బైబిలు ఇలా చెప్తుంది: “ఆయన [అంటే, దేవుడు] ఆకాశం నుండి వర్షాల్నీ పుష్కలంగా పంటనిచ్చే రుతువుల్నీ ఇస్తూ, ఆహారంతో మిమ్మల్ని సంతృప్తిపరుస్తూ, మీ హృదయాల్ని సంతోషంతో నింపుతూ వచ్చాడు.”—అపొస్తలుల కార్యాలు 14:17.

దానర్థం: ప్రకృతిలో మీరు ఆనందించే ప్రతీది సృష్టికర్త ఇచ్చిన బహుమతే. వాటిని ఇచ్చిన దేవునికి మీపై ఎంత శ్రద్ధ ఉందో తెలుసుకుంటే, ఆయనిచ్చిన బహుమతుల మీద మీకున్న కృతజ్ఞత ఇంకా ఎక్కువ పెరుగుతుంది.

బైబిలు ఇలా చెప్తుంది: “నువ్వు నీతి, న్యాయం, నిష్పక్షపాతం అంటే ఏంటో అర్థం చేసుకుంటావు, ఏది మంచి మార్గమో గ్రహిస్తావు.”—సామెతలు 2:9.

దానర్థం: మిమ్మల్ని సృష్టించింది దేవుడే కాబట్టి, సంతోషంగా ఉండడానికి మీకేమి అవసరమో ఆయనకు తెలుసు. బైబిలు చదివితే, మీకు జీవితంలో ఉపయోగపడే ఎన్నో మంచి విషయాలు తెలుసుకుంటారు.

బైబిలు ఇలా చెప్తుంది: “దేవుని గురించిన జ్ఞానం నీకు దొరుకుతుంది.”—సామెతలు 2:5.

దానర్థం: సృష్టికర్త ఉన్నాడని మీరు రుజువుల్ని పరిశీలించి తెలుసుకున్నప్పుడు, ‘జీవితం అంటే ఏంటి? ఇన్ని కష్టాలు ఎందుకు ఉన్నాయి? చనిపోయాక మనకు ఏమౌతుంది?’ లాంటి ముఖ్యమైన ప్రశ్నలకు మీకు జవాబులు దొరుకుతాయి. ఆ జవాబులు మరెక్కడో కాదు బైబిల్లోనే ఉన్నాయి.

బైబిలు ఇలా చెప్తుంది: “‘నేను మీకు ఏంచేయాలని అనుకుంటున్నానో నాకు తెలుసు. నేను మీకు విపత్తును కాదు శాంతిని దయచేస్తాను. మీకు మంచి భవిష్యత్తు, నిరీక్షణ ఉండేలా చేస్తాను’ అని యెహోవా అంటున్నాడు.”—యిర్మీయా 29:11.

దానర్థం: భవిష్యత్తులో చెడుతనం, కష్టాలు, ఆఖరికి మరణం లేకుండా చేస్తానని దేవుడు మాటిచ్చాడు. ఇచ్చిన మాటను ఆయన నిలబెట్టుకుంటాడనే నమ్మకం మీకు కుదిరితే, ప్రతీరోజు ఎదురయ్యే కష్టాల్ని ధైర్యంగా తట్టుకుంటారు. అంతేకాదు, భవిష్యత్తు కోసం ఆశతో ఎదురుచూస్తారు.