Tena tea o mpiharo finoagne ama’eo o Vavolombelo i Jehovah-o. (1 Petera 2:17) Maro amantikagne ty mitovy hevetse amy i Tannis, rahavave raike boake a Kenia agne. Hoe reke: “Teako ty mahafantatse ty raha manjò o rahalahiko naho o rahavaveko magneran-taneo.” Akore ty ahafaha i Tannis naho ty Vavolombelogne an-tapetrisa’e mahazo vaovao tsy tapake? Nanomboke tamy 2013 tikagne ty fa afake mahatrea izay amy ty tragnom-porarontikagne jw.org amy ty fizaràgne tihoe Vaovao ao.

 Tatetse azo antoke soa miomba ty Vavolombelo i Jehovah ro trea amy Vaovao JW ao, sady foto-kevetse sambe karaza’e ty rehafegne ao, ohatse miomba ty famoahagne Baiboly, fagnampeagne ze niazom-boigne, tetik’asa fagnoregnagne, ndra raha niseho niambake. Rehafegne ao ka ty miomba o rahalahy naho o rahavaventikagne gadraegne noho ty finoa’eo. Ankoatse izay, le misy fitantaragne mampahery miomba ty kezake manokagne naho ty Fahatsiarovagne ka ty amy Vaovao JW ao. Ia ty mikaroke i lahatsoratse rey, sady akore ty agnomanagne irey?

 Ty Birò Firehafam-baovao Magneran-tane (BFE) ro mikarakara ty Vaovao JW. Amy foibey agne ty misy o sampan-draharaha iohoe, sady ty Komity ty Mpandrindra amo o Filan-keve-pitantanagneo eo ty miandraikitse aze. Rahalahy naho rahavave 100 mahery ty miasa amy BFE ao. Mpiasa an-tsitrapo miasa boake an-tragno’e agne ty ankamaroa iareo, le ao ty mpanoratse, mpanao fikarohagne, mpanao sare, vaho mpandika rehake. Ty hafa ka mifandrambe amy ty manam-pahefagne, mpampianatse naho mpikaroke amy oniversite ey, vaho mpanao gazete. Birò Firehafam-baovao (BFB) 80 mahery amy ty sampagne magneran-tane ty magnampe i BFE.

 Miara-miasa maifitse amy BFB ty BFE naho fa magnomagne vaovao. Naho fa mahatrea fitantaragne soa aboake i rahalahintikagne rey, le manao fikarohagne miomba igne iareo sady mamory fagnazavagne azo atokisagne. Va’e manao fagnadihadiagne ohatse iareo, le mirehake amo o manam-pahaiagneo. Naho fa vita vory iareo i fagnazavagney, le sorategne amy izay i lahatsoratsey, ahitsy, hamaregnegne sady asiagne sare vaho alefa amy ty Komity ty Mpandrindra agne. Ty Komity ty Mpandrindra ty magnomey alalagne tie haboake i rahay ndra tsy haboake.

 Manao akore ty fihetseham-po o mpiharo finoagne amantikagneo miomba ty Vaovao JW? Hoe ty Cheryl, rahavave raike boake a Filipiny agne: “Tena teako ty mamaky vaovao miomba i fandaminagne naho ty vahoa i Jehovah isake maraindray.”

 Maro ty mirehake miomba ty maha sambe hafa ty Vaovao JW naho ty mpagnambara vaovao hafa. Hoe ty Tatiana, boake a Kazakhstan agne: “Fale raho satria azo atokisagne soa ty vaovao amy jw.org ao. Azo antoke io sady mirehake ty raha tena misy.” Izao ka ty nirehafe i Alma, rahavave raike boake a Meksika agne: “Tena mampahery ty Vaovao JW fa tsy mampivali-doha manahake ty vaovao aboa o mpamoake vaovao mahazatseo.”

 Tsy vita tihoe azo antoke avao i Vaovao JW io, fa magnatanjake finoagne ka. Hoe ty Bernard, boake a Kenia agne: “Naho fa mamaky ty Vaovao JW raho, le manjare hoe keleiako zay ty fahatreavako o rahalahy naho o rahavave magneran-taneo, ndra aia ndra aia ty misy aze. Afake manognogne ty agnara iareo naho ty raha iaigna’e raho naho fa mivavake.” Izao ka ty nirehafe i Bybron, rahavave raike boake a Kenia agne: “Falefale avao raho isake tie mahatrea lahatsoratse miomba ty Baiboly naboake amy ty firehake hafa! Maniahy ahy i lahatsoratse rey tie tsy mifily volo ty Jehovah.”

 Ndra ty vaovao miomba o rahalahintikagne enjehegneo aza va’e hampahery antikagne. Hoe ty Jackline, boake a Kenia agne: “Tena magnatanjake ty finoako ty misaintsaigne ty herim-po iareo. Kezaheko fantaregne iaby tie ino ty magnampe iareo hiaretse. Treako tie ndra raha ‘tsotra’ avao aza, le fa tena magnomey hery iareo, ohatse mivavake, mamaky Baiboly, naho mihira.”

 Misy ka ty tena tea i vaovao miomba ty loza arake ty natiora rey. Hoe izay zao ty Beatriz, rahavave raike a Kosta Rika agne. Hoe reke: “Ty Vaovao JW ro ahatreavako tie akore ty atao ty fandaminantikagne mba hagnomeagne ze raha ilae o mpiara-manompò. Malaky ty fomba fiasa iareo ro mandeha soa faie feno hatea. Rese lahatse raho tie tena fandamina i Jehovah ty misy antikagne toy.”

 Fale tikagne mahazo vaovao fara’e miomba i rahalahintikagne magneran-tane rey lognandro! Tsy ho nisy zay naho tsy teo ty fagnomezagne natao’areo hoahy ty asa magneran-tane. Maro amy i fagnomezagne rey ty natao’areo tamy ty alala ty donate.pr418.com. Misaotse fa tena matarike nareo.