మత్తయి 28:1-20
28 విశ్రాంతి రోజు గడిచిపోయింది. వారం మొదటి రోజు* తెల్లవారుతున్నప్పుడు మగ్దలేనే మరియ, ఇంకో మరియ సమాధిని చూడడానికి వచ్చారు.
2 అప్పటికే అక్కడ ఓ పెద్ద భూకంపం వచ్చింది! ఎందుకంటే యెహోవా* దూత పరలోకం నుండి వచ్చి సమాధికి అడ్డంగా ఉన్న రాయిని తీసేసి, దాని మీద కూర్చున్నాడు.
3 ఆ దూత మెరుపులా తళతళ మెరిసిపోతున్నాడు, అతని వస్త్రాలు మంచు అంత తెల్లగా ఉన్నాయి.
4 కాపలా కాస్తున్నవాళ్లు అతనికి భయపడి వణికిపోయారు; చచ్చినవాళ్లలా అయిపోయారు.
5 కానీ దేవదూత ఆ స్త్రీలకు ఇలా చెప్పాడు: “భయపడకండి, కొయ్యపై మరణశిక్ష వేయబడిన యేసు కోసం మీరు చూస్తున్నారని నాకు తెలుసు.
6 ఆయన ఇక్కడ లేడు, తాను చెప్పినట్టే ఆయన బ్రతికించబడ్డాడు. వచ్చి, ఆయన్ని ఉంచిన చోటును చూడండి.
7 త్వరగా వెళ్లి, ఆయన మృతుల్లో నుండి బ్రతికించబడ్డాడని ఆయన శిష్యులకు చెప్పండి. ఎందుకంటే, ఇదిగో! ఆయన మీకన్నా ముందు గలిలయకు వెళ్తున్నాడు. ఆయన్ని మీరు అక్కడ చూస్తారు. ఈ విషయం చెప్పడానికే నేను వచ్చాను.”
8 కాబట్టి, వెంటనే శిష్యులకు ఈ విషయం చెప్పడానికి వాళ్లు భయంతో, ఎంతో సంతోషంతో ఆ సమాధి* దగ్గరి నుండి పరుగెత్తుకుంటూ వెళ్లారు.
9 అప్పుడు ఇదిగో! యేసు ఆ స్త్రీలను కలిసి పలకరించాడు. వాళ్లు ఆయన దగ్గరికి వచ్చి ఆయన పాదాలు పట్టుకొని ఆయనకు సాష్టాంగ* నమస్కారం చేశారు.
10 తర్వాత యేసు వాళ్లతో ఇలా అన్నాడు: “భయపడకండి! మీరు వెళ్లి నా సోదరుల్ని గలిలయకు రమ్మని చెప్పండి, అక్కడ వాళ్లు నన్ను చూస్తారు.”
11 ఆ స్త్రీలు వెళ్తుండగా, కాపలా ఉన్న సైనికుల్లో కొందరు నగరంలోకి వెళ్లి జరిగిన వాటన్నిటి గురించి ముఖ్య యాజకులకు చెప్పారు.
12 వాళ్లు పెద్దలతో సమావేశమై మాట్లాడుకున్న తర్వాత, ఆ సైనికులకు పెద్ద మొత్తంలో వెండి నాణేలు ఇచ్చి,
13 ఇలా అన్నారు: “‘రాత్రిపూట ఆయన శిష్యులు వచ్చి మేము నిద్రపోతున్నప్పుడు ఆయన్ని ఎత్తుకెళ్లిపోయారు’ అని చెప్పండి.
14 ఇది అధిపతి చెవిలో పడితే, అతన్ని ఒప్పించే పూచీ మాది. తర్వాత మీరు కంగారు పడాల్సిన అవసరం ఉండదు.”
15 సైనికులు ఆ వెండి నాణేలు తీసుకొని వాళ్లు చెప్పినట్టే చేశారు. వాళ్లు చెప్పిన కథ యూదుల్లో బాగా వ్యాపించి ఈరోజు వరకు ప్రాచుర్యంలో ఉంది.
16 అయితే, ఆ 11 మంది శిష్యులు మాత్రం గలిలయలో యేసు తమను కలుస్తానని చెప్పిన కొండ దగ్గరికి వెళ్లారు.
17 ఆయన్ని చూసినప్పుడు వాళ్లు సాష్టాంగ* నమస్కారం చేశారు, కొందరు మాత్రం సందేహపడ్డారు.
18 యేసు వాళ్ల దగ్గరికి వచ్చి ఇలా అన్నాడు: “పరలోకంలో, భూమ్మీద నాకు సర్వాధికారం ఇవ్వబడింది.
19 కాబట్టి, మీరు వెళ్లి అన్ని దేశాల ప్రజలను శిష్యుల్ని చేయండి; తండ్రి పేరున, కుమారుడి పేరున, పవిత్రశక్తి పేరున వాళ్లకు బాప్తిస్మం ఇవ్వండి;
20 నేను మీకు ఆజ్ఞాపించిన వాటన్నిటినీ పాటించడం వాళ్లకు నేర్పించండి. ఇదిగో! ఈ వ్యవస్థ* ముగింపు వరకు నేను ఎప్పుడూ మీతోనే ఉంటాను.”
అధస్సూచీలు
^ ఇది ఆదివారం. యూదులకు వారంలో అది మొదటి రోజు.
^ పదకోశం చూడండి.
^ లేదా “స్మారక సమాధి.”
^ లేదా “వంగి.”
^ లేదా “వంగి.”
^ లేదా “యుగం.” పదకోశం చూడండి.