“యెహోవా పేరు ఉపయోగించి ప్రార్థించే ప్రతీ ఒక్కరు రక్షించబడతారు.”—రోమీయులు 10:13, కొత్త లోక అనువాదం.

 “ప్రభువు నామమునుబట్టి ప్రార్థనచేయు వాడెవడో వాడు రక్షింపబడును.”—రోమీయులు 10:13, పరిశుద్ధ గ్రంథము.

 దేవుడు పక్షపాతం చూపించడు; దేశం, జాతి, సామాజిక హోదా వంటివాటితో సంబంధం లేకుండా, రక్షణ పొంది శాశ్వత జీవితాన్ని సొంతం చేసుకునే అవకాశాన్ని అందరికీ ఇస్తున్నాడు. అయితే ఆ అవకాశాన్ని మనం పొందాలంటే, యెహోవా పేరున ప్రార్థించాలి. యెహోవా అనేది సర్వశక్తిగల దేవుని పేరు. a—కీర్తన 83:18.

 బైబిలు యెహోవా పేరును పలకమని లేదా ఆయన పేరున ప్రార్థించమని చెప్పినప్పుడు దానర్థం కేవలం దేవుని పేరును తెలుసుకొని, ఆరాధనలో దాన్ని ఉపయోగించడమని కాదు. (కీర్తన 116:12-14) దేవుని మీద నమ్మకం ఉంచడం, సహాయం కోసం ఆయన మీద ఆధారపడడం కూడా అందులో భాగమే.—కీర్తన 20:7; 99:6.

 దేవుని పేరును యేసుక్రీస్తు ప్రాముఖ్యమైనదిగా ఎంచాడు. ఆయన మాదిరి ప్రార్థనలోని మొట్టమొదటి పదాలు ఇలా ఉన్నాయి: “పరలోకంలో ఉన్న మా తండ్రీ, నీ పేరు పవిత్రపర్చబడాలి.” (మత్తయి 6:9) శాశ్వత జీవితం పొందాలంటే మనం ఆ పేరు వెనకున్న వ్యక్తిని తెలుసుకోవాలని, ఆయనకు లోబడాలని, ఆయన్ని ప్రేమించాలని కూడా యేసు చూపించాడు.—యోహాను 17:3, 6, 26.

 పరిశుద్ధ గ్రంథములో రోమీయులు 10:13లో ప్రస్తావించబడిన “ప్రభువు” యెహోవాయే అని మనం ఎందుకు చెప్పవచ్చు? ఎందుకంటే అక్కడ యోవేలు 2:32 లోని మాటలు ఎత్తి రాయబడ్డాయి. యోవేలు 2:32 లో “ప్రభువు” అనే బిరుదు కాకుండా దేవుని పేరు ఉంది. b

 ఒక వ్యక్తి యేసుక్రీస్తు మీద విశ్వాసం ఉంచితేనే అతనికి దేవుని ఎదుట మంచి పేరు ఉంటుందని రోమీయులు 10వ అధ్యాయం చూపిస్తుంది. (రోమీయులు 10:9) పాత నిబంధన అని పిలవబడే భాగం నుండి ఎత్తి రాయబడిన లేఖనాలు అదే విషయాన్ని సమర్థిస్తున్నాయి. ఒక వ్యక్తి “బహిరంగంగా ప్రకటించ[డం]” ద్వారా విశ్వాసాన్ని చూపిస్తాడు; అవిశ్వాసులకు రక్షణ గురించిన మంచివార్త ప్రకటించడం కూడా ఆ కోవలోకే వస్తుంది. అలా ప్రకటించడం వల్ల, శాశ్వత జీవితానికి నడిపించే విశ్వాసాన్ని వృద్ధి చేసుకునే అవకాశం ఇతరులకు దొరుకుతుంది.—రోమీయులు 10:10, 14, 15, 17.