మా నమ్మకాలు పూర్తిగా బైబిలు మీదే ఆధారపడి ఉండాలని మేం కోరుకుంటాం. అందుకే, లేఖన అవగాహనలో మార్పులు వచ్చినప్పుడు, వాటికి అనుగుణంగా మా నమ్మకాల్ని కూడా మార్చుకుంటాం. a

 అలా మార్పు చేసుకోవడానికి కారణం, సామెతలు 4:18 లో ఉన్న బైబిలు సూత్రం. అదిలా చెప్తుంది: “పట్టపగలగువరకు వేకువ వెలుగు తేజరిల్లునట్లు నీతిమంతుల మార్గము అంతకంతకు తేజరిల్లును.” సూర్యుడు ఉదయించే కొద్దీ, ఆ వెలుగులో పరిసరాలు మరింత స్పష్టంగా కనిపిస్తాయి. అలాగే, దేవుడు తాను అనుకున్న సమయంలో, క్రమక్రమంగా లేఖన సత్యాల్ని వెల్లడిచేస్తాడు. (1 పేతురు 1:10-12) బైబిలు ముందే చెప్పినట్లు, దేవుడు ఈ ‘అంత్యకాలములో’ మరింత ఎక్కువగా వాటిని తెలియజేస్తున్నాడు.—దానియేలు 12:4.

 లేఖన అవగాహనలో మార్పులు వచ్చినప్పుడు మేం ఆశ్చర్యపోం, లేదా కంగారుపడం. ప్రాచీనకాలంలోని దేవుని సేవకులు కూడా కొన్ని విషయాల్ని తప్పుగా అర్థం చేసుకున్నారు. తర్వాత దేవుడు వాటిని సరిచేశాడు.

•   దేవుడు అనుకున్న సమయం కన్నా 40 సంవత్సరాల ముందే, మోషే ఇశ్రాయేలు జనాంగాన్ని విడిపించాలని ప్రయత్నించాడు.—అపొస్తలుల కార్యములు 7:23-25, 30, 35.

•   మెస్సీయ చనిపోవడం, తిరిగి లేవడం గురించిన ప్రవచనాన్ని అపొస్తలులు అర్థం చేసుకోలేకపోయారు.—యెషయా 53:8-12; మత్తయి 16:21-23.

•   మొదటి శతాబ్దంలో ఉన్న కొంతమంది క్రైస్తవులు, ‘ప్రభువు దినం’ గురించి తప్పుగా అర్థం చేసుకున్నారు.—2 థెస్సలొనీకయులు 2:1, 2.

 తర్వాత దేవుడు వాళ్ల అవగాహనల్ని సరిదిద్దాడు. ఇప్పుడు కూడా, దేవుడు మా విషయంలో అలాగే సరిదిద్దుతూ ఉండాలని ప్రార్థిస్తున్నాం.—యాకోబు 1:5.