మత్తయి 16:1-28
16 అక్కడ పరిసయ్యులు, సద్దూకయ్యులు యేసు దగ్గరికి వచ్చి, ఆయన్ని పరీక్షించాలనే ఉద్దేశంతో ఆకాశం నుండి ఒక సూచనను తమకు చూపించమని అడిగారు.
2 అప్పుడు యేసు వాళ్లతో ఇలా అన్నాడు: “సాయంకాలం అయినప్పుడు, ‘ఆకాశం ఎర్రగా ఉంది కాబట్టి వర్షం పడదు’ అని మీరంటారు.
3 అలాగే ఉదయం పూట, ‘ఆకాశం ఎర్రగా ఉన్నా, మబ్బుగా ఉంది కాబట్టి ఈ రోజు చల్లగా ఉంటుంది, వర్షం పడుతుంది’ అని మీరంటారు. ఆకాశాన్ని చూసి వాతావరణం ఎలా ఉంటుందో మీరు అర్థంచేసుకోగలరు కానీ కాలాల సూచనల్ని మీరు అర్థంచేసుకోలేరు.
4 దుష్టులు, వ్యభిచారులు* అయిన ఈ తరంవాళ్లు ఒక సూచన కోసం చూస్తూనే ఉంటారు. కానీ యోనా ప్రవక్తకు సంబంధించిన సూచన తప్ప మరే సూచనా వాళ్లకు ఇవ్వబడదు.” ఈ మాట చెప్పి ఆయన వాళ్లను విడిచిపెట్టి వెళ్లిపోయాడు.
5 అప్పుడు శిష్యులు సముద్రం అవతలి ఒడ్డుకు చేరుకున్నారు, కానీ వాళ్లు రొట్టెలు తీసుకువెళ్లడం మర్చిపోయారు.
6 యేసు వాళ్లతో ఇలా అన్నాడు: “అప్రమత్తంగా ఉండండి. పరిసయ్యుల, సద్దూకయ్యుల పులిసిన పిండి విషయంలో జాగ్రత్తగా ఉండండి.”
7 దాంతో వాళ్లు, “మనం రొట్టెల్ని తీసుకురావడం మర్చిపోయాం కదా” అని ఒకరితో ఒకరు అనుకోవడం మొదలుపెట్టారు.
8 విషయం తెలిసి యేసు ఇలా అన్నాడు: “అల్పవిశ్వాసులారా, మీ దగ్గర రొట్టెలు లేవని మీలో మీరు ఎందుకు మాట్లాడుకుంటున్నారు?
9 మీకు ఇంకా విషయం అర్థంకాలేదా? నేను ఐదు రొట్టెలతో 5,000 మందికి* ఆహారం పెట్టినప్పుడు మీరు ఎన్ని గంపలు ఎత్తారో మీకు గుర్తులేదా?
10 అలాగే, నేను ఏడు రొట్టెలతో 4,000 మందికి* ఆహారం పెట్టినప్పుడు మీరు ఎన్ని పెద్ద గంపలు* ఎత్తారో మీకు గుర్తులేదా?
11 నేను మీతో మాట్లాడింది రొట్టెల గురించి కాదని మీకెందుకు అర్థం కావట్లేదు? పరిసయ్యుల, సద్దూకయ్యుల పులిసిన పిండి విషయంలో జాగ్రత్తగా ఉండండి.”
12 జాగ్రత్తగా ఉండమని ఆయన చెప్పింది, రొట్టెల తయారీలో ఉపయోగించే పులిసిన పిండి గురించి కాదుగానీ పరిసయ్యుల, సద్దూకయ్యుల బోధ గురించే అని వాళ్లకు అప్పుడు అర్థమైంది.
13 యేసు ఫిలిప్పీ కైసరయ ప్రాంతానికి వచ్చినప్పుడు, తన శిష్యుల్ని ఇలా అడిగాడు: “మానవ కుమారుడు ఎవరని ప్రజలు చెప్పుకుంటున్నారు?”
14 అందుకు వాళ్లు ఆయనతో ఇలా అన్నారు: “కొంతమంది బాప్తిస్మం ఇచ్చే యోహానని చెప్పుకుంటున్నారు. ఇంకొంతమంది ఏలీయా అని, మరికొంతమంది యిర్మీయా అని లేదా ప్రవక్తల్లో ఒకడని చెప్పుకుంటున్నారు.”
15 అప్పుడు ఆయన వాళ్లను ఇలా అడిగాడు: “మరి మీరు నేనెవరినని అనుకుంటున్నారు?”
16 అందుకు సీమోను పేతురు, “నువ్వు క్రీస్తువి, సజీవుడైన దేవుని కుమారుడివి” అన్నాడు.
17 అప్పుడు యేసు అతనితో ఇలా అన్నాడు: “యోనా కొడుకువైన సీమోనూ, నువ్వు ఆశీర్వదించబడిన వాడివి. నీకు ఈ విషయాన్ని మనుషులు* కాదుగానీ పరలోకంలో ఉన్న నా తండ్రి తెలియజేశాడు.
18 అంతేకాదు, నేను నీతో చెప్తున్నాను: నువ్వు పేతురువి, ఈ బండమీద నేను నా సంఘాన్ని కడతాను; సమాధి* ద్వారాలు దాన్ని జయించవు.
19 పరలోక రాజ్యపు తాళంచెవుల్ని నేను నీకు ఇస్తాను. నువ్వు భూమ్మీద దేన్నైనా బంధిస్తే అది అప్పటికే పరలోకంలో బంధించబడి ఉంటుంది; అలాగే నువ్వు భూమ్మీద దేన్నైనా విప్పితే అది అప్పటికే పరలోకంలో విప్పబడి ఉంటుంది.”
20 తర్వాత ఆయన, తాను క్రీస్తుననే విషయం ఎవరికీ చెప్పవద్దని శిష్యులకు గట్టిగా చెప్పాడు.
21 యేసు, తాను యెరూషలేముకు వెళ్లాలనీ; పెద్దల, ముఖ్య యాజకుల, శాస్త్రుల చేతుల్లో ఎన్నో బాధలు పడి చంపబడాలనీ; మూడో రోజున బ్రతికించబడాలనీ అప్పటినుండి తన శిష్యులకు చెప్పడం మొదలుపెట్టాడు.
22 అప్పుడు పేతురు ఆయన్ని పక్కకు తీసుకువెళ్లి, “ప్రభువా, అలా మాట్లాడొద్దు. అలా నీకు జరగనే జరగదు” అని అంటూ ఆయన్ని మందలించడం మొదలుపెట్టాడు.
23 కానీ యేసు వెనక్కి తిరిగి పేతురుతో, “సాతానా! నా దగ్గర నుండి వెళ్లిపో.* నువ్వు నా దారికి అడ్డుగా ఉన్నావు. నువ్వు దేవుని ఆలోచనల మీద కాకుండా మనుషుల ఆలోచనల మీద మనసు పెడుతున్నావు” అన్నాడు.
24 అప్పుడు యేసు తన శిష్యులకు ఇలా చెప్పాడు: “ఓ వ్యక్తి నా శిష్యుడు అవ్వాలనుకుంటే, అతను తన జీవితాన్ని త్యాగం చేసి, తన హింసాకొయ్యను* మోస్తూ నన్ను అనుసరిస్తూ ఉండాలి.
25 ఎందుకంటే తన ప్రాణాన్ని కాపాడుకోవాలని అనుకునే వ్యక్తి చనిపోతాడు. కానీ నా కోసం చనిపోయే వ్యక్తి రక్షించబడతాడు.
26 నిజానికి, ఒక వ్యక్తి లోకాన్నంతా సంపాదించుకొని తన ప్రాణాన్ని పోగొట్టుకుంటే, అతనికి ఏమి లాభం? ఒక వ్యక్తి తన ప్రాణం కోసం ఏమి ఇవ్వగలడు?
27 ఎందుకంటే మానవ కుమారుడు తన తండ్రి మహిమతో, తన దూతలతోపాటు వస్తాడు. అప్పుడు ఆయన ప్రతీ ఒక్కరికి వాళ్లవాళ్ల ప్రవర్తనను బట్టి ప్రతిఫలం ఇస్తాడు.
28 నేను నిజంగా మీతో చెప్తున్నాను, ఇక్కడ ఉన్నవాళ్లలో కొంతమంది మానవ కుమారుడు తన రాజ్యంలో రావడం చూసేవరకు చనిపోరు.”
అధస్సూచీలు
^ లేదా “నమ్మకద్రోహులు.”
^ లేదా “పురుషులకు.”
^ లేదా “పురుషులకు.”
^ లేదా “సామాన్లు పెట్టుకునే పెద్దపెద్ద బుట్టలు.”
^ అక్ష., “రక్తమాంసాలు.”
^ లేదా “హేడిస్‌,” అంటే మానవజాతి సాధారణ సమాధి. పదకోశం చూడండి.
^ అక్ష., “నా వెనక్కి వెళ్లు.”
^ పదకోశం చూడండి.
