisia ty aretegne manjamagne COVID-19. Nanapa-kevetse ty Komity ty Fampanontagne amo o Filan-keve-pitantanagneo eo fa hajanogne ty ankamaroa ty tetik’asa fagnoregnagne hatao magneran-tane ho fiarovagne o rahalahio naho o rahavaveo vaho ho fankatoavagne o manam-pahefàgneo. Faie ndra tie teo zay, le tragno losotse ty 1 700 ty naoregne naho nihavaozegne tamy taom-panompoagne 2020, taloha ty niavia ty coronavirus. Nisy 100 mahery ka ty birò i sampagne nivita oregne. Ino ty soa nirambese o rahalahintikagneo noho ty fahavità ty roe amo o tetik’asa rehoe?

 Sampa i Cameroun. Ta Douala agne ty nisy ty sampa i Cameroun. Faie nikedekede loatse o tragno i sampagne iohoe, le nila nihavaozegne. Nieretseretse ty Komity ty Fampanontagne fa hagnavao o tragno i sampagne iohoe, faie nitrea iareo tie mihoatse ty vola ho azo naho avarotse reke ty vola ho lany hagnavaozagne aze. Nandineke ka iareo kera afake magnoregne tragno i sampagne vaovao, ndra hivily tragno le igne ro havaozegne. Faie noho ty raha nisy, le sambe tsy afake nitanterahagne iaby reo.

 Nihay o rahalahio tie nieretseretse hamboatse i lalagne avara i Douala agne, i lalagne mandeha mbamy i toeragne misy i Tragno Fanoagne Havoriambeintikagney ty fanjakagne. Noho ty fisia o famboaragne lalagne iohoe, le tsy hanahiragne ty mandeha agne naho ty hahatrea ze fitaovagne ilaegne amy ty fagnoregnagne marine egne. Tena mete amy i sampagne soa zay, satria toe mipay izay ka iareo. Neke ty Filan-keve-pitantanagne areke ty hagnoregnagne tragno i sampagne vaovao marine i Tragno Fanoagne Havoriambeỳ eo.

 Vavolombelo i Jehovah naho ndaty nikaramagne ty niara-niasa tamo o tetik’asa iohoe. Nitsitsy vola naho fotoagne ty nanoagne ze raha zay. Naho ty maregne aza, le mbe latsake ty vola nieretserete iareo ho lany ty nilany tamo o tetik’asa iohoe. Nahazo tombo’e 2 tapetrisa dolara mahery iareo. Afake nifindra tamo o tragno i sampagne vaovao iohoe areke o keleia i Betelao taloha kede ty niparitaha i aretegne COVID-19.

 Nanjare nahazo tragno hitobohagne fanjaka naho afake niasa soa ty Betelita ta Cameroun agne satria malalake i tragnoy. Nirambese iareo ho fagnomezagne boake amy i Jehovah o tragno i sampagne vaovao iohoe. Hoe ze mpivaly raike zay: “Nanjare te hiasa mafe mihoatse ty taloha zahay sady tea’ay haseho tie sarobily ama’ay ty fagnomezagne toy.”

 Birò ty Fandikan-drehake Mitokagne (BFM) a Tojolabal, a Meksika agne. Tamy ty sampa i Amerika Agnivo tagne, marine ty tanà i Meksika, ty nisy ty mpandika rehake tojolabal tagnate ty taogne maro. Ie amy izao, Altamirano naho a Las Margaritas agne, 1 000 kilometatse miala i Meksika ty tena ampiasagne o firehake iohoe. Nisarotse tamo o mpandika rehakeo areke ty nandika rehake amy ty firehake tojolabal, satria tsy nitoboke agne iareo sady o rehakeo miova naho fa mandeha ty fotoagne. Tsy nahatrea rahalahy naho rahavave marine agne ka ty sampagne mba hagnampe amy ty fandikan-drehake tojolabal naho amy ty fangalagne feo.

 Nitea ty Komity ty Fanoratagne amo o Filan-keve-pitantanagneo eo hafindra amo o toeragne ampiasagne o firehake iohoe agne o ekipa mpandika rehake tojolabal reo. Faie mba hahavitagne izay, le nanapa-kevetse ty sampagne fa hivily tragno raike sady hagnavao aze. Tsy le mandany vola zay naho oharegne amy i tihoey magnoregne tragno vaovao, ndra magnofa tragno.

 Nirehake ty soa nirambese’e ze mpandika rehake raike zay. Hoe reke: “Mbe liako naho nahatrea keleiagne raike mampiasa firehake tojolabal nitoboke marine anay tagnate ze folo taogne nandikako rehake tamy i sampagne agne zay. Faie amy izao, le amy ty toeragne tena ampiasagne ty firehake tojolabal ty misy ty birò’ay. Mifampirehake amy ty ndaty mampiasa o firehake iohoe raho isan’andro. Nihanitombo ka ty voambolagne nihaiko sady nihasoa ty fahaiako mandika rehake.”

 Misy BFM miiake 75 naho ty toeragne fanoagne sekoly ara-baiboly eretseretegne haoregne naho hohavaozegne amy ty taom-panompoagne 2021 naho magnenga antika hanao izay ty raha misy. Misy sampagne lahibey valo ka mila amboaregne, agnisa izay ty foibey vaovao a Ramapo, a New York agne. Mila afindra ka ty Sampa i Arizantina naho Italia. Fagnampe izay ka, le losotse ty 1 000 ty Anjomba i Fanjakagney vaovao mila aoregne, le 4 000 ty Anjomba i Fanjakagney mila havaozegne, le losotse ty 6 000 ty Anjomba i Fanjakagney mila aoregne mba ho solo i tragno fanoagne fivoriagne taloha rey satria fa tsy ombe sasa.

 Akore ty hahatreavagne vola hamitagne o tetik’asa rehoe? Izao ty namalea i Rahalahy Lázaro González, agnisa ty Komity ty Sampa i Amerika Agnivo, o fagnonteneagne iohoe naho fa nandineke ty hagnoregne BFM amy ty firehake tojolabal iareo: “Tsy ampe avao ty vola voarae ty sampagne misy anay. Tsy ho vita areke ty hagnoregne birò fandikan-drehake hoahy ty mpiara-manompo mampiasa fireham-paritse naho tsy eo ty fanohagna o rahalahy naho o rahavave magneran-taneo. Ty fagnomezagne mea iareo ty nahafahagne nagnoregne i birò rey amy ty toeragne ampiasaegne i firehake rey agne, sady nahafahagne namindra i mpandika rehake rey agne. Tena mankasitrake o rahalahy iaby magneran-taneo zahay noho ty fatariha iareo.” Tena maregne zay. Noho i vola fagnomezagne atao’o hoahy ty asa magneran-tane rey ty ahafahagne mamita o tetik’asa fagnoregnagne rehoe. Tamy ty alala ty donate.pr418.com. ty nanoagne ty ankamaroa i fagnomezagne rey.