జలప్రళయం నుండి కేవలం ఎనిమిది మంది మాత్రమే రక్షించబడ్డారు, కానీ కొంతకాలానికి వారి సంఖ్య అనేక వేలకు పెరిగింది. జలప్రళయం వచ్చిన 352 సంవత్సరాల తర్వాత అబ్రాహాము జన్మించాడు. అబ్రాహాముకు ఇస్సాకు అనే కుమారుడిని ఇచ్చి దేవుడు తన వాగ్దానాన్ని ఎలా నిలబెట్టుకున్నాడో మనం తెలుసుకుంటాం. తర్వాత ఇస్సాకు ఇద్దరు కుమారులలో దేవుడు యాకోబును ఎన్నుకున్నాడు.

యాకోబుకు 12 మంది కుమారులు, కొంతమంది కుమార్తెలుగల పెద్ద కుటుంబం ఉండేది. యాకోబు 10 మంది కుమారులు తమ తమ్ముడైన యోసేపును ద్వేషించి ఆయనను ఐగుప్తులో దాసునిగా ఉండడానికి అమ్మేశారు. ఆ తర్వాత, యోసేపు ఐగుప్తులో ఒక ప్రముఖ పాలకుడయ్యాడు. కరవు వచ్చినప్పుడు యోసేపు తన అన్నల హృదయాలలో మార్పేమైనా వచ్చిందేమో పరీక్షించాడు. చివరకు యాకోబు కుటుంబమంతా అంటే ఇశ్రాయేలీయులు ఐగుప్తుకు తరలి వెళ్ళారు. అది అబ్రాహాము పుట్టిన 290 సంవత్సరాల తర్వాత జరిగింది.

ఇశ్రాయేలీయులు తర్వాతి 215 సంవత్సరాలు ఐగుప్తులో నివసించారు. యోసేపు మరణించిన తర్వాత వాళ్ళు అక్కడ దాసులయ్యారు. కొంతకాలానికి మోషే జన్మించాడు, ఇశ్రాయేలీయులను ఐగుప్తునుండి విడిపించడానికి దేవుడు ఆయనను ఉపయోగించుకున్నాడు. మొత్తం 857 సంవత్సరాల చరిత్ర రెండవ భాగంలో వివరించబడింది.