మత్తయి 1:1-25
1 ఇది యేసుక్రీస్తు* వంశావళికి* సంబంధించిన పుస్తకం. ఆయన దావీదు కొడుకు. దావీదు అబ్రాహాము కొడుకు.
2 అబ్రాహాము ఇస్సాకును కన్నాడు;ఇస్సాకు యాకోబును కన్నాడు;యాకోబు యూదాను, అతని సోదరుల్ని కన్నాడు;
3 యూదా తామారు ద్వారా పెరెసును, జెరహును కన్నాడు;పెరెసు ఎస్రోనును కన్నాడు;ఎస్రోను అరామును కన్నాడు;
4 అరాము అమ్మీనాదాబును కన్నాడు;అమ్మీనాదాబు నయస్సోనును కన్నాడు;నయస్సోను శల్మానును కన్నాడు;
5 శల్మాను రాహాబు ద్వారా బోయజును కన్నాడు;బోయజు రూతు ద్వారా ఓబేదును కన్నాడు;ఓబేదు యెష్షయిని కన్నాడు;
6 యెష్షయి రాజైన దావీదును కన్నాడు.దావీదు ఊరియా భార్య ద్వారా సొలొమోనును కన్నాడు;
7 సొలొమోను రెహబామును కన్నాడు;రెహబాము అబీయాను కన్నాడు;అబీయా ఆసాను కన్నాడు;
8 ఆసా యెహోషాపాతును కన్నాడు;యెహోషాపాతు యెహోరామును కన్నాడు;యెహోరాము ఉజ్జియాను కన్నాడు;
9 ఉజ్జియా యోతామును కన్నాడు;యోతాము ఆహాజును కన్నాడు;ఆహాజు హిజ్కియాను కన్నాడు;
10 హిజ్కియా మనష్షేను కన్నాడు;మనష్షే ఆమోనును కన్నాడు;ఆమోను యోషీయాను కన్నాడు;
11 యూదులు బబులోనుకు బందీలుగా తీసుకెళ్లబడిన కాలంలో యోషీయా యెకొన్యాను, అతని సోదరుల్ని కన్నాడు.
12 బబులోనుకు వెళ్లిన తర్వాత యెకొన్యా షయల్తీయేలును కన్నాడు;షయల్తీయేలు జెరుబ్బాబెలును కన్నాడు;
13 జెరుబ్బాబెలు అబీహూదును కన్నాడు;అబీహూదు ఎల్యాకీమును కన్నాడు;ఎల్యాకీము అజోరును కన్నాడు;
14 అజోరు సాదోకును కన్నాడు;సాదోకు ఆకీమును కన్నాడు;ఆకీము ఎలీహూదును కన్నాడు;
15 ఎలీహూదు ఎలియాజరును కన్నాడు;ఎలియాజరు మత్తానును కన్నాడు;మత్తాను యాకోబును కన్నాడు;
16 యాకోబు, మరియ భర్తయైన యోసేపును కన్నాడు; మరియకు యేసు పుట్టాడు. ఈ యేసే క్రీస్తు అయ్యాడు.
17 కాబట్టి, అబ్రాహాము నుండి దావీదు వరకు మొత్తం 14 తరాలు; దావీదు నుండి, యూదులు బబులోనుకు బందీలుగా తీసుకెళ్లబడిన సమయం వరకు మొత్తం 14 తరాలు; బబులోనుకు బందీలుగా తీసుకెళ్లబడిన సమయం నుండి క్రీస్తు వరకు మొత్తం 14 తరాలు.
18 యేసుక్రీస్తు పుట్టుక ఇలా జరిగింది: ఆయన తల్లి మరియ పెళ్లి యోసేపుతో నిశ్చయమైంది; కానీ వాళ్ల పెళ్లి కాకముందే ఆమె పవిత్రశక్తి* ద్వారా గర్భవతి అయ్యింది.
19 అయితే ఆమె భర్త యోసేపు నీతిమంతుడు కాబట్టి ఆమెను అందరిముందు అవమానించడం ఇష్టంలేక ఆమెకు రహస్యంగా విడాకులు ఇవ్వాలనుకున్నాడు.
20 కానీ అతను ఈ విషయాల గురించి ఆలోచించి నిద్రపోయాక, ఇదిగో! యెహోవా* దూత అతనికి కలలో కనిపించి ఇలా అన్నాడు: “దావీదు కొడుకైన యోసేపూ, నీ భార్య మరియను ఇంటికి తీసుకురావడానికి భయపడకు; ఎందుకంటే ఆమె పవిత్రశక్తి ద్వారా గర్భవతి అయ్యింది.
21 ఆమె ఒక కొడుకును కంటుంది. నువ్వు ఆయనకు యేసు* అని పేరుపెట్టాలి, ఎందుకంటే ఆయన తన ప్రజల్ని పాపం నుండి రక్షిస్తాడు.”
22 నిజానికి, యెహోవా* తన ప్రవక్త ద్వారా చెప్పిన ఈ మాటలు నెరవేరేందుకే అదంతా జరిగింది:
23 “ఇదిగో! ఒక కన్య గర్భవతియై కొడుకును కంటుంది, ఆయనకు ఇమ్మానుయేలు అని పేరు పెడతారు.” ఆ పేరుకు, “దేవుడు మనతో ఉన్నాడు” అని అర్థం.
24 అప్పుడు యోసేపు నిద్ర లేచి యెహోవా* దూత తనకు చెప్పినట్టే చేశాడు, అతను తన భార్యను ఇంటికి తెచ్చుకున్నాడు.
25 కానీ ఆమె కొడుకును కనేంతవరకు యోసేపు ఆమెతో లైంగిక సంబంధాలు పెట్టుకోలేదు. యోసేపు ఆయనకు యేసు అని పేరు పెట్టాడు.
అధస్సూచీలు
^ “క్రీస్తు” అనేది ఒక బిరుదు. ఆ మాటకు “అభిషిక్తుడు,” అంటే దేవుడు అభిషేకించిన రాజు అని అర్థం.
^ లేదా “చరిత్రకి.”
^ లేదా “చురుకైన శక్తి.”
^ ఈ అనువాదంలోని క్రైస్తవ గ్రీకు లేఖనాల్లో, దేవుని పేరు అయిన “యెహోవా” 237 సార్లు కనిపిస్తుంది. వాటిలో ఇది మొదటిది. పదకోశం చూడండి.
^ హీబ్రూ భాషలో యేషూవ. ఆ పేరుకు, “యెహోవాయే రక్షణ” అని అర్థం.
^ పదకోశం చూడండి.
^ పదకోశం చూడండి.