యోహాను 17:1-26
17 యేసు ఈ మాటలు చెప్పాక, ఆకాశం వైపు చూసి ఇలా అన్నాడు: “తండ్రీ, సమయం వచ్చేసింది. నీ కుమారుడు నిన్ను మహిమపర్చేలా నీ కుమారుణ్ణి మహిమపర్చు.
2 ఎందుకంటే, నువ్వు అందరి మీద ఆయనకు అధికారాన్ని ఇచ్చావు. దానివల్ల నువ్వు ఆయనకు అప్పగించిన వాళ్లందరికీ ఆయన శాశ్వత జీవితాన్ని ఇవ్వగలుగుతాడు.
3 ఒకేఒక్క సత్య దేవుడివైన నిన్నూ, నువ్వు పంపించిన యేసుక్రీస్తునూ తెలుసుకోవడమే శాశ్వత జీవితం.
4 చేయడానికి నువ్వు నాకు ఇచ్చిన పనిని పూర్తి చేసి భూమ్మీద నిన్ను మహిమపర్చాను.
5 కాబట్టి, తండ్రీ లోకం ఉనికిలోకి రాకముందు నీ దగ్గర నాకు ఎలాంటి మహిమ ఉందో అదే మహిమతో ఇప్పుడు నన్ను నీ దగ్గర మహిమపర్చు.
6 “లోకంలో నుండి నువ్వు నాకు ఇచ్చిన మనుషులకు నీ పేరు తెలియజేశాను. వీళ్లు నీవాళ్లు, వీళ్లను నువ్వు నాకు ఇచ్చావు; వీళ్లు నీ వాక్యాన్ని పాటించారు.
7 నువ్వు నాకు ఇచ్చినవన్నీ నీ నుండి వచ్చాయని వీళ్లిప్పుడు తెలుసుకున్నారు;
8 ఎందుకంటే నువ్వు నాకు చెప్పిన మాటల్ని నేను వీళ్లకు చెప్పినప్పుడు వీళ్లు వాటిని అంగీకరించి, నేను నీ ప్రతినిధిగా వచ్చానని నిజంగా తెలుసుకున్నారు. అంతేకాదు, నువ్వు నన్ను పంపావని వీళ్లు నమ్ముతున్నారు.
9 నేను వీళ్ల గురించి ప్రార్థిస్తున్నాను. నేను లోకం గురించి ప్రార్థించడం లేదుగానీ నువ్వు నాకు ఇచ్చిన వీళ్ల గురించే ప్రార్థిస్తున్నాను, ఎందుకంటే వీళ్లు నీ వాళ్లు;
10 నావన్నీ నీవి, నీవన్నీ నావి. నేను వీళ్ల మధ్య మహిమపర్చబడ్డాను.
11 “నేను ఇక లోకంలో ఉండను, కానీ వీళ్లు లోకంలో ఉన్నారు. నేను నీ దగ్గరికి వస్తున్నాను. పవిత్రుడవైన తండ్రీ, నువ్వు నాకు ఇచ్చిన నీ సొంత పేరును బట్టి వీళ్లను కాపాడు. అప్పుడు, మనం ఐక్యంగా ఉన్నట్లే వీళ్లు కూడా ఐక్యంగా ఉంటారు.
12 నేను వీళ్లతో ఉన్నప్పుడు, నువ్వు నాకు ఇచ్చిన నీ సొంత పేరును బట్టి వీళ్లను జాగ్రత్తగా చూసుకుంటూ వచ్చాను. నేను వీళ్లను కాపాడాను. లేఖనం నెరవేరేలా, నాశనపుత్రుడు తప్ప వీళ్లలో ఏ ఒక్కరూ నాశనం కాలేదు.
13 కానీ ఇప్పుడు నేను నీ దగ్గరికి వస్తున్నాను. నా సంతోషాన్ని వీళ్లు పూర్తిగా అనుభవించేలా, నేను ఇంకా లోకంలో ఉన్నప్పుడే ఈ విషయాలు మాట్లాడుతున్నాను.
14 నేను వీళ్లకు నీ వాక్యాన్ని ఇచ్చాను, అయితే లోకం వీళ్లను ద్వేషించింది; ఎందుకంటే నేను లోకసంబంధిని కానట్లు వీళ్లు కూడా లోకసంబంధులు కారు.
15 “వీళ్లను లోకంలో నుండి తీసుకెళ్లిపోమని నేను ప్రార్థించడం లేదు కానీ, దుష్టుని నుండి వీళ్లను కాపాడమని నీకు ప్రార్థిస్తున్నాను.
16 నేను లోకసంబంధిని కాను, అలాగే వీళ్లు కూడా లోకసంబంధులు కారు.
17 సత్యంతో వీళ్లను పవిత్రపర్చు,* నీ వాక్యమే సత్యం.
18 నువ్వు నన్ను లోకంలోకి పంపించినట్లే, నేను కూడా వీళ్లను లోకంలోకి పంపించాను.
19 వీళ్లు సత్యం వల్ల పవిత్రులు కావాలని వీళ్ల కోసం నన్ను నేను పవిత్రంగా ఉంచుకుంటున్నాను.
20 “నేను వీళ్ల కోసం మాత్రమే ప్రార్థించట్లేదు గానీ, వీళ్ల బోధ విని నా మీద విశ్వాసం ఉంచే వాళ్లందరి కోసం కూడా ప్రార్థిస్తున్నాను.
21 వాళ్లందరూ ఐక్యంగా ఉండాలని; తండ్రీ, నువ్వు నాతో ఐక్యంగా ఉన్నట్లు, నేను నీతో ఐక్యంగా ఉన్నట్లు వాళ్లు కూడా మనతో ఐక్యంగా ఉండాలని ప్రార్థిస్తున్నాను. అప్పుడు, నువ్వు నన్ను పంపించావని లోకం నమ్ముతుంది.
22 మనం ఐక్యంగా ఉన్నట్లు వీళ్లు కూడా ఐక్యంగా ఉండేలా, నువ్వు నాకు ఇచ్చిన మహిమను నేను వీళ్లకు ఇచ్చాను.
23 వీళ్లు సంపూర్ణంగా ఐక్యంగా ఉండేలా నేను వీళ్లతో ఐక్యంగా ఉన్నాను, నువ్వు నాతో ఐక్యంగా ఉన్నావు. నువ్వు నన్ను పంపించావనీ నన్ను ప్రేమించినట్లే వీళ్లను కూడా ప్రేమించావనీ అప్పుడు లోకానికి తెలుస్తుంది.
24 తండ్రీ, నువ్వు నాకు ఇచ్చిన వీళ్లు, నేను ఉండే చోట నాతోపాటు ఉండాలని కోరుకుంటున్నాను. నువ్వు నాకు ఇచ్చిన మహిమను అప్పుడు వీళ్లు చూడగలుగుతారు. ఎందుకంటే ప్రపంచం పుట్టకముందే* నువ్వు నన్ను ప్రేమించావు.
25 నీతిమంతుడివైన తండ్రీ, నిజానికి నువ్వు ఎవరో లోకానికి తెలీదు. కానీ నువ్వు ఎవరో నాకు తెలుసు, నువ్వు నన్ను పంపించావని వీళ్లకు తెలుసు.
26 నువ్వు నామీద చూపించిన ప్రేమను వీళ్లు ఇతరుల మీద చూపించేలా, నేను వీళ్లతో ఐక్యంగా ఉండేలా నీ పేరును నేను వీళ్లకు తెలియజేశాను, ఇంకా తెలియజేస్తాను.”
అధస్సూచీలు
^ లేదా “వీళ్లను వేరుగా ఉంచు, పవిత్రులుగా చేయి.”
^ అక్ష., “(విత్తనం) పడకముందే,” అంటే ఆదాముహవ్వలకు పిల్లలు పుట్టకముందే.
