యెరూషలేములో ఓ ప్రాముఖ్యమైన కూటం జరగబోతోంది. రాజైన దావీదు అధిపతుల్ని, పెద్దల్ని, పరాక్రమశాలుల్ని పిలిపించాడు. అక్కడ చేయబడిన ఒక ప్రత్యేక ప్రకటన విని వాళ్లు ఆశ్చర్యపోయారు. సత్యదేవుని ఆరాధన కోసం ఒక అసాధారణమైన కట్టడాన్ని నిర్మించే పనిని దావీదు కుమారుడైన సొలొమోనుకు యెహోవా అప్పగించాడు. ఆ నిర్మాణం ఎలా ఉండాలో తెలిపే నమూనాను తన పవిత్రశక్తి ద్వారా యెహోవా దావీదు రాజుకు తెలియజేశాడు, దాన్ని అతను సొలొమోనుకు ఇచ్చాడు. దావీదు ఇలా చెప్తున్నాడు, “కట్టబోవు ఆలయము మనుష్యునికి కాదు దేవుడైన యెహోవాకే గనుక ఈ పని బహు గొప్పది.”—1 దిన. 28:1, 2, 6, 11, 12; 29:1.

తర్వాత దావీదు, “ఈ దినమున యెహోవాకు ప్రతిష్ఠితముగా మనఃపూర్వకముగా ఇచ్చు వారెవరైన మీలో ఉన్నారా?” అని అడిగాడు. (1 దిన. 29:5) ఒకవేళ మీరు అక్కడ ఉండివుంటే, ఎలా స్పందించేవాళ్లు? ఆ గొప్ప పనికి మీరు కూడా సహాయం చేసేవాళ్లా? ఇశ్రాయేలీయులు రంగంలోకి దిగారు. ‘పూర్ణమనస్సుతో యెహోవాకు ఇచ్చారు కాబట్టి వాళ్లు మనఃపూర్వకముగా ఇచ్చినందుకు సంతోషపడ్డారు.’—1 దిన. 29:9.

కొన్ని శతాబ్దాల తర్వాత, యెరూషలేములోని ఆలయం కన్నా మరింత గొప్పదైన ఒకదాన్ని యెహోవా స్థాపించాడు. అదే గొప్ప ఆధ్యాత్మిక ఆలయం. యేసు బలి ఆధారంగా మనుషులు తనను ఆరాధనలో సమీపించడానికి యెహోవా చేసిన ఏర్పాటే ఆ ఆలయం. (హెబ్రీ. 9:11, 12) నేడు ప్రజలు తనతో సమాధానపడడానికి యెహోవా ఎలా సహాయం చేస్తున్నాడు? శిష్యుల్ని చేసే పని ద్వారా ఆయన సహాయం చేస్తున్నాడు. (మత్త. 28:19, 20) ఫలితంగా, ప్రతీ సంవత్సరం లక్షలమంది బైబిలు స్టడీ తీసుకుంటున్నారు, వేలమంది శిష్యులు బాప్తిస్మం తీసుకుంటున్నారు, వందలకొలది కొత్త సంఘాలు ఏర్పడుతున్నాయి.

ఇంత అభివృద్ధి జరుగుతుంది కాబట్టి మరిన్ని బైబిలు ప్రచురణల కాపీలు అవసరమౌతున్నాయి, మరిన్ని రాజ్యమందిరాల్ని నిర్మించి, వాటిని మంచి స్థితిలో ఉంచాలి, సమావేశాల కోసం మరిన్ని స్థలాలు అవసరమౌతున్నాయి. రాజ్యసువార్తను ప్రకటించే మన పని గొప్పదని, ఫలవంతమైనదని మీరు ఒప్పుకోరా?—మత్త. 24:14.

దేవుని మీద, పొరుగువాళ్లమీద ఉన్న ప్రేమనుబట్టి, రాజ్య ప్రకటనా పనికున్న ప్రాముఖ్యతను బట్టి దేవుని ప్రజలు స్వచ్ఛందంగా విరాళాలు ఇవ్వడం ద్వారా ‘యెహోవాకు ప్రతిష్ఠితముగా ఇవ్వడానికి’ ముందుకు వస్తున్నారు. తమ ‘ఆస్తిలో భాగం ఇచ్చి యెహోవాను ఘనపరచడం,’ మానవ చరిత్రలోనే అత్యంత గొప్ప పనికోసం ఆ వనరుల్ని నమ్మకంగా, వివేకంగా ఉపయోగించడం చూసి మనం ఎంత ఆనందిస్తామో కదా!—సామె. 3:9.