“మనం ఎదురుచూసేవి తప్పక జరుగుతాయని బలంగా నమ్మడమే విశ్వాసం; అంతేకాదు, మనం నమ్మేవి కంటికి కనిపించకపోయినా అవి నిజంగా ఉన్నాయనడానికి రుజువే విశ్వాసం.”—హెబ్రీయులు 11:1, కొత్త లోక అనువాదం.

 “విశ్వాసమనునది నిరీక్షింపబడువాటియొక్క నిజ స్వరూపమును, అదృశ్యమైనవి యున్నవనుటకు రుజువునైయున్నది.”—హెబ్రీయులు 11:1, పరిశుద్ధ గ్రంథము.

 ఈ వచనంలో, విశ్వాసానికి లేఖనాల్లో ఉన్న అతిచిన్న నిర్వచనం చూడవచ్చు. అలాగే అది, విశ్వాసం అంటే కేవలం నమ్మకం మాత్రమే కాదని చెప్తుంది.

 “ఎదురుచూసేవి తప్పక జరుగుతాయని బలంగా నమ్మడమే విశ్వాసం.” హెబ్రీయులు 11:1లో, “విశ్వాసం” అని అనువదించిన గ్రీకు మూలభాష పదం, బలంగా నమ్మడాన్ని లేదా బలంగా ఒప్పించబడడాన్ని సూచిస్తుంది. అలాంటి విశ్వాసం కేవలం ఫలానివి జరగాలని కోరుకోవడం కాదుగానీ అవి “తప్పక జరుగుతాయని బలంగా నమ్మడం.” “బలంగా నమ్మడం” a అని అనువదించిన గ్రీకు మాటను “ఆస్తి హక్కు దస్తావేజు” అని కూడా అనువదించవచ్చు. అది దాన్ని కలిగివున్న వ్యక్తిలో భరోసాను, నమ్మకాన్ని కలిగించే ఒక గ్యారంటీ లాంటిది.

 “మనం నమ్మేవి కంటికి కనిపించకపోయినా అవి నిజంగా ఉన్నాయనడానికి రుజువే [లేదా “ఒప్పింపజేసే రుజువే,” అధస్సూచి] విశ్వాసం.” బలమైన రుజువు ఉండడం వల్లే విశ్వాసం కలుగుతుంది. ఆ రుజువు ఎంత బలంగా ఉంటుంది అంటే, ఫలానా విషయం మన కంటికి కనిపించకపోయినా సరే అది నిజంగా ఉందని మనం బలమైన నమ్మకంతో ఉంటాం.

 హెబ్రీయులు పుస్తకం అనేది అపొస్తలుడైన పౌలు మొదటి శతాబ్దంలో యెరూషలేము, దాని చుట్టుపక్కల ప్రాంతాల్లో నివసిస్తున్న క్రైస్తవులకు రాసిన ఒక ఉత్తరం. ఉత్తరంలోని ఈ అధ్యాయంలో పౌలు విశ్వాసం ఎంత ముఖ్యమో వివరంగా మాట్లాడాడు. ఉదాహరణకు, ఆయన ఇలా రాశాడు: “విశ్వాసం లేకుండా దేవుణ్ణి సంతోషపెట్టడం అసాధ్యం. దేవుని దగ్గరికి వచ్చేవాళ్లు ఆయన ఉన్నాడని, తనను మనస్ఫూర్తిగా వెదికేవాళ్లకు ఆయన ప్రతిఫలం ఇస్తాడని తప్పకుండా నమ్మాలి.” (హెబ్రీయులు 11:6) పౌలు హెబ్రీయులు 11:1లో విశ్వాసం అంటే ఏంటో చెప్పాక, ఆ లక్షణాన్ని చూపించిన బైబిల్లోని స్త్రీపురుషుల ఉదాహరణల గురించి రాశాడు. వాళ్లు దేవుని ఇష్టం ప్రకారం జీవిస్తూ ఎలా విశ్వాసం చూపించారో చెప్పాడు.—హెబ్రీయులు 11:4-38.