అధ్యాయము 47

అత్యానందముగా మారిన కన్నీరు

రక్తస్రావముగల స్త్రీ స్వస్థపరచబడటం యాయీరు చూచినప్పుడు యేసు యొక్క అద్భుత శక్తిపై తన విశ్వాసం పెరిగిందనుటలో సందేహములేదు. చావుకు సిద్ధమైయున్న తన 12 సంవత్సరముల వయస్సుగల కూతురును బాగుచేయుమని యాయీరు ఆ దినమున అంతకుముందే యేసును అడిగియున్నాడు. అయితే ఇప్పుడు యాయీరు భయపడినంతా జరిగిపోవును. యేసు ఆ స్త్రీతో ఇంకను మాట్లాడుచుండగా, కొందరు వేగముగావచ్చి యాయీరుతో, “నీ కుమార్తె చనిపోయినది; నీవిక బోధకుని ఎందుకు శ్రమ పెట్టుదువనిరి.”

ఆ వార్త ఎంతగా కృంగదీసెను! సమాజములో బహుగా గౌరవింపబడుచున్న ఈ మనుష్యుడు, తన కుమార్తె మరణవార్త వినగానే ఇప్పుడు పూర్తిగా నిస్సహాయుడగును. అయితే, యేసు వీరి సంభాషణ విని, యాయీరు వైపు తిరిగి “భయపడకుము, నమ్మిక మాత్రముంచుమని” ప్రోత్సహించును.

దుఃఖములో మునిగియున్న ఆ వ్యక్తి వెంట యేసు అతని ఇంటికి వచ్చును. వారు వచ్చినప్పుడు అక్కడున్న ప్రజలందరు గొల్లున ఏడ్చుచూ, తమ్మునుతాము చరుచుకొనుచూ ప్రలాపించుదురు. యేసు లోపలికి ప్రవేశించి “మీరేల గొల్లుచేసి యేడ్చుచున్నారు? ఈ చిన్నది నిద్రించుచున్నదేగాని చనిపోలేదని” వారితో చెప్పును.

దీనిని విన్న ప్రజలు ఆ బాలిక నిజముగా చనిపోయెనని ఎరిగియున్నందున, వారు యేసును పరిహసింతురు. అయినను యేసు ఆమె నిద్రించుచున్నదని చెప్పెను. దేవుడు తనకిచ్చిన శక్తితో గాఢ నిద్రలోనున్న వారిని లేపినంత తేలికగా మృతులను లేపవచ్చునని ఆయన ప్రజలకు చూపించనైయుండెను.

ఇప్పుడు పేతురు, యోహాను, యాకోబు మరియు ఆ బాలిక తలిదండ్రులను తప్ప మిగతావారినందరిని యేసు బయటకు పంపివేసెను. తనతోపాటు ఈ ఐదుగురిని ఆ బాలిక ఉన్న గదిలోనికి తీసికొనిపోవును. ఆ పిమ్మట యేసు ఆ చిన్నదాని చేయిపట్టుకొని “తలీ’తా’కుమీ” అనును. ఆ మాటకు “చిన్నదానా లెమ్మని నీతో చెప్పుచున్నానని” అర్థము. వెంటనే ఆ చిన్నది లేచి నడువసాగును! ఈ దృశ్యమును చూచిన ఆమె తలిదండ్రుల ఆనందమునకు అవధులు లేకపోవును.

ఆమెకు తినుటకు ఏదైన ఇవ్వమని వారికి చెప్పిన తరువాత జరిగిన విషయములను ఎవ్వరికి తెల్పవద్దని యేసు యాయీరునకును అతని భార్యకును ఆజ్ఞాపించును. యేసు ఈ విధముగా చెప్పినప్పటికిని, ఈ వార్త ఆ ప్రాంతమంతయు వ్యాపించును. ఇది యేసు చేసిన రెండవ పునరుత్థానము. మత్తయి 9:18-26; మార్కు 5:35-43; లూకా 8:41-56.

▪ యాయీరు ఏ వార్తను వినెను, మరియు యేసు అతనినెట్లు ప్రోత్సహించును?

▪ వారు యాయీరు యింటికి వచ్చినప్పుడు పరిస్థితి ఎట్లున్నది?

▪ బాలిక కేవలము నిద్రపోవుచున్నదని యేసు ఎందుకు చెప్పును?

▪ యేసుతో పాటు ఈ పునరుత్థానమును చూచిన మిగతా ఐదుగురు ఎవరు?