Manohigne ty fontika i video amy ty havoriambey vondrom-paritse rey sady magnampe antika hahazo soa ty raha ampianare ty Baiboly ka. Video 114 ty nihenteagne tamy ty Havoriambey Vondrom-paritse 2020 manao tihoe “Mifalea Lognandro!” Agnisa io ka i lahajaka miiake 43 natao o rahalahy agnisa ty Filan-keve-pitantanagne naho o mpagnampe iareò. Mba fa nidinehe’o vao tie inogne iaby ty asa natao mba hahavitagne irey, le fire ty vola nilany tama’e?

 Eo ho eo amy ty 900 latsake ty isa ty rahalahy naho ty rahavave nandrambe anjara tamo o asa iohoe. Nahafoe ty fotoa’e iareo sady nampiasa ty fahaia iareo ka. Tagnate ty roe taogne ty nanoagne o asa iohoe, le eo amy ty 100 000 latsake ty lera niasà iareo naho atambatse. Ty 70 000 lera tamy io ty nanoagne i tantara ara-baiboly 76 minitra manao tihoey Nehemia: “Ty Fifaleagne Boake amy i Jehovah ro Fiarovagne Mafe ho Anareo.”

 Azoazo’o sare an-tsaigne avao varagne tie vola bey ty ilaegne mba hikarakaragne o mpiasa an-tsitrapo maro mahafoe tegna rehoe naho mba hiviliagne ty fitaovagne paliae iareo vaho hikarakaragne ty toeragne hiasà iareo.

 Hoe ty Jared Gossman, miasa amy ty Sampan-draharaha Miomba ty Feo Naho ty Video ao: “Tena tea ty Komity ty Fampianaragne amy ty Filan-keve-pitantanagne eo naho mampiseho kolontsaigne naho toeragne sambehafa o videontikagneo. Ty anto’e, teantika hatoro amy i video rey tie keleiagne raike vata’e tika magneran-tane. Nisy ekipa 24 amy ty firenena 11 agne areke ty niara-niasa mba hampiboahagne i video rey. Mitake fandaminagne mialoha naho fiaraha-miasa soa vaho vola bey zay.”

 Maro amy i video naboantika rey ro nipay fitaovagne manokagne. Namboaregne tamy i studio a Mt. Ebo, marine i Patterson, a Etazonia agney ohatse ty fitaovagne nilaegne tamy i video tihoey Nehemia: “Ty Fifaleagne Boake amy i Jehovah ro Fiarovagne Mafe ho Anareo.” Nagnamboatse raha mitovy tamy ty manda i Jerosalema taloha o rahalahio naho o rahavaveo. Amy izay le hoe ie vata’e i tantaray, faie mitsitsy i vola fagnomezagne rey ka. Enegne metatse ty haabo i manda namboaregney, le hatae maromaro natambatse ty nanoagne aze sady nirongonegne raha manahake o eponzio ty tama’e. Ie naho fa niavy eo, le nilokoegne, amy izay mitovy amo o vatò ty fagnenteagne aze. Tsy voatere nagnamboatse maro iareo, satria azo afindrafindra i raha rey, le afake nampiasaegne amy ty toeragne sambehafa. Faie ndra tie teo zay, le fa 100 000 dolara (382 000 000 ariary eo ho eo) ty nilany nagnamboaragne ty fitaovagne nilaegne tamo o tantara iohoe avao. a

 Nanjare nitombo areke ty fankasitrahantika ty havoriambey vondrom-paritse tamy ty taogne toy naho fa nahafantatse ty pitsopitso ty raha natao tama’e tika. Matoky tika fa maro ty ndaty hidera i Jehovah magneran-tane noho ty kezake natao tamy i havoriambey ignehoe. Misaotse anareo amy ty fatariha’areo, fa le vata’e maro ty fagnomezagne natao’areo hoahy ty asa magneran-tane, tamy ty alala ty donate.pr418.com ndra tamy ty fomba hafa.